MJ nofilter

Siz ham yaqin o'rtog'ingizdan shunday og'riqli, LEKIN haq gapni eshitib "attang" demoqchi bo'lmasangiz, hayotingizni to'g'ri rejalang. Bor imkoniyatingizdan to'lig'icha foydalaning.

Tunov kuni bo'lgan ish.

Diskleymer: Yozadigan narsalarim nolish emas. Holatga obyektiv qarash.

===

Litseydagi kursdosh o'rtog'im bilan mashinasida gaplashib ketyapmiz. "Bir gap aytsam, xafa bo'lmaysanmi, Jovoh" deb gap boshlab qoldi.

"Jovoh, agar o'qishga, universitet hammasiga ketkazgan vaqtingda mashina ustasi bo'lib ishlaganingda ham hozirgidan ko'proq pul topayotgan bo'larding, bilasanmi?

Mana falonchi (boshqa kursdoshim) ham basseynga kafel teradi, pod klyuch basseyn qurib beradi. Shu o'rtog'imiz ham sendan ko'p pul topadi".

Aytgan gapi 100 foiz to'g'ri edi. Ortga qarab qilgan ishlarim haqida o'ylab ko'rsam, o'rtog'im bor gapni aytdi. Kam pul topdim/topyapman.

Universitetdagi, turli kurslardagi o'qishim, bilgan narsalarim bilan potensialim hozirgidan ancha ko'p narsaga yetib bera olardi, deb o'ylayman.

Shuning uchun qilinadigan mehnat va undan oladigan kompensatsiyam nisbati oldingi ishlarimga qaraganda ancha yaxshi bo'lgan yo'nalishlarda yurmoqchiman buyog'iga. Passiv daromad yo'llari haqida ham o'ylaganman.

===

Dasturlashni o'rganishga qiziqayotganlarga aytadiganim: hamma-ham dasturchi bo'lishi shart emas. Agar hozir qo'lingizda biron hunaringiz bor bo'lsa, o'sha ishning eng zo'ri bo'lishga harakat qiling. Yaxshi ishlab turgan joyingizni tashlab dasturlashni noldan o'rganish minusingizga ham ishlab qolishi mumkin.

Dasturlashga ketkazadigan vaqt va pulingizni o'z sohangiz ustasi bo'lishga sarflasangiz, muvaffaqiyat ehtimoli ko'proq bo'ladi.

Dasturlash sohasiga kirmoqchi ekansiz, biling: yildan-yilga kirish darajasidagi mutaxassis uchun so'raladigan talablar ham ko'payib boryapti. Yetkazib o'rgana olasizmi? Siz avval so'ralgan 5 ta narsani o'rganib tugatguningizgacha yana 3 ta yangi narsa qo'shilmaydimi talablarga?