مش ملاحظين انه عندنا تهاون كبير في اهم ركن من اركان الاسلام واللي هوا ( الصلاة )

لما نشوف البنات زمالطو وظوافر طوال ، نقعد بيني وبين نفسي نقول زعما تصلي !

زعما تمسح في زمالطوها لكل صلاة وتصلي ؟
ولا ما تصليش وما تفكرش انها مرات في لحظة تموت

ونقعد ندعي في داخلي ربي يهديها ويصلح حالها

ولما نطلع نشوف لبس البنات كيف نص الشعر طالع وسراويل مشحطة وصنة تشميها من بعييد ، نقول توا هاذي كيف تصلي ؟

تقدر توقف علي الصلاية بحوايجها هاذوا وتصلي بيهم !

ونقول باهي لو تصلي ويبدوا مثلاً طالعين من الصبح للعشية او من العشية لليل ، وين تصلي وكيف ؛ ولا عادي الصلاة كإنه مش مهمه وتروح تجمعهم كلهم مع بعضهم

ما تقوليش لا مفيش حل ووين بنصلي ، ان شاء الله ادرسي علي محل وقت الصلاة وتطلبي منه يخليك تخشي لمكان وتصلي

راهو الصلاة صلة العبد بربّه

وللأسف بدينا مسلمين بالاسم بس لان ظاهرة ترك الصلاة بدت منتشرة بشكل كبير بين الاولاد والبنات كبار وصغار

اجمع العلماء علي انه تارك الصلاة كافر .

وما تقوليش لا كيف تكفريه ووو لان العلماء مستدلين بالاحاديث والآيات القرآنية

فلهذا تشوفوا في الدنيا كيف اغلبها بدت حزن وهم وغمّ وهذا بسبب ذنوبنا

جاهدي في نفسك واثبتي في صلاتك وديما ادعي ( اللهم يا مقلب القلوب ثبت قلبي على دينك )

حتكوني أم وحتكوني قدوة لصغارك ، وتاخذي اجرهم لو علمتيهم الصلاة واخلاق الاسلام ؛ ولو كنتِ متهاونه حتاخذي اثمهم .

ربي يهدينا ويصلح حالنا يارب ❤️.