أهلاً ، كيف حالك اليوم بلايا ، مازلت متذكرني والا خلاص نسيتني ؟ ، مازلت ترايفلي والا غيري لهاك عني ؟ ، مازلت تفكر فيا والا غيري شغل تفكيرك ؟ ،
عموماً ، أنا نسيتك ومعش نرايفلك ومعش نفكر فيك ،
بس منسيتش ضحكتك ، ومازلت نرايف لصوتك ، ومازلت نفكر ف كلامك ،
أنا نسيتك انتَ ، بس مقدرتش ننسى الحاجات اللي يحبهن قلبي ،
أنا نسيتك أنتَ ، بس مقدرتش ننسى ذكرياتنا وأي حاجه جمعتنا ،
باهي أنتَ قدرت تنساهن ؟، الباين انك نسيتهن ! ،
باهي عادي تقولي شن اللي انتَ درته وانا مدرتاش ؟!،
والا انا عندي قلب وأنتَ قلبك مات ؟! ،
منبيش منك شي غير أنك تقولي من وين جبت قدرة النسيان هذي ؟!، كيف قدرت تتخطى كل شي بسهوله ؟!،
أنا نراجي ف ردك جاوبني ، جاوبني و عطيني من قسوة قلبك عشان نقدر نكمل حياتي عادي زي ما أنتَ درت ، ارحمني وجاوبني !.