#ثگيل

بسم الله الرحمن الرحيم

[ بعيونك عِطَش مرسوم ]

بعيونك عِطَش مرسوم ... رضيع وبالسهم مفطوم
زاعلت الفرح والنوم ... يعبد الله يعبد الله
_

يا وَرِد مو ماي يسكَونك سهم
أنته أوّل طفل بالنبلة انفطم
رفرفت أيدك مِثِل رفّة عَلَم
ركَبّتك تنزف عطر لو تجري دم ؟!

صعد دمّك ونزلت روس ... بجفوفك بقينه نبوس
بحضن ام الحسن محروس ... يعبد الله يعبد الله
_

وحشة يا يُمّه الحظن ويّه المهد
ويا [دللّولك] فهت كلّش بَعَد
السهم ظَل يجوي بركَبّتك لو بُرَد ؟!
عمت عيني فوكَ عينك دم جمد

دمّك جمد فوكَ العين ... بيك السهم لو بحسين ؟!
ما ميّزت بيكم زين ... يعبد الله يعبد الله
_

يُمّه وبراس السهم شِفت الوِريد
مبيّن شكَد ظال تسحب بي أكيد
تارك بعود السهم لزمات أيد
ترف نحرك ما حِمَل حَر الحِديد

عتابي ويه النسيم الهاب ... جا لو حرّك النشّاب
نحرك أبد ما ينصاب ... يعبد الله يعبد الله
_

جنت أحلم تمشي وانظر خطوتّك
تالي ما تالي السهم حَز ركَبتّك
جنت افكّن ريجي يُمّه بضحكتّك
هسّه شو يبست بخدّك دمعتّك

الله يرحم الأحلام ... الله يعاوّد الأيّام
الله يحاسب الظلّام ... يعبد الله يعبد الله
_

ضيوف آنه وياك جينه لكربلة
وعزبّت النه بسهم مِن حرملة
ضيوف بس ما سمّعتنه ال[ياهله]
سمّعتنه شلون تبجي العايّلة

أدّت وجاب الخطّار ... جيش ، وخيل ، موت ، ونار
سهمك سبّبه البسمار ... يعبد الله يعبد الله
_

هذا جرحك يفتحلنه شجم جرح ؟!
يُمّه للشَم ركَبتّك مو للذبح
الله ويّاك .. آنه وي جرحي الملح
ليش نورك طافي يا وجه الصبح ؟!

معانيّك خفاها الدم ... ومن عينك يصب زمزم
هوّه الهجر ما يرحم ... يعبد الله يعبد الله
_

حجي بوجهك طلّسم ما أفهمّه
بي خرابة ، وشام ، ديوان ، وضمه
نلت باستحقاق حِسن الخاتمّة
رحت بكَماطك تسجّل ملحمة

تكتب ملحمة أجيال ... طفل بس زلمه بالأفعال
وكَفتك تسوه جم رَجّال ... يعبد الله يعبد الله


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي