قصيدة ( نام الولد ) الى اصغر شهيد واكبر الم في قلوب اهل البيت عليهم السلام عبد الله الرضيع


نــام الولــد فوگ الرمـــح يــا زينب يلچمــه الذبـــح
ليش أبسهم عـــوده ذبــل بعده زغيــر أعلى الأجــل
وديني يمْ شمس الصبح
**
أخذينــي يــــا زينب تـــره عبـدالله نـــام
ابنـــي بعــــده زغير ويخـــاف الظـــلام
أمـــه انــه الفــاگـــده وثكـلـــه ابجفـــاه
شنهي ذنبــه وينذبـــح طيـــر الحمـــام
ابدللول ودمــع خليني انـــاغيلــه
بلكي ينــام ومـــا يگعد بعــد ليله
نحره مثـل خيــط الشمس ينقطـــع لمـــن ينلمــس
وسفه انگطع خيط الأمل بعده زغير أعلـى الأجل
وديني يمْ شمس الصبح
**
خـــاف يـــازينب يفـــز والـــدنيا لـــيل
وهـــوه متعـــود ينــــام ويـــه الــدليل
وحشـــه وي النبل نـــايم عــل التراب
أرد أضمد جرحـــه لا بعـــده يســــيل
بنبلة منحـــره مصيــوب دلالــي
وماتت عالرمح كل ذيــچ أمالي
يغفــه و ينــام ويه النبض هسه برمــح جفنــه غمض
والرمــح بــوليدي شفعـــل بعده زغــير أعلــى الأجــل

*
أخذينــي يــا زينب لعــد مهــد الطفـــل
بلكــي يطلـــع حلــم مــا صـــابه النبـل
أرد اشمـنـــه يـــزينـــب وارد أنـــام
أهــلال عيــدي وچــنـت اظـننــه يهــل
أتاني چنت اظنن هــلت إهلالـه
وأنام واستظل گلت آنه بخياله
غــاب وبعد مــا أظن يــرد ازغيــر ويأذيـــه البعــد
ودمعي مثــل دمـــه نــزل بعده زغير أعلى الأجـل
وديني يمْ شمس الصبح

**
ابنــي بعـــده زغيــر وإكبــار الــرمـاح
چني اسمع صوته ضامي اگليبي صاح
أرد ارويـــه أبــدمــع عينــي اليفيــض
بلكي يمّــِه أهنــاك أمــوتن واستــراح
كون أوي الولد اغفه بلحد واحـد
إخلافه يصير حظن أم الولد بارد
بــارد لچــن يسعــر جمــر الفگدت ولــد بأول عمــر
بفگد الولـــد گلبي اشتعل بعده زغير أعلى الأجـــل
وديني يمْ شمس الصبح
*


صدگ شمس أخدوده صـارت عالتـراب
چنــت أتمــنـى أشـوف أولــيـدي شــاب
أرد أشـمّــه شمّــت امفــارگلـــه روح
الألــم واحـــد نبلتــه و طـــاري الغيـاب
الِتفــارگ ولــد وبــلا وداع يــروح
يردالها النحــر مــن السهم مذبوح
سهم النحــر ينزف دمــه وگبله سهم ذاك الضمــه
سهم العطش گبله وصل بعده زغير أعلى الأجـــل
وديني يمْ شمس الصبح
*
ادري انه الضــامي يطفـولـــه ضمــاه
ليش يــرويه النــبــل مــوجــة دمـــاه
شنهي ذنــب الــورد يذبـل بالطفــوف
وبعــد مــا نشتم ابــد عطــره وشـذاه
ورد عبدالله ذابل مــا رواه الماي
راح ارويه بلكن من دمع عيناي
ضامي علـى راس الرمــح يالمرتـوي أبـــدم الذبــح
والرمـــح ما مـرله الخجل بعده زغير أعلى الأجــل
وديني يمْ شمس الصبح
**
الشاعر موسى البديري
١٤٤٢ هجريه