Gʻalati isyon

Ikki oyoq, bu yaxshi,
Bir-birini tortadi.
Ikki qoʻl ham qarashib,
Yukni yengil ortadi.

Ikki quloq degani,
Ogohlikka daʼvatdir.
Ikkita koʻz ekani —
Ikki dunyo hayratdir.

Ikkita lab, o, buning,
Hikmati koʻp, ishi koʻp.
Ikki jagʻdir lek uning,
Bahamjihat tishi koʻp…

Bari durust, Xudojon,
Bari uchun shukrim bor.
Faqat soʻrsang bitta jon,
Hamda bitta fikrim bor:

Sen-ku saxiysan, bu chin,
Kim u qaramlik qilar.
Ikki qarich til uchun,
Bitta bosh kamlik qilar...


@jaloliddinsayid