بسم الله الرحمن الرحيم

[ باب المراد ]

آه وا ويلاه يا باب المُراد
___

إتلث أيمّة تذكّرتهم آنه بيك
عيني كَبل اجدامي تركض مِنْ اجيك
يالمناراتك تذكّرني بإديك
مِنْ جنت ترفعهن لرب العباد
___

سَمِّتَك وتذكّرت بيك الحسن
جعدة وام الفضل حيل تشابهن
عيون جم يعكَوب لمصابك عِمَن
والملائك أعلنت ليك الحِداد
___

تذكّرت بيك الحُسين المنذبح
ثلث تيّام ابو الأكبر منطرح
وانته نفس المُدّة باقي اعله السطح
جسمك من الشمس سومر يالجواد
___

يا شباب تذكّرت بيك الشباب
جاسم الحنّوا جفوفه من الخضاب
يا مصابك جِمَع جم لوعة ومصاب
توشّحت كِلْ ذرّة لجلك بالسواد
___

شيّعوا جثمانك بسيل الدمع
وراسك بسيف الشمر ما منكَطع
صدرك من الخيل ما طَكَ بي ضلع
ولا اخيامك باللّهب صارن رَماد
___

متت مسموم بغدر أم الفَضِل
بس ولا عندك أخت فوكَ الهِزِل
إبنيّة ما عندك يجتفوها بحَبِل
ولا رضيعك نَزَّل دموع الجماد
___

أعْتِذِر مِنّك يابن سيّد البَشَر
أدري حيل تألّمِت مِنْ هالصوَر
ندعي باسمك للإمام المنتظر
يظهر ويمليها قسطًا كِلْ بلاد


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي