متعني مشاي والزهره وياي
لحسيني ملهوف .. اركض ركض جاي


لزيارة حســــين شديت الحــــزام
وبدربه هاليــوم هميت الاجـــدام
بيه اشكثر شوگ والصحنه محتام
محبـــوبي وهوا وبيه ارفــع الهام

يمته اوصل الباب … واشـــتم التراب
لبن النبي اليوم … اركض ركض جاي


تمشي ام الحســين وي ألي يمشون
اوياكم علي اتصيح يا مــن تتعبـون
هل مسـعه ميضيع وباچر تشوفون
عشاق الحســــــين هـمه اليفـوزون

كلشي احنه عفنا … وگبرك گصـــدنا
بيك اني مجنون … اركض ركض جاي
*

ابدربك يمولاي خطواتي تسبيح
بسمك حسيـنا كل زاير ايصيح
هبينه يحسين چـن هبت الريح
مرتفعه للغــيم رايتنه مطيــــح

نزحفلك ازحوف ... وبكبرك انطوف
بكل همه وصرار ... اركض ركض جاي

ســدينه البيــوت وعفنه الاهــالي
مشــــايه اجيناك انــي وجهــــالي
كل همنه نرضيك عدنه انته غالي
من دون الدروب دربك حــــلالي

يا جنـــة اللـه … دربك مشيناه
مابيه تعب دوم .. اركض ركض جاي


ضحينه يحسين مـن اجـلك ارواح
متهمـنه الجروح نسحگ عالجراح
ابدربك يمضلـوم من نمشـي نرتاح
حبـك هُدى ونور وللجــنه مفتــاح

يا منقذ الناس … يا رفعت الراس
ليك انه بدموع ... اركض ركض جاي
*

الخادم
كامل السعيدي

https://telegram.me/joinchat/CeHakD_QN04Rx7L1XpqRiA