#ketmoqdaman

Ertalabdan yo‘lga bo‘ldim shay,
Sog‘inibman yurtimni yomon.
Quvonchlarim ichimga sig‘may,
Ketmoqdaman Andijon tomon...

Topilganda yurakka imkon,
Sog‘inmoqlik kuylarin chalar.
Ko‘z oldimda bo‘lar namoyon,
Bolaligim kechgan ko‘chalar...

Bormasimdan hali uyimga,
Ko‘chalarni kezdim xayolan.
Yetolmasdan oxir o‘yimga,
Qolaverdim xayollar bilan.

Ko‘ngil ketar juda entikib,
Qo‘yib bersam yugurib ketar.
Ko‘zlarimni oynaga tikib,
Borgunimcha manzilga yetar...
Ko‘ngil...

✍Abduvosit ABDURAHIMOV