بسم الله الرحمن الرحيم

#ثگيل

[ آنه محظوظ ] عن لسان الرمح ..

آنه محظوظ ... فوكَ راسي راس ابو السجّاد ينشال
آنه محظوظ ... وياي زينب مشت وترافكَني الاطفال

رحنه للشام ... بثورة ايتام
آنه محظوظ
_

شكبره حظّي وفوكَي قُرآن آنه شايّل ؟!
ورافكَتني الحُرّة بايتام وأرامل
ظلّت الرضعان تندب بالكوافل
كل طفل يصرخ دخيلك يا بو فاضل

أشعر بخوف ... لو يتيمة تصيح طحنه بولية اجناب
أشعر بخوف ... طَبِع عبّاس الكَمر مايحمل اعتاب

غَضَب لو قام ... بثورة ايتام
آنه محظوظ
_

عالهِزِل لو مال هودج هاشميّة
راس ابو السجّاد احس يثكَل عليّه
دمّه مِن يغتاظ يبقه يجوّي بيّه
ويبقه يهتز غِيرة لو بجّوا رُقيّة

تهتز الكَاع ... ويّه هزّت راسه مِن يبجن بناته
تهتز الكَاع ... ويّه كل شتمة وجرح يلجم خواته

تخضّر الآم ... بثورة ايتام
آنه محظوظ
_

آية تسعة من [الكهف] رتَّلها ثغره
يخشع الما عنده رحمة لَمَن يقره
رَتَّل [الكوثر] واجت فاطمّة الزهرة
أجت محنيّة الظلع وبخدها سطرة

صاحت حسين ... يامَن بشمّة وريدك تحيه الانفاس
صاحت حسين ... إنكَطَع حبل الله المتين بكَطعة الراس

ولطمت الهام ... بثورة ايتام
آنه محظوظ
_

بوقت الآذان ارتبك واتحيّر اهواي
ينلجم راس السبط بالسجدة فوكَاي
ياحُسين وكل فَرِض أرفعها دعواي
الله لاينطي الشمر ما شرّبك ماي

شِفِّتَك كَاع ... بالعطش متفطّرة وحَر الظهاري
شِفِّتَك كَاع ... وكَصّة ما عنده الفرات لهسّه جاري

مايّه ما صام ... بثورة ايتام
آنه محظوظ
_

مِن وصلنه الشام رحلتنه الأخيرة
بالخرابة تبات ياوسفة الأميرة
هيّه ظلمة وحتّه ما بيها حصيرة
والأشد زينب يسمّوها الأسيرة

تشيّب الروح ... بِت مُحَمَّد مِن تنام، تنام وكَفة
تشيّب الروح ... يفزّزنها اسياط ظالم لَوَن تغفه

أبد متنام ... بثورة ايتام
آنه محظوظ
_

آخر احداث وعِكَُب ذبحة أخوها
طفلة فزّت تبجي لكن ما رعوها
مِن سمعها يِزيد كَلهم عذّبوها
وجابوا الها بطشت راس حسين ابوها

شبكَت الراس ... وفرفحت طير انذبح مكسور الاجناح
شبكَت الراس ... وبجنان الله الوسيعة تلاكَوا ارواح

مو بالاحلام ... بثورة ايتام
آنه محظوظ


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي