الشاعر محمد حسن ضيغم

يا مظلومه يا زينب
يا مهضومه يا زينب
ـــــــــــــــ
ها يمن شفتي مأسي وشفتي انواع البله
اليوم اجيتي ها يزينب عالنياك الكربله
الشام آ يالشام ويلي منّه صرتي امعلعله
للطفوف بكَلب ذايب جبتي هاي العايله
يا محرومه يا زينب
يا مهضومه يا زينب
ـــــــــــــــ
يساعد الله اشكَد حملتي من مصايب والقهر
السوط يم الخدر والله بالمتن تارك اثر
شلون حالج يالحنينه وعفتي عالشاطي الكَمر
من مشيتي ها يزينب ادري بالحامي اعتذر
يا ملجومه يازينب
يا مهضومه يا زينب
ـــــــــــــــ
اليوم كل الناس اجتّج بالدموع الهامله
كصدتج مشايه والله وانملت كل الفله
وياج يم الخدر كلله مشي كَصدت كربله
تواسي ضعنج وبمهجهه الضعن ضل تستقبله
تملي الحومه يا زينب
يا مهضومه يا زينب
ـــــــــــــــ
كلله اجت مشايه تلطم والحزن جمره يشب
تدري بيج بهل ليالي جيتي من ديرة غرب
والمدامع ها يزينب وي دمع عينج تصب
تلكَّتج تنطي اليتامه وشايله ماي الشرب
يا مالومه يازينب
يا مهضومه يا زينب
ـــــــــــــــ
الرايه رفّت يالعقليله الرايه يعني ماهوت
وصوت من طف المصيبه الليله زينب عوّدت
ليش بت حيدر اسيره للغرب تالي مشت
ضاميه مثل اليتامه كَطره وحده ما روت
الطف ويومه يا زينب
يا مهضومه يا زينب
ـــــــــــــــ
الشاعر محمد حسن ضيغم

يا لبة حشاي ... شلون اشرب الماي
ضامي وعلى الغبره طحت ... وبكترك الشاطي ومتت
-----
ياكوثر الله بكربله ... وقدسيّة الماي
معقوله تعطش يالولي .. وتنادي يضماي
تتكّلب انت من العطش .. يمضوّي دنياي
هالفاجعه ما تنعقل .. ماتنعقل هاي
بيدك صفه الكون ..تضل ضامي شلون
يخويه بمصابك حرت ... وبكترك الشاطي ومتت
-----
جاري النهر ينبع عذب ... وبكَلبك النار
وتتحمل اسهام العطش .. عينك عالزغار
ياماي ليش وياسبب .. تخليني محتار
لا تطفي خيمه ولا عطش ... لتغسّل اوذار
لا خمّدت نار ... لا ساكَي الازغار
بهل حاله خويه اتحسّرت ... وبكترك الشاطي ومتت
-----
طف المصيبه اشجم سهم ...صوبلي الروح
ياهو الي مثلي بكربله ... دم دمعي مسفوح
بجروح اداوليه الجرح ... وتتكاثر جروح
مرتين اخيي منذبح ... احاه يمذبوح
بسيف العطش مات ... وسيف العبد لات
مثلك ابد لا ماشفت ... وبكترك الشاطي ومتت
-----
شجم دوب تحمل ياكَلب ... لا موسهل دوم
ضامي الجبد تالي بسهم ...نصاب وجره ادموم
المحروم من ماي العذب ... ما يبقى محروم
بس الغريب بكربله ...مارحمته الكَوم
رغم العطش حيل ... ضل تسحكَه الخيل
أي وي مصابه اتصوّبت ... وبكترك الشاطي ومتت
ــــــــــــــــ
يم النهر حين الرحت .. عاتبته بدموع
ليش احرمت سبط النبي ... وخلّيته مفجوع
هاذي سكينه اعله الجرف ... مهظومه وتلوع
يم النهر سمعت صدى ... تتكسّر ضلوع
يالعلكَمي ليش ... مايك روه الجيش
ومن مايك الغالي احرمت ... وبكترك الشاطي ومتت
ــــــــــــــــ
الشاعر محمد حسن ضيغم

يا قبلة احبابك ... مجدّي واجه ابابك ..عفّرني بترابك .. يامولاي
يا محبوبي
مدّيت الك ايدي
وناذرلك اوليدي
ودمه اوريدي
قبلتي .. ونعمتي ... وقيمتي .. الكَاهه بهل عزاء
ـــــــــــــــــــ
يحسين ابو اليمه .. يا رازق النعمه ...خل ابقى بالخدمه ... يا مولاي
يبن الزهره
بالمجلس انطيني
الضلعك تهل عيني
وتبجّيني
دمعتي ... وحسرتي ... جنّتي .. الكَاهه بهل عزاء
ـــــــــــــــــ
شما ابجي عالمنحر ... اسجد على المنبر ... وبالبيرغ اتعفّر .. يا مولاي
هاي الرايه
الشالاهه ابو فاضل
ومتعطره بالكافل
ودمع هامل
بفطرتي ... قرايتي ... ولطمتي .. الكَاهه بهل عزاء
ـــــــــــــــــ
دوم اقتدي ابفضه ... الخادم كبر حضّه ... بالمجلس اتوضَه .. يا مولاي
هاذا يقيني
كل مجلس وذكره
بي تحضر الزهره
وتجي نظره
غايتي ... وطلبتي ... خدمتي ... .. الكَاهه بهل عزاء
ـــــــــــــــــ
الما مجوي بخيامك ... مايعرف الآمك ... ولا حركَة ايتامك ... يا مولاي
العايش طفّك
تتجسد اكَباله
ضعن وسبي اعياله
وبجي اطفاله
والحرم .. والخيم ... والالم ... ... .. الكَاهه بهل عزاء
ـــــــــــــــــ
وبكربله اتأمّل .. زينب دمعهه الهل ... من وكَفت اعله التل .. يامولاي
صاحت خويه
خيمتنه حركَوهه
طفلتنه ضربوهه
وتولّوهه
تنادي اله ...العايله ... بكربله ... .. الكَاهه بهل عزاء
ـــــــــــــــــ
الشاعر محمد حسن ضيغم

يا غريبه ...عدله ميته ...عكَب اخوتج .. يالعقيلة
طف مصابج ..وكل عذابج .. بالمخيم .. والهزيله
ساعة الكَربت مماتج .. هملت دمعتج
ماكو اخوتج بس خواتج ... زادت حسرتج
ويلي من يبست لهاتج ... خويه جلمتج
يابو فاضل ..الليله اريدك ..عمري اشّرلي ابرحيله
جفّلني خويه ابرايتك بعطر الوفه خلّيني اشم
ـــــــــــــــــــــ
جلمه وحده ... البيهه روحج ... حيل ذابت ... وزاد المهه
بنت حيدر ... الهاشميه ... خارجيه ... يصير اسمهه
الشام آ يالشام ويلي .. اعظم مصيبه
عالخرابه ينوح ليلي .. محنه رهيبه
اكَبال شامت راح حيلي ... زينب غريبه
عليّه اشّر .. ضل يناشد ... منهو هايه ...السلّباني
لو كافل اليله عدل محد تجاسر عالخدر
.................
بدمعه نادت ... ها يجرحي .. الما تشافى .. بكل حياتي
من الولاده ... الدمعه تجري ... وتجوي خدّي ... والمماتي
بالمنيه وزاد العتاب ... عالفاركَوهه
عيونهه مشبوحه عالباب ... بلكَن يجوهه
يوسّدوهه بنص التراب .... ويشيّعوهه
الغربه صعبه .. بلايه والي ..لو لفت ليهه المنيه
ابلايه خوّان الاخت معروفه حتماً تنولي
ـــــــــــــــــ
زينب آنه .. البيّه تحلف ...وبيّه تفخر ... كل رسلهه
هيبة الله ... وغيرة امي ..بدار غربه .. الدمعه اهلهه
آنه ذيج المالي انشاف .. مرّه خيالي
السوط تالي ايورم الاجتاف ... يغيّرلي حالي
بين كومه اشباه انعاف .. وافكَد دلالي
العالي كَدري ..ضاع خدري ..وصار اسمي .. ام المصايب
خلاف الترفرف رايته اركب هزل ياحسرتي
ــــــــــــ
من اغمض ..عيني لحضه ...يرجع الطف.. والمئاسي
من المخيّم ... للشريعه .. ركضه وحده ... وشاب راسي
شلون انسه اجفوف العضيد .. لو دم عيونه
لو شمر من حز الوريد ... وغيّرله لونه
وبالحبل من جتفوا الايد ... والله ولونه
ساعه امشي .. ساعه اعثر ...وعين اديرن ... للشريعه
يامن اجيت ابشيمتك بعدك شمر يحدي الضعن
ـــــــــــ
الشاعر محمد حسن ضيغم

ها يجده ... انه من الشام اعتنيتك
ها يجده ... كالوا مسمم واجيتك
يبو الكاظم لاتون
هاي آنه ام الحزن
ــــــــــــــــــ
صوت من الكاظم ينادي بهظيمه
سمموا والدي يا عظم الجريمه
محنة الصادق صفت كلش اليمه
تيتمت اولادك وآنه يتيمه
ها يجده ... من سمعت آنه ونينه
ها يجده ... من الكبر جيتك حزينه
صحت يبني لا تعن
هاي آنه ام الحزن
ـــــــــــــــــ
عفت كبري وأعتنيتك للمدينه
وعفت بت حسين مهمومه وحزينه
تصيح يا عمه الكلب زايد حنينه
وعن ابو الكاظم ارجعي وخبرينه
ها يجده ... والدك يصعب مصابه
ها يجده ... اتسمم وزايد عذابه
ذابل بشكل الغصن
هاي آنه ام الحزن
ـــــــــــــــــ
جيتك وجرح المتن للساعه دامي
وجبدي وي جبدة رقيه ال هسه ضامي
اسمع العالم ينادي يا امامي
وآنه وياهم صرت لطمي اعله هامي
ها يجده ...الشيعه ما يبرد جمرهه
ها يجده .... وجدتك فكدت صبرهه
الشوفته صرت انه احن
هاي آنه ام الحزن
ـــــــــــــــــ
حين شفتك والمدامع تجري عل خد
ها يجده وانت لابس ثوب الاسود
صحت صوت بحسرتي الله ولحّد
جبد ابو الكاظم وسف بالسم تمرد
ها يجده ....شعدهه ويانه المنايه
ها يجده .... وتشهد الحزني العبايه
شكثر كلبي ممتحن
هاي آنه ام الحزن
ـــــــــــــــــ
يم ابوك وروحي صاحت ها يجده
من كبر جرحه صحت مكدر انشده
جده ادري السم صبح كلش مضهده
خله يكعد لحضه وبجفك اسنده
ها يجده ... يا امام الجعفريه
ها يجده .... صوبك سهم المنيه
هاي اخر لحضه اضن
هاي آنه ام الحزن
ـــــــــــــــــ

الشاعر محمد حسن ضيغم

من احسين اجيتك ... جايبلك وياي
زاير واعتنيتك ... رايتي بيمناي
بجفوفي تربه
والدمع اصبه
ــــــــــــــ
زرت الحسين وجيتك بفيض دموع
آ يل بقيع وكلبي اصبح مفجوع
شوكَ الزياره .... وماكو مناره ....بس الاثر مطبوع
لاكَبر اشوفه .... وبروحي اطوفه .... بس الاثر مطبوع
بس اتراب اشوفك ...ماشوفن اكبور
بحيره شلون اطوفك ....دلالي مجمور
هل غربه غربه
والدمع اصبه
ـــــــــــــــــ
هل رايه بيهه عطر من كبر حسين
وخليت بيهه الاف من دمع العين
تعنيت ازورك ....واشتم عطورك ....ياويلي بس اتراب
والطمت راسي .... وانهد اساسي ... يا ويلي بس اتراب
ضلت ايدي عالخد ...وبوضعي محتار
كالوا انت غرقد ...يل بيك الاقمار
منبر انصبه
والدمع اصبه
ـــــــــــــ
يمك وكفت ويلتهب جرح الروح
واعله البقيع بهل كلب كثره جروح
كبر الائمه ....الظالم يهدمه ... وينحب حمام الدوح
بس صخره اشوفن .... يمهه وأنوحن .... وينحب حمام الدوح
حاير آنه ضليت ... وبكلبي حسره
ويلي بحركه ونيت ... يا صبر اصبره
ما يهده كلبه
والدمع اصبه
ــــــــــــــــــــــ
من كربله اتعنيت شايل جرحين
جرح الكمر عباس وي جرح حسين
والتربه بيدي .... وحسره ابوريدي ...وبين الكلب مكتوب
سجلني زاير ....وكل يوم اكابر ... وبين الكلب مكتوب
جنت بداري ازورك ... واهمل دمعتي
ويتراوالي نورك .... وتسعر جمرتي
هل مر اشربه
والدمع اصبه
ـــــــــــــــــــــــــــ
درت الوجه للزهره وأشكيت الحال
يالزهره ليش اكبور ولدج تنزال
شل هل مصيبه ... ها يلغريبه .... بخدي الدمع همال
منظر فجعني .... وحزني تبعني .... بخدي الدمع همال
يم الحسن ياحيف ... هدموا قببهم
لاجن كلبي للموت .... يبقه يحبهم
دهري اطلبه
والدمع اصبه
ـــــــــــــــــــــ
الشاعر محمد حسن ضيغم

مصابك يا امام الجعفريه
يذكرني بمصاب الغاضريه
تبجيني مأسيكم يمولانه
ــــــــــــــــــــ
اصفح بالمآسي ودمعي يتجاره
ومن الاعظم اشوفن روحي محتاره
لبو السجاد كلبي ما طفت ناره
وعلى الصادق ترك كل حزني اثاره
يبو الكاظم على مصابك ونيني على جدك صبغت اسود سنيني
عليكم ضلمه اشوفن والله دنيانه
ـــــــــــــــــــــــــ
الك لوعه بدليلي ولوعه من لوعه
بجيت وناظري ضل تهمل ادموعه
ذكرت شلون زينب تبجي مفجوعه
لمن شافت اخوهه مهشمه ضلوعه
مثل ما ونت ولطمت صدرهه وتمنت بالطفوف انطت عمرهه
يبو الكاظم الك هالروح حزنانه
ــــــــــــــــــــــــ
من اذكرك سيدي واذكر الم جبدك
اشوفن صوره تطلعلي الجبد جدك
اويلي السم يبو الكاظم بقه يضهدك
وابو طلبه يحط خده على خدك
وجبد جدك بالمثلث توذر وذر بالطف على الغبره تطشر
وبقه اعله الغبره ثلث ايام جثمانه
ـــــــــــــــــــــــــــــ
مثل مادم ابو السجاد احيى الدين
ولا دامت صلا لوما دماء حسين
يمولاي والك مذهب يكر العين
رحت والمثلك بحيره اجيبه منين
نصرت الباري وأحييت الشريعه فجيعه مصيبتك صارت فجيعه
الزمن بمصيبتك آلام راوانه
ـــــــــــــــــــــــــــ
اهل دمع النواضر واذكر مصابك
سهم صوب دليلي اصبح غيابك
مثل هاليوم انت اموسد اترابك
ويتيمه ابفكدك وماتهجع احبابك
مئآتم لجلك انصبت مئآتم ** يأصل التضحيه واصل المكارم
سهم فكدك سهم يالوالي اذانه
ـــــــــــــــــــــــــــــــــ

الشاعر محمد حسن ضيغم

فاطمه علصادق اتهل الدمع
فاطمه اتعنتله محنية ضلع
ــــــــــــــــــــــــ
اجت يم كبر ابو الكاظم اجت مهمومه محزونه
اندفن يمهه ابنهه وصار بمكان البيه مدفونه
نظرهه الهادي من وصلت وعليهه هملت عيونه
جفنهه اتجرّح بدمعة ومثلهه انجرحت جفونه
فاطمه وياهه النبي ضل منفجع
فاطمه اتعنتله محنية ضلع
ــــــــــــــــــــــــ
هاي ام الحسن تنحب كصدت يم ابنهه اتنوح
يل صادق تكله شلون دم جبدك صبح مسفوح
ياروحي ونظر عينياي يل جرحك لجلملي الروح
مسموم وجبد دامي عن الدنيه هيجي تروح
فاطمه ونتهه ضلت ترتفع
فاطمه اتعنتله محنية ضلع
ــــــــــــــــــــــــ
تكله يبني يل صادق مصابك يبني ذكرني
بمصاب الحسن احاه يوم الصحته ا يبني
وبالسجاد والباقر يل لجمه الي تفجعني
يادهري شجني وهيج سهمك ضل يصوبني
فاطمه بيها الحزن ضل منطبع
فاطمه اتعنتله محنية ضلع
ــــــــــــــــــــــــ
يا جرح البقيع شلون تبقه بهل كلب دامي
انه ام الحسن بالهم حيل انصبغت ايامي
ولدي بلا كبور شلون اشوفن هسه جدامي
عفيه وما طحت علكاع لانهن ناحله اجدامي
فاطمه هل محنه لا ما تنجرع
فاطمه اتعنتله محنية ضلع
ــــــــــــــــــــــــ
بين اربع اكبور اتحوم ويم كل صخره تجرع هم
تنادي يا من اعداكم سكوكم يالولد بالسم
لجلكم يا مناي النوح وطك ضلعي ويسيل الدم
كبر كل واحد اتذكره بحقاد العده اتهدم
فاطمه جروح ابفكدكم تتسع
فاطمه اتعنتله محنية ضلع
ــــــــــــــــــــــــ
الشاعر محمد حسن ضيغم

شما يطر فجر الله الك نادينه
عجّل الله فرجك مهدينه
------
وي كل طرت فجر نقره الدعاء
ناطرينه الفرج يا رب السماء
يبو صالح يمته توصل كربلاء
النصرتك ياسيدي اتنادينه
-----
عجّل الله فرجك گمنه نصيح
گوم واخذ بثار ابو اليمه الذبيح
گوم خلي ايصلي مأموم المسيح
شيعتك واناطر اتحامينه
-------
ياملاذ الكون يا ريع الربيع
گوك اخذ ثارات عبد الله الرضيع
گوم وابني بچفك اكبور البقيع
وصلي بينه هناك يا والينه
-------
عجّل الله فرجك صار النشيد
وبدربكم شوف عدنه اشچم شهيد
احنه اسياد اوفلا نصبح عبيد
شلون نقبل رجس يحكم بينه
-------
يابو صالح ي امامي يا غيور
وين گبر الزهره خل نكصد نزور
عل ظلم وياك خلينه نثور
ونسحگ خشوم الذي ايعادينه
-------
الشاعر محمد حسن ضيغم

رايه رفت بالسمه
ويلي مهجة فاطمه
مولانه مولانه
----
هاي رايه للمصيبه تعلن ايام الحزن
الصادق السمو جبدته عليه دلالي يون
بالبقيع شلون جسمه الطاهر ايضل يدفن
هذا مهجة حيدره ... صار جسمه بالثره
مولانه مولانه
---
اليوم كل اهل المدينه تبچي لمصابه وتنوح
ولجل جرك الصادق اتضل بالخلك كثرة جروح
لو يصح من عدنه والله ينطي اله كل شيعي روح
ولا يضل بين الترب ... فگد ابو الكاظم صعب
مولانه مولانه
-----
رايه بيهه ادموع حمره دموع من دم صايره
وهاي فاطمة الزجيه عليه ضلت حايره
نار گلب الشيعي ويلي عليه ضلت شاجره
لابس اسود ضل عليه ... يلطم الراس ابأديه
مولانه مولانه
-----
بالبقيع اليوم نسمع صوت من ام البنين
على الصادق ضل گلبهه ويلي مهموم وحزين
سمعت بچبدته تسمم ويلي صاحت ياحسين
حسين ذكرت جبدته ... شلون نبله صابته
مولانه مولانه
----
مثل جده الحسن والله ومثل زين العابدين
ومثل جبد الباقر اصبح مسمم وگلبه بونين
هذا حال اهل الحميه بحقد ذوله المجرمين
مارعو عتره علي ... عدنه هم ما ينجلي
مولانه مولانه
---
الشاعر محمد حسن ضيغم

خلينه خلينه نودع الحيد خلينه
هذا امام الصادق المعروف والينه
ـــــــــــــــــــــ
خلي نودع الصادق الي سمموا جبده
امه الزجيه فاطمه وحيدر علي جده
سم الاعادي يا خلك من الاذه يضهده
بالسم بني العباس جبد الولي مكطعينه
ــــــــــــــــــــــ
سموا جبدته اهل الحقد واتحالفوا كلهم
ابليس ضد آل النبي ذوله العده كلهم
باجر جهنم بالحشر هل ناس تاكلهم
والحاربوا ال النبي حاربوا بارينه
ــــــــــــــــــــــــــــــ
خلي نودع الصادق ونهمل دمع عالخد
خلينه نلطم عالصدر نلبس الثوب اسود
خلينه نلعن كل شخص وهابي ومرتد
نبغض بني العباس كلهه ومن يعادينه
ــــــــــــــــــــــــــ
شيعة الصادق احنه واحنه اتباع هالمذهب
وباجر فخر النه العقيده هناك يم الرب
ياهو الي منهم باجر من الكوثر اليشرب
تنحرم كل هاي الخلك بس اليوالينه
ـــــــــــــــــــــــــ
مذهب الصادق مذهبي غصبا على العدوان
ابليس واليهم صبح واحنه ولي الرحمن
احنه تمسكنه بنهجنه العتره والقرآن
وخلي البدع لأهل البدع والحكم هادينه
ــــــــــــــــــــــــ


الشاعر محمد حسن ضيغم

بويه بويه وسفه جبدك سسموه
بويه بويه وسفه كلبك لوعوه
بويه بويه
ــــــــــــــــــ
بويه لجلك انه كل حيلي انهدم
من شفت جبدك نزل جدامي دم
بويه ما يحملني من اوكف جدم
بويه منظر فاجعه اكبالي انرسم
بويه بويه الهادي جدك مارعوه
بويه بويه وسفه كلبك لوعوه
بويه بويه
ــــــــــــــــــ
بويه ياهو المثلي ينظر والده
يلوج والسم حيل كلش مظهده
صحت صوت الوالي الله يساعده
حمل ضيم اوه من هاي العده
بويه بويه شلون شخصك حاربوه
بويه بويه وسفه كلبك لوعوه
بويه بويه
ــــــــــــــــــ
تلوج حيل اتلوج يا بن حيدره
وجهك اتغيّر بضيم الي جره
شرد اسويلك او روحي حايره
جبدك السم كصه وكلش وذره
بويه بويه فضلك اعدانه انكروه
بويه بويه وسفه كلبك لوعوه
بويه بويه
ــــــــــــــــــ
مثل جدي الباقر مصابك حصل
ومثل جبده جبدك اتكطع وصل
اه يوم السم لعد جبدك وصل
من اهروشه وبالالم ويلي انفصل
بويه بويه بيك كلبي الّموه
بويه بويه وسفه كلبك لوعوه
بويه بويه
ــــــــــــــــــ


شفت بيك الفاجعه وكلبي انفجع
ذاب كلبي الونّتك حين السمع
سمّتك يا بويه اتباع البدع
وانت نور ونور عل عالم سطع
بويه بويه شلون ابن يشوف ابوه
بويه بويه وسفه كلبك لوعوه
بويه بويه
ــــــــــــــــــ

الشاعر محمد حسن ضيغم

بالبقيع ومن وكف مهدينه
صاح ياجدي ودمعته ابعينه
يمته ابنيلك كبر .... تدري مليت الصبر
ـــــــــــــــــ
تعنه يم ارض البقيع بلوعته
وبلل اتراب البقيع بدمعته
لذن جده وصلاهه ونته
وناح مهدينه ونزعهه اعمامته
مثل امه فاطمه ..... بحركه علغبره ارتمه
يشم بترابه ويزيد اونينه
ــــــــــــــــــ
صاح يا صادق العتره شهل امر
سنين صار سنين باقي بلا كبر
آه يا جدي وحكك انتظر
امر ربي وانه لازمني الصبر
صاح والدمعه تهل ...... هل وضع لا موسهل
عدنه عصمه ونخضع البارينه
ــــــــــــــــــ
صاح ياربي متى يصير الفرج
ويمته اخذ ثار اجدادي الحجج
ويمته احيي بطلعتي هذا النهج
سيدي ومولاي ممروده المهج
يمته اعلن دولتي ..... وثار اريد العمتي
الضلت بطف كربله تنادينه
ــــــــــــــــــــ
دار عينه الفاطمه وناده بحزن
يمه يا زهراء وكليبه يون
هنا جم جد ليه يمه مندفن
شلون اصبر عل وضع وانه الابن
الهم ارد ابني صحن ..... وأذبح اولاد الفتن
من السقيفه الضلت اتعادينه
ــــــــــــــــــ
شما تطول الدنيه لو بس يوم ضل
اله اظهر وأذبح اولاد الدجل
وأرد اثبّت حي على خير العمل
واخذ بثارات كل هاي الاهل
كبل لا ابني البقيع .... اخذ بثار الرضيع
المات ضامي ومحنته اتبجينه
ـــــــــــــــــــــ
الشاعر محمد حسن ضيغم

اندب بصبح ومسيه
يا امام الجعفريه
آنه مشتاك ارد ازورك
ــــــــــــــــ
بيه شوك من الصبه يذوب الدليل
ومن كثر نوحه الكلب اصبح نحيل
ننطر ازيارتك جيل وبعد جيل
انادي بسمك والدمع عالخد يسيل
انت يل صادق امامي
انت كل عشكي وهيامي
يا وكت اشتم عطورك
ـــــــــــــــــ
سيدي يا ساعه اوصل واعتنيك
حافي امشي وتالي ازحف من اجيك
ذاب كلبي سيدي بنوحه عليك
انه ابنك سيدي وبّين اديك
كلبي لا ما تطفه ناره
اله احصّل هل زياره
ومن اشوف ابعيني سورك
ـــــــــــــــــــ
ارد اخبرك آنه هد حيلي المصاب
يمته بجفوفي اشيل من التراب
وابقه اشمّن واطفي كل جمر العذاب
يلي ما سدّيت مره ابوجهي باب
شما اكلك عندي شده
خالي جفي ما ترده
روحي او كلبي نذورك
ــــــــــــــ
امل عندي ومدري يتحقق مته
اكتب اعله الكبر بسمك لافته
رغم ال سعود بس حيدر فته
وصوت خافن كبل لا ما سمعته
رغم اتباع السقيفه
بس علي هو الخليفه
من علي الكرار نورك
ـــــــــــــــ


يمته اوكف وانظر الشيعه تزور
صحن حيل اجبير بي اربع قبور
والمناير للسمه اتشع حيل نور
ومجلس انسوي وندك اعله الصدور
واقره يم كبرك قصيده
عمتك زينب وحيده
الهيجّت بالطف شعورك
ــــــــــــــــــــــ
الشاعر محمد حسن ضيغم

اجيتك يالولد يبني اجيتك
لمن شفت الكَبر طايح بجيتك
يصب دمعي والم ضلعي على اوليدي
ـــــــــــ
تعنّيت بجرح دامي يضي عيني
اجيت وللبقيع بلوعة اونيني
جنت اتنّه يوليدي تلاكَيني
وعلى حالك يبو الكاظم تحاجيني
اجيت وأذكر مصيبة جبدتك .... لمن جيتك يضي عيني وشبكَتك
اختلف وضعي والم ضلعي على اوليدي
ـــــــــــ
يمن سمَك عدو الله بهذاك السم
وجبدتك يبني يالصادق نزيف بدم
عليك ارويحتي تجرع مرار وهم
وجروحي عليك يوليدي فلا تلتم
مصابك يلجم جروحي مصابك .... عذابي من اصل لوعة عذابك
خمد شمعي والم ضلعي على اوليدي
ـــــــــــ
اجيت من الكَبر يبني وشفت كَبرك
تهدّم يبني يالصادق مثل عمرك
نفسهه السمّتك يوليدي اتغدرك
مثل صبري صبح ها يالولد صبرك
تهدّم كَبرك أبأيد الاعادي ... ييمه وصوتي بسمك ضل ينادي
شكثر ادعي والم ضلعي على اوليدي
ـــــــــــ
مثل كَبر الحسن يبني الكَبر شفته
مثل يوم الاجيت الكَبره ما عفته
اجيت او ونّتي صارت صدكَ سكته
كسر ضلعي بمصابك يبني رجّعته
يضل ينزف دمه وحيل الّماني .... أنه الفكَدك صرت كلّش اعاني
اضل انعي والم ضلعي على اوليدي
ـــــــــــ
مصايب ولدي ماترحم غدت بيّه
اون اعليهم او ونّاتي مخفيه
ضلوعي من الالم يا ويلي مدميه
زماني جمّع هموم وحزن ليّه
مصيبه بكَلبي اتورّث مصيبه .... ودليلي ما يبطّل من نحيبه
الحزن طبعي والم ضلعي على اوليدي
ـــــــــــ
الشاعر محمد حسن ضيغم

اجت تبچي الزچيه اليوم وتنادي يضي عيني
يالصادق رحت مسموم بمصابك تأذيني
----
آنه امك وون عليك يل حزنك مرد روحي
يمك انتحب وابجي ومابطل ابد نوحي
لمصابك يصل يبني بگلبي تسعر جروحي
من اذكر الم چبدك يالصادك تبچيني
-----
مهمومه وعيوني اتهل يمك من احيت آنه
اندب يالولد يبني امك هسه حزنانه
دهرك ما رحم بينه بدونك وحشه دنيانه
كاس من الهم والمصايب دهرك ضل يروّيني
---
گول اليا سبب سمٌوك وانت ابن النبي الهادي
امك گصدتك يبني بحسرة وذايبه تنادي
من شفت النعش يبني ضل ملوّع افّادي
ما احمل مصاب وهم امك آنه تدريني
------
الشاعر محمد حسن ضيغم

ادري زينب وصلتك اخبارهه
كوم يالموعود واطلب ثارهه
ـــــــــــــــــــ
ادري وصلتلك مصايبهه السدت
عالتراب اخلاف اخوهه اتوسدت
بالاحبال جفوف اديهه اتشددت
اليمنه تنزف من تحرك ايسارهه
ـــــــــــــــــ
انت تدري شلون شافت علثره
اجساد اخوهه مطرحه فوك الثره
من مثل عمتك تبجي وحايره
ماتطفي اخيام شبت نارهه
ــــــــــــــــ
عمتك ماعدهه والي بكربله
تعاين اخوتهه ضحايه امجتله
بسوط والله اتوله زينب حرمله
اسياطه لسه اعله المتن آثارهه
ــــــــــــــــــ
بعينهه شافت خيم تلهب جمر
كعدت اعله الكاع واتون علخدر
اطفال من اخيمهه مذعوره وتفر
حايره بيمن تلم ازغارهه
ــــــــــــــــ
تعاين الاطفال ركبت عالهزل
زجر يضربهم بسوطه وما يمل
زينب مصيبتهه لا ما تنحمل
شالت احمول الصبر بكتارهه
ــــــــــــــــ
كوم اخذ ثارات زينب يالولي
لسه تتنطّر فزعتك بت علي
اتصير اريد الثار الي والكافلي
اذبح اتباع السقيفه وعارهه
ـــــــــــــــــــــ
☘ الشاعر محمد حسن ضيغم

Https://ⓣelegram.me/kasaedalatharDaygham

🔘غير مسامح إزالة التوقيع عند النقل 🔘

🍁القصائد الرثائية للآل الأطهار ع 🍁