مِزاجُهُ من تسنيم ?

كعادتي حينما أسلك درب اللقيا
أتأنق قدرما أستطيع ..
هاك أحرفي .. ( نقِّطِيها ياخ)
..
.
..
وأنا جاي عليك
يا الفي الأحلام
إقترح الشارع
نلد (الضو)

صنقعت على النجمات
في سلام
شاكسني نسيمك
وأكل الجو

نتشني سموم
الحال العام
نشلتني من
الكون الإحلو

شمرت الحق
سليتو حسام
في البلد العدمت
ريحة نو

قدامي الأمم
الفاتو دريش
إتخاذلو
ضاقو الذل أصناف

الحللق فيهم
خسر الريش
الحي والمات
إتجازو شناف

ما ورثو غير
نقة وحرريش
للروقو
بي ال عبد مناف

الباطل فينا
مربي كريش
والحق إتوارى
ولا بنشاف

يا نجمة ..
أوعاك لا تتغابي
في الحوبة
النحنا ضراعاتها

الكاكي الجاك
لونو (تُرابي)
ده الجاب
للوجعة مجاعاتها

ناوليني بإيديك
حِرابي
أنفضبو
قواسي نزاعاتها

ينمد لسان
شعري الصابي
يكشف للسلطة
قناعاتها

وأنا جاي عليك
داهني خفوت
تلديني موسمبك
ضاوي

علمني هواك
يا نجمة أجوط
على (خطو)
إذا غلط (الراوي)

ما ضر (العاقل) ..
إنو يموت
يتضارى من الموت ..
(الهاوي)

أنا جايك (حق) ..
والبينا شروط
أملاك ..
وتنسيني الخاوي
..
.
..
21/1/2018
#رمَّاح_إبنعوف

مرت مراكب نوح محمله بالجيوش..
ركعت علي الموج الجنود
من كل جندي تفوح ضحييه.
ودم مشتت في الابد
فريت جبهتي من السجود
بكا في مخاض الخوف ولد
اشتبهو فيني ورا الجبل
شافوني دسدست الهداهد بالزبد
صفا انتباه وقعت من الهدهد بلد
نهبوها واتقسمو الحدووود

🤘🤘🤘
عاطف خيري رضي الله عنه .. بما لخصه عن بلادي

أتعرف معنى أن اتقبلك
بـكل مافيك من سوء , وأخرجك من دائرة الشك التي كُنت تسبح فيها وأمسح كل غبار الأيام عليك ..و تخذلني ..
أتعرف معنى ذلك?

#نســرينة

الكيزان يعيقهم ربي وين ما اتخفو
ويصلح ربي حال بلداً خلايقو اتحفو
بين ناس الحكومة وبابا قاسم وكفو 
وبين سعر الرغيف الماف وقفات صفو

السكر صبح غالي ولقا السوق جف
بعد مو غالي معدوم م بتلحقو كف
نشف ريق المواطن وجف وحالو وقف 
والكوز الغشيم ما فاضي من السف


الحكام قبلكم مافي واحد دام 
هوي بتموتو كان عمرتو الفين عام
غرقانين عنب يافا وكمثرى والشام
وناسين الله يمهل والغريق قدام

الكيزان بعد سرقو البلد هين هين 
بالايات يتاجرو وفجرو باسم الدين
هم يبنو العمارات في البلد فارهين
ونحن عقاب ولا حيين ولاميتين

الكوز عارفو مليان بالنفاق قدومو
كرشو كبيرة بي حق غيرو مالي جضومو
عامل فيها داعية خير وقال ماونلومو
والكوز كرشو مليانة ويقولنا صومو

اكلو العيش قبل ما الناس يعجنو عجينو
وسرقو قروش يتيم ما راعو لي ميتينو
اكان بي يدهم سودانا الله يعينو 
بعد ما يشربو النيل كلو يلحسو طينو

الكوز ضيفلو برضو مطففين الكيل
وبشر كل مجرم بالثبور والويل 
شيوخ الدولة ناس الاحتكار بالحيل
دين الله بريئ من كل افعال ديل

الكوز اللبس ديباج ومشا يتكبر
قال للمعدم العريان اخير تتصبر
بلدنا بقولها للباغي الضميرو مغبر
ان مارحتو كسرها مستحيل يتجبر

الكوز السمين قال ليكم الجوع طيب
اعملو رجيم السمن الكتير مو طيب 
الجوع ان بسوقكم للمقابر طيب 
والشبع ان بكون للموت علاج موطيب

يقويك الله يا سودانا ضنبك رق
عود شعبك بطقطق فوقو مية شق
الشيخ البكذب ومابقول الحق 
والكوز والمعارضة كلو ظق في ظق

بين الكوز وبين العارضوهو تلاقي
دعيت ما يبقا في الساسة المنافقي باقي
بعد ماخلو كل زول بالعدم مو لاقي 
متمنين نموت يا الزين ويرثو الباقي

الكوز في اكل مال غيرو ابدع فنو
مسكين المواطن في المصايب الجنو
ماغايظني كذب الكوز وشرو وظنو 
الغايظني زول مظلوم بدافع عنو

مسكين المواطن غالبو رقعيع خرقو
والكوز السمين من غيرو ظاهر فرقو
الكيزان عديل سرقو المطر من برقو
واحزاب المعارضة يلقو فرقة بسرقو

ما الكيزان براهم في البلد خير قلا
التجار حرامية الشريف بنذلة 
كترو المرتشين كترو اللصوص يابلة
بعد خربونا نحنا اضفنا للطين بلة
#أحمد_أمين