🔸چیرۆکی زەردەواڵەکان لە ئێوارەی چوارشەمەدا
لە کتێبی قەڵای ڕاز؛
🔸ژیلا حسەینی
بەشی 1
ــــــــــــــ
پەنجەرەی ژوورەکەی بەرەو هەیوان کراوەتەوە.
چەن زەردەواڵە خۆیان ئەکەن بە ژوورەکەیا، بە گیزەگیز ئارامی و بێدەنگی خەیاڵی ئەشکێنن.
ــ دایە.... دایکم کوانێ؟
ــ لە مەتبەقە. بۆ چیتە؟
ــ گوێ لە دەنگمان ئەبێت؟
ــ نازانم ... بۆ ڕۆڵە گیان؟
ــ دایە تۆ گوێت بێنە... ئەڵێم ... ڕاستە دایکم شووی کردووە؟
کسپەیەک بە دڵیا هات و دڵۆپێ فرمێسکی گەورە ئەخوشێتە سەر گۆنای و بە لای لووتیا ئەچۆڕێتە سەر لێوی.
ــ ئەمە بە لای خۆتەوە چپەت کرد؟
خۆ گوێت کەڕ کردم.
ــ ڕاستە؟
ــ بەڵێ، تۆ ئیتر لای دایەی خۆت ئەبی.
ــ زۆر گوناح ئەبم.
ــ بۆچی ڕۆڵە وا مەڵێ دایکت گوناحە، با شوو بکات.
من زۆر پیرم. نەوەک بمرم بێتوو بمرم لانشینی لای برا و براژن ئەبێت.
ــ ئەی کە تۆ مردی من چی؟ منیش لانشین ئەبم.... دایە لانشین یانی چی؟... کێ بەرگم ئەشوات؟ کێ خواردنم پێ ئەدات؟
ــ خواگەورەیە... جارێ نامرم هەتا تۆ نەبی بە پیاوێکی گەورە.
با مانای لانشینیش هەر نەزانی.
ــ دایە خوا گەورەیە؟
چەندە گەورەیە؟
ــ زۆر... ڕۆڵەگیان.... زۆر.
ــ لە ماڵیش گەورەترە؟
ــ بەڵێ.
ــ چی لە ماڵ گەورەترە؟
ــ نیشتمان.
ـــ چی لە نیشتمان گەورەترە؟
ــ دنیا
ــ دایە چی لە هەموو شتێک گەورەترە؟
ــ خوا ڕۆڵەگیان... خوا لە هەموو شتێک گەورەترە.
ــ من دایکم بە قەد خودا خۆش ئەوێ.
دڵی گووشرا و فرمێسکەکانی خوڕتر بوون.
ــ باشە ڕۆڵە کفر مەکە... ئەگینا خواگیانی کوێرت ئەکا!...
ــ دایە ... باوەیش دایکی خۆی خۆش نەویست، بۆیە کوێر بوو؟
ــ نا ڕۆڵەگیان، باوە چاوئێشەی بوو.
ــ دایە ئەگەر دایکم شوو بکا،منیش لە گەڵیا شوو ئەکەم....
✅درێژەی هەیە
@Jilahosaini
