بسم الله الرحمن الرحيم

[ كم شخص رد يوسفّه ؟ ]

كم شخص رَد يوسفّه ... وجَرِح هجرك ما شفه
حالِتّي شكَد مؤسفّة ... مِن غيابك
_

آنه يابويه العليلة واشتكيلك حالتّي
عشت طفّين بغيابك ما حظيت بموتتي
إخلاف عينك كلشي جذبة عشت جذبة بضحكتّي
آه ياكسر الخواطر الله يدري بكسرتّي

طيرة مكسورة جِنِح ... ونايّم بجرحي الملح
أظلم بعيني الصبح ... مِن غيابك
_

الماي ما لامس جذوري سَيَّر اعليّه السراب
صافية ايّامي بوجودك هسّه كل عمري ضباب
أشكتي مو قصدي اعاتب أدري ما تِحمِل عتاب
بس اكَلّك ظلع آنه والهَجِر يالغالي باب

يعصِر بروحي الهَجِر ... وآنه كلساع انكسر
بنحري يذبح جم شمر ... من غيابك
_

طبع اليفاركَله غالي تسولف بعينه الصور
وطبع اليتانيله غايّب ما يمل مِن السهر
فشلتي فارس مزامط بالسباق ولن عثر
أبجي كل صبح ومسيّة بدمعي نافست البحر

يجري مِن عيني الدمع ... وما تغيّر أي وضع
أحتركَ مثل الشمع ... مِن غيابك
_

أختنكَ كل مغربيّة وتزغر بعيني الحياة
آني اوّل مرّة اشوفن كوثر يعطشه الفُرات
أنهضم هضمة شكبرها بويه لو شفت البنات
إيباتن بحظن المحنّة كَلّي بَعدَك وين ابات

كَلّي ابات بيا حظن ... صارت الدنية سجن
واسمي صار اسمه الحزن ... مِن غيابك
_

كلشي بالدنية متاهة والأمان بلا أمان
الغُربة مِن تستوطن احّد يبقه يحلَم بالحنان
الذكريات ابّالي صلّن وارتفع صوت الأذان
هنا كَعدنه ، هنا مشينه ، والتقينه بهالمكان

هنا جبتلك سِبحتّك ... وافرشت سجّادتّك
ها يبويه مروّتك ... مِن غيابك
_

صفنة المقهور تذبح وآنه صفناتي شكثر
الودّع بإيده حبيبه يموت مِن كلمة [صبر]
الهَوَه حار بصدري احسّه وبارد بجفّي الجمر
بكل محطّة تصوريتك يمها تلكَاني انتظر

أنتظر بلكت تِرِد ... يا دفو الوادم بِرِد
أيدي تعبت بس اعِد ... مِن غيابك
_

العايّش وما بيده حيلة يترجم احزانه السكوت
الشمعة مِن تموت سكتة ما تطلّع منها صوت
آخر النظرات دمعة ردت اشوفك راح اموت
يترك آثار اعله وجهي الهَوَه لو منّي يفوت

بوجهي مرسوم الأجل ... ولا خبر منكم وصل
عشت ، بس مات الأمل ... مِن غيابك


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي