قبل فترة صاحبتي رسلت لي مسج وهي مبسوطة و قالت لي : " أوبة انا ركبت تقويم! "

قعدت كم دقيقة بفكر هي عملته ليه ؟!

بصراحة ما حصل لاحظت إنها محتاجة ليهو ،
كل البعرفه انه ابتسامتها جميلة .

بعد ما رسلت لي صور و ركزت فيها حسيت انو فعلاً هي محتاجة ليهو و ح يحلِّي ابتسامتها أكتر 💙

كبشر ما فينا زول كامل ،
لا في ملامحنا ولا في صفاتنا ،
لكن لمن نكون مع ناس بيحبونا
حب حقيقي ما حيكونوا شايفين فينا
إلا الحاجات الجميلة و المضيئة ،
حتى جوانبنا المطفيّة
بيساعدونا عشان ننورا
و نغيرا ، بس ما بيعايرونا
بالضلام اللي فينا!

الزول اللي زعزع ثقتك
في نفسك دا عمره ما حباك بجد ،
و الزول الخلاك تتفحَّص
ملامحك مية مرة
دا ما زولك الحقيقي ..

ناس كتار بيعاينوا على
علاقات من برة و بيدوا
نفسهم حق إطلاق الأحكام ،
دا بيحبها كيف هو أوجه منها؟!
دي متحملاهو كيف و هو
عصبي و انفعالي؟
دمها تقيل ما عارف بيحب فيها شنو ؟
و في الحقيقة البيحب زول-فعلاً-
بيقدر يشوفه و يتعامل معاهو
بطريقة ماف زول تاني
ح يدركها .

الحب ما أعمى تماماً
لكن بيشوف الحاجات الجميلة ،
و حتى الحاجات القبيحة بيشوفها كمشروع
جمال قادم 💙

الحب هو مستحضر التجميل
الوحيد المافيهو غش!
و الوحيد البيستعملوهو
معانا ناس تانيين ما بنعمله
نحن! 💙

#مآب_محمد "كائن المآب"