لو حتى حق الريدة هان .. أنا لي عليك حق الولف ..
💙💙💙

و حق الوِلف للذين لا يعرفونه ، هو حق الضحكات الزمان بيناتنا ، حق قروش المواصلات الدفعنانا لي بعض و اتحالفنا عليها ، حق السندوتشات الوقفنا اكلنا في الشارع و اتشايرنا حق البيبسي
حق الدمعات البيناتنا و الحزن اللي اتشاركناه
حق كل لحظة بيناتنا بي حلوها و مرها

حق السمِح ياخي ! الشين أنساه

و لو هو / هي ما نسيوه ، خليك انت القلبك مفتوح مشرع

خليك الضي في دنيا ضلام و خليك السمح في دنيا نفد فيها سوق النفاق و سوق السمح باير !

بتتقاطع دروبنا و تتفارق ..

اتنين من اصحابي ارتبطو سنين طويلة و كان صميم الشلة

لفي يا سنين و دوري ، القسمة ما حصلت

الا انهم ادونا احسن درس !

لي يوم الليلة و هم كل واحد بي عياله

مافي زول قال هم اتفارقو ليه ، ولا في زول فيهم ذكر تاني بي شينة كل واحد قال فلان احسن زول اعرفه . لكن مافي نصيب

رغم حزني من فراقم وقتها لكن كبرو في عيني شديد !

مرة متشاكلة مع صحبتي و فردتي شديد و ما طايقين بعض و يمكن لو اتلاقينا ساعتا نطعن بعض بالسكاكين ..

قام زول قاليها .. ما اصلا سلمى عصبية .. دقت ليه الطربيزة قالت ليه انا و سلمى نتشاكل نتقاطع ما نعرف بعض تاني .. لكن أنا حية مافي زول بيتكلم فيها قدامي !

حق الولف هو كل شي في الدنيا دي ، حتقولي لكن الناس بقت ما بتعرفه

ح اقوليك خليك انت البتعرفه .. ابقى السمح لون القمح ♥️..

كل الحب للبيسامحونا من قلبهم و اللي بيحبونا من قلبهم و اللي احتوونا بي كل عيوبنا و نقائصنا و كانو هم الزيادة الحقيقية و الاضافة الحقيقية ..

للي ما شافو فينا غير الخير و الريد و الحاجة الكويسة و اتغاضو عن ما دون ذلك ..

للناس على الناس حقوق كتيرة .. و للعلاقات حق الولف ..