ماشي تجدد عندنا من مدّه
إلا الكلام اللي نقول نردّه

وانتو تلومو ليش انا ما جيكم
والنفس من كثر الحكى منسدّه

احسن لي ابعد عنكم باشعاري
واسج صوتي في الخلاء وآمدّه

لعلّ هذا با يخفف عنّي
فنا وحظي قد وصلنا الهدّه

فكرت كيف أيامنا وش كانت
ولقيتها باحزانا مسودّه

لا جا الفرح كنه يجينا يمزح
والحزن لا جانا يجي من جِدّه

اي والله المسكين هذا ابن أدم
يمشي بدنياء كل شيءً ضده

دنياء ترغّب له وهو يعشقها
وهي تبعّد كل شخص يودّه

كم شخص غالي للأسف فارقنا
وله غلا ما حدّه اللي حدّه

ماهو بغايب ذاك ذي با يرجع
لكن ذي ما له طريق تردّه

واحنا على دربه نسير ونمضي
والواجب ان احنا نعدّ العدّه

https://t.me/hatemalskkaf1997

حاتم السقاف