بسم الله الرحمن الرحيم
#ثگيل

[ عرسك حِلِم ]

مِن وجهك يغار الوَرِد ... يالحِنِتّك دمع ونَبِل
جسّام لُامّك يابني صِد ... ما عندي كَلب ويحتِمِل
_

طولك غَزَل .. وجهك أمل
وبعيونك الحلوة زَعَل
جفّك تَرِف .. بس ينوصف
بركان ثائر لو حِمَل
مشيق نسق .. واقره الفلق
مِن نظرة البيها خَلَل
كَلبك سمه .. وبفاطمّة
معوّذتك آنه وبالكِفَل

ذاخرتك لشيب الكبر ... يالغَبِتَّك تكتل كتل
ردتك توسّدني الكَبر ... ما عندي كَلب ويحتِمِل
_

ضحكك سَمَر .. وجهك كَمر
ووكت الصلاة دمعك مُطَر
مِن تندعي .. يغيب الوعي
خشية الهك مو سقر
يابن الحسن .. دار الزمن
وامُك بقت بس للقهر
حيلي انهدم .. كَلبي انلجم
وبطيحتّك رَك النَظَر

عيوني طفن وي شمعتّك ... ما اشوف يالبيك استِدِل
ماتت ضحكتي وزفتّك ... ما عندي كَلب ويحتِمِل
_

أمّك جَرِح .. فكَدك مِلِح
والدنية ظَلمة بلا صُبِح
ثوب العرس .. بايدي من امس
كلما أشوفنّه انذِبِح
كَلبي انصِدَع .. بموت الزَرَع
يوليدي شينوّم الفِلِح ؟!
هوّه الفُكََد .. مِثلك وَلَد
كل صفنة يصفنها رمح

ياخيمتي الطاحت عليّ ... إخلافك بَعَد بيش استِظِل ؟!
الحِنّة بعدها بجف اديّ ... ما عندي كَلب ويحتِمِل
_

مات الضوه .. وضاكَ الهَوَه
ولجروحي ما ينفع دِوَه
أطفي الشمع .. واعلكَ دمع
عطشان خدّي وما رُوَه
عرسك حِلِم .. بس ما يِتم
زفّوك يُمّه لنَينَوَة
وجنت انتِظِر .. منّك بزر
واكَعد وي اطفالك سوَه

كبّرتك وشفت التعب ... وجنت انتِظِر منّك نَسِل
سامحني مِن تسمع عَتَب ... ما عندي كَلب ويحتِمِل
_

يادنيتّي .. يامهجتّي
يادمعتّي ويا ضحكتّي
ليش ارحلِت .. واستعجلِت ؟!
ردتك متن لجنازتّي
مِن جم سنة .. لعرسك أنه
أعكَد وافل بشيلتّي
وتالي شحِصَل .. جسمك وِصَل
ما حقّقتها منيتّي !

بالجَنّة يُمّه المُلتقه ... وبعرسك هناك احتِفِل
كلشي خلص بس البُقَه ... ما عندي كَلب ويحتِمِل


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي