የህገ-ወጥ የሰዎች ዝውውር ወንጀሎችን ለመከላከልና ለመቆጣጠር ለፍትህ አካላት ሲሰጥ የነበረው ስልጠና ተጠናቀቀ
*****
በኢ.ፌ.ዴ.ሪ. ፍትህ ሚኒስቴር ብሄራዊ የትብብር ጥምረት ጽ/ቤት ከአጋር አካላት ጋር በመተባበር የተዘጋጀውና ትኩረቱን ህገ-ወጥ የሰዎች ዝውውር ወንጀሎችን መከላከል ላይ አድርጎ ከተለያዩ ክልሎች ለተወከሉ ዐቃብያነ ሕግ፣ የምርመራ ክፍል መሪዎችና ለወንጀል መከላከል አባላት ለ6 ተከታታይ ቀናት ሲሰጥ የነበረው ስልጠና ተጠናቋል፡፡

በስልጠናው ማጠናቀቂያ ዕለት ከህገ-ወጥ የሰዎች ዝውውር እና በህገ-ወጥ መነገድ የተገኘ ሀብት ህጋዊ አስመስሎ ማቅረብ (Money Laundering) ወንጀሎች አኳያ የሚከናወነውን የሀብት የማስመለስና የፋይናንስ ምርመራ ስራን አስመልክቶ ስልጠና የሰጡት በኢ.ፌ.ዴ.ሪ ፍትህ ሚኒስቴር በወንጀል የተገኘ ሀብት ማስመለስ ዳይሬክቶሬት ጄኔራል ምክትል ዳይሬክተር የሆኑት አቶ የአለምታሪክ ሺመልስ በጉዳዩ ላይ ሰፋ ያለ ገለፃ ያደረጉ ሲሆን በዚህም ህገ -ወጥ የሰዎች ዝውውር ወንጀልን የሚፈፅሙ ሰዎች ዋነኛ አላማቸው ገንዘብ ማግኘት በመሆኑ በወንጀል ያገኙት ሀብት እንዳይደረስበት ለመደበቅ ንብረቶችን በመግዛት፣ ድርጅት በመክፈት ወይም በሌላ መንገድ ገንዘቡን ህጋዊ አስመስለው ለማቅረብ የሚሞክሩ በመሆኑ ህገወጥ የሰዎች ዝውውር እና በህገ-ወጥ መነገድ የተገኘ ሀብት ህጋዊ አስመስሎ ማቅረብ ወንጀሎች አንዱ በሌላው ላይ ተመስርቶ የሚከናወን መሆኑን መገንዘብ ጠቃሚ እንደሚሆን ገልፀዋል፡፡

ከዚህ ጋር ተያይዞ ፋይናንሽያል አክሽን ታስክ ፎርስ የተባለ የፋይናንስ ግብረ ሀይል ያወጣውን መረጃ በመጥቀስ ከህገ-ወጥ የሰዎች ዝውውር ጋር ተያይዞ በ2011 ሲንቀሳቀስ የነበረው 32 ቢሊዮን ዶላር የነበረ ሲሆን በአሁኑ ጊዜ ደግሞ መጠኑ ጨምሮ 150 ቢሊዮን ዶላር መድረሱን በማሳያነት አቅርበው በህገ -ወጥ የሰዎች ዝውውር ወንጀሎች ላይ ምርመራና ክስ ሲመሰረት በተጓዳኝነት ከበህገ-ወጥ መነገድ የተገኘ ሀብት ህጋዊ አስመስሎ ማቅረብ ጋር ያለውን ግንኙነት በጥንቃቄ ማየት አስፈላጊ መሆኑን አስረድተዋል፡፡ አያይዘውም ህገ ወጥ የሰዎች ዝውውር እና የበህገ-ወጥ መነገድ የተገኘ ሀብት ህጋዊ አስመስሎ ማቅረብ ወንጀሎች ድንበር ተሻግረው የሚፈፀሙና በተለያየ ደረጃ ግንኙነት ባላቸው አካላት የሚቀነባበሩ በመሆኑ ከዚህ አንፃር ኢትዮጵያ ያላትን ህግ ከአለም አቀፍ ስምምነቶች ጋር እንዲናበቡ አድርጎ ህጋዊ እርምጃዎችን መውሰድ አስፈላጊ እንደሆነ አስገንዝበዋል::

ዳይሬክተሩ አያይዘውም እስካሁን እየተሰራበት የነበረው የበህገ-ወጥ መነገድ የተገኘ ሀብት ህጋዊ አስመስሎ ማቅረብ አዋጅ ኢትዮጵያ የተቀበለቻቸውን አለም አቀፍ የፋይናንስ ስምምነቶች ባማከለ መልኩ አሻሽሎ በማዘጋጀት እንዲፀድቅ የማድረግ ስራ እየተከናወነ መሆኑን አስታውሰው፤ በዚህ ረገድ የፍትህ አካላት ውጤታማ ስራን ለማከናወን ከፊት በኩል ህጋዊ ድርጅት ከፍተው ከጀርባ ህገ-ወጥ የሰዎች ዝውውር እና የበህገ-ወጥ መነገድ የተገኘ ሀብት ህጋዊ አስመስሎ ማቅረብ ወንጀሎችን በተደራጀ መንገድ የሚፈፅሙ ድርጅቶች ሊኖሩ እንደሚችሉ በማሰብ ምንጊዜም ቢሆን አካባቢያቸውን በጥንቃቄ መመልከትና ክትትል ማድረግ ቢችሉ መልካም መሆኑን ጠቅሰው፤ ውጤታማ የሆነ የፋይናንስ ምርመራን በተቋማት ላይ ለማድረግ የሚረዱ ከቅድመ ግምገማ ጀምሮ፤ የወንጀል ፈፃሚዎችን ፕሮፋይል ስለማዘጋጀት፣ በኢንፎርሜሽን ቴክኖሎጂ በመታገዝ መረጃን መሰብሰብና መተንተን፣ ክስና ንብረቶችን አሳግዶ ለተጎጂዎች እንዲመለሱ የማድረግና ተያያዘዥ የሆኑ አለም አቀፍ የፋይናንስ ምርመራ ደንቦችን በዝርዝር አቅርበው ማንም ሰው በወንጀል ድርጊት በተገኘ ሀብት እንዳይጠቀም መከላከል የሚለውን መርህ አስጠብቆ መሄድ ወሳኝ መሆኑን አስረድተዋል፡፡

ከዚህ በተጨማሪም በህገ-ወጥ የሰዎች ዝውውር እና የበህገ-ወጥ መነገድ የተገኘ ሀብት ህጋዊ አስመስሎ ማቅረብ ወንጀሎች ላይ የቅድመ ጥቆማ ምርመራን ማድረግ የተፈፀመውን ወንጀል ቀድሞ በመረዳት ቀጣይ ተግባራትን ለማዘጋጀት፣ ማስረጃ እንዳይጠፋ ለማድረግ፣ የምስክሮችን ደህንነት ለማረጋገጥና፣ የታቀደውን አላማ ለማሳካት ጠቀሜታዎች ስለሚኖሩት የፍትህ አካላት ምን ጊዜም ቢሆን የቅድመ ምርመራ ዘዴን መከተል እንደሚገባቸውና ክልሎች እርስ በርስ በመተባበር መረጃን እየተለዋወጡ ምርመራዎችንም በጋራ መስራት የመቻል ልምድን ማዳበር እንደሚገባ ጠቅሰው፤ አክለውም ህገ -ወጥ የሰዎች ዝውውር እና የበህገ-ወጥ መነገድ የተገኘ ሀብት ህጋዊ አስመስሎ ማቅረብ ወንጀሎችን ወቅቱ በሚጠይቀው አለም አቀፍ የፋይናንስ ስምምነቶች መሰረት መከላከል ካልተቻለ እንደ ኢንተር ናሽናል ሞኒተሪ ፈንድ፣ ወርልድ ባንክ እና ፋይናንሽያል አክሽን ታስክ ፎርስ አይነት ተቋማት በሀገር ደረጃ የተለያዩ እቀባዎችን ሊያወጡ የሚችሉበት ሁኔታ ሊፈጠር ስለሚችል ከእነዚህ መሰል ችግሮች ለመጠበቅ ስምምነቶችን አክብሮ ወንጀሎቹን ለመከላከል ትኩረት ሰጥቶ መስራት አስፈላጊ መሆኑን አስገንዝበዋል፡፡

በመጨረሻም የስልጠናው ተካፋዮች የነበራቸውን ቆይታ በማስመልከት መድረኩ በርካታ ልምዶችን ያገኙበትና በቀጣይነት የሚሰሩበትን አቅጣጫ ያመላከታቸውና በቂ የሆነ ግንዛቤ ያገኙበት እንደነበረ ጠቅሰው አዘጋጆቹን በማመስገን አስተያየታቸውን ሰጥተው መድረኩ ተጠናቋል፡፡

ፍትህ ሚኒስቴርን የማህበራዊ ሚዲያ ትስስር ገፆች ይቀላቀሉ
Telegram
https://t.me/lawabelethio