بسم الله الرحمن الرحيم

#ثگيل

[ وِداع الغالي ]

وِداع الغالي يِترِك جَرِح غالي
يرجّع ذكرياتك واللّيالي

والفاركَ حبيبه ... يرتاح بنحيبه
_

مِن وادعته هلّت دمعة عيوني
وتغيّر نَبُض كَلبي مو فقط لوني

تشابكَنه وبجينه وطحنه فوكَ الكَاع
وتغيّر وضِعنه
ولحظات الموادع تُمُر حيل بساع
ما ترحم دمعنه

وحكَ اللّي بكسرها اندبت فضّة
عُمُر نَوح بوداعه جنّه لحظة

المَر بهالمصيبة ... يرتاح بنحيبه
_

مادري شلون راح اتحمّل فراكَه
يَمّه وآنه احس بروحي مشتاكَة

طلعت روحي لمّن طِلَع منّي حسين
واشعر كلشي غايّب
بيها شكَد سوالف بِالِوداع العَين
تفهما الحبايب

ترك خِلّة برحيله يسدها موتي
أحجي بدمعي لو أحجي بسكوتي

والضيّع طبيبه ... يرتاح بنحيبه
_

ما متعودة يوم حسين ما شوفه
راح وعيني ظلّت لازمه جفوفه

مشه وكلمة [تعال] انطبعت اعله اشفاي
لكن ماكو رجعة
ودّعت العُمُر وتبدّه مِثل الماي
خلّص دمعة دمعة

شكلين الدمع وكَليبي مشتاكَ
أكو دمعة ملاكَه ودمعة افراكَ

الما ياخذ نصيبه ... يرتاح بنحيبه
_

أجر ابّالي حتّه يطول بوداعه
قارب أمنياتي تيّتم اشراعه

رسى بساحل حياتي الحزن واللّوعات
والهَم والأذيّة
عِشرة اويه الدمع ما أعرف الضحكات
مِن ضيم العليّه

بوداعه الدمعة مثلي تكَوم واطّيح
سنيني شموع والطف عاصفة ريح

وجم عيسى بصليبه ... يرتاح بنحيبه
_

مِن يوم الزجيّة ليومي مقهورة
بلا بسمار احس ظلوعي مكسورة

عشت عصرة وكسُر وبروحي تسعر نار
منها شكَد اعاني
سهم افراكَه ما يتقارن ابّسمار
يذبح بالأماني

ما يسوه العُمُر مِن دون الاحباب
عصرة روحي اشد مِن عصرة الباب

والروحه غريبة ... يرتاح بنحيبه
_

خلصت وانتهت عِشرتنه بالونّة
ظَل عندي الأمل نتلاكَه بالجَنّة

موعدنا اعله حوض الكوثر آنه وياه
يتجدّد لقانه
وويّه الشيعة باجر بالحَشُر ننعاه
ما يخلص عزانه

مجلس بالقيامة انّصبه وانّوح
ويجي حسين ونشاهد نحره مذبوح

وكَلبي الكلّه طيبة ... يرتاح بنحيبه


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي