Nurmuhammad Abduzoir

#eski_daftardan
ERTAK


Bir bor ekan, bir yo'q...
Qadim zamonda...
Yigit quyosh ekan,
Oy sevgan qizi...
Ular azob chekar ming bir xijronda,
Mening-chi, shu chog'da yumular ko'zim.


Men uxlab qolaman... So'ngsiz tuyg'udan
Ikkiga bo'linib ketadi dunyo.
Nega uyg'otmading meni uyqudan,
Bu ertak uxlashim uchunmidi yo?


Ertaklar tugaydi yaxshilik bilan,
Ertaklar - ayanchli, ertaklar- bedod.
Bir-birin vasliga yetganda ular,
Ertak tugab qolar. Shumikin murod?


Men ertak eshitib, sira to'ymagan,
O'n sakkiz yoshdagi bolakaydirman...
Dedim: ey qiz, meni ertak tugamay,
payonsiz sahroda yolg'iz qoldirma...


Biroq, sen uxlatib ketding, ....... ,
Tushimda yana sen... men senga bandi.
Aytasan, yuraging lim-lim adolat:
- "Ertakning tugashin istamagandim!"


15.08.2016

@Nurmuhammad_Abduzoir

Учликлар
СОҒИНЧ

1.
Бир аёл бор, дунёда бахт йўқ
Тиззасига бошингни қўйиб,
Ухлаб қолишдан ҳам ортиқроқ...

2.
Бир инсон бор, боғлиқдир куннинг
Эртароқ чиқмоқлиги қачон
уйғонганлиги билан унинг.

19.02.2019

Uchliklar
SOG‘INCH

1.
Bir ayol bor, dunyoda baxt yo‘q
Tizzasiga boshingni qo‘yib,
Uxlab qolishdan ham ortiqroq...

2.
Bir inson bor, bog‘liqdir kunning
Ertaroq chiqmoqligi qachon
Uyg‘onganligi bilan uning.

19.02.2019

@Nurmuhammad_Abduzoir

#eski_daftardan
* * *
To'rt faslimning o'rniga
kuz ekansan muhabbat.
Yuragimni kuydirgan
muz ekansan muhabbbat.

kamondayin qoshlari
Chap ko'ksimga o'q otgan,
Kipriklari nayzadek
ko'z ekansan muhabbat.

Mudom yurak bag'rimda
O'yib-o'yib yozilgan,
Jarohati tig'ga teng
So'z ekansan muhabbat.

Hamroh bo'lib har nafas
Mensiz hayot yo'q degan,
O'lsam hamki kafan-u
Bo'z ekansan muhabbat.

Mangu yashab ko'ngilda
Ming bir navo taratib,
Abadgacha kuy chalgan
Soz ekansan muhabbat.

Qish faslida muzlatib,
Issiq kunda Yondirgan,
Shamoldayin beqaror
Yoz ekansan muhabbat.

Visolingga to'ydirmay
Sog'intirgan toabad,
Qancha ko'rsam shunchalik
Oz ekansan muhabbat.

2016

@Nurmuhammad_Abduzoir

* * *

Sen ketsang, dunyoyim qulaydi manim,
Chilparchin bo‘lgaydir ruhim va tanim,
Ustimga qum sochur alaming -g‘anim,
Sen ketma...
sen ketma..
sen ketma.

Sen ketsang, yuzlarim qaro bo‘lmishdir,
Hayotim jahannam aro bo‘lmishdir.
Borliging jonimga oro bo‘lmishdir,
Sen ketma...
sen ketma..

Sen ketsang, yo‘qliging ko‘nglimni g‘ashlar,
Ruhimni kuydirmish ming bir otashlar.
Men o‘zim ketarman dunyoni tashlab,
Sen ketma...

15.02.2019

@Nurmuhammad_Abduzoir

* * *
Nahotki bu elning shoiri yo‘qdir,
Haqiqat - quyoshga mudom tik boqqan,
Ko‘zlari xanjardan ming chandon o‘tkir,
Haq so‘z deb boshlarin dorga tikmoqqa.

Qorani oq degan podshoh yonida
“Axir, bu qora” deb aytolgan dangal.
Nohaqlikka qarshi isyon, qonida
gupurgan bir shoir kerakdir manga...

Ustiga mingashgan xojasi - ko‘rki,
Betinim yuk tortgan adir, tog‘ yerda -
Bir xachir yaxshidir, ajaldan qo‘rqib,
Jonini avaylab yurgan shoirdan.

Jonsiz jur’atlarga so‘zlari masih,
Shoirni ertaroq olmishdir ajal.
O, yashash barchaga etmagay nasib
Yolg‘onga botmasdan tiriklik mahal!

Oh, endi rost aytmak mangu tamomday,
Maddohlikka bursa shoirlar yo‘lin.
Umr tilolmayman bunday zamonda,
Men sizga tilayman sharafli o‘lim...

12.02.2019
1.40

@Nurmuhammad_Abduzoir

СУВ ҚУЙИШ

Ким сендан баланд бўлса
тагига сув қуярдинг,
Ютуққа эришганни
кўролмасдинг, куярдинг.

Ичи қоралигинг-чун
нафсинг бўйи кўк етди.
Иймон дарахтинг эса
бутунлай қуриб кетди...

Ҳеч кимни қулатолмай
бўлдинг қанча овора.
Лек, ўзинг тубанлашиб
боравердинг тобора.

Қуёш чиқиб музлаган
дарёлар юрди бирдан.
Чўкяпсан, энди айбни
излама ўзгалардан.

Ўзинг кавлаган чоҳнинг
ичидасан шу чоғда.
Иғво қиляпсан аммо,
чиқолмаяпсан чоҳдан.

Сенинг тагингга ҳеч ким
сув қуймади. бўлди, бас.
Таги пастнинг тагига
сув қуймоғлик шарт эмас!

2016.

@Nurmuhammad_Abduzoir

ДИЛСИРОТ

1. ДИЛ…

Қиличдек қайралган йўлим - дилсирот,
Сен томон борурман, кетма, ғизолим,
Ҳар қадам босганим, қонли истироб,
Йиқилсам тамуғдир,
Ўтсам - висолинг...

Қон сизар бармоғим ораларидан,
Оёғим кесилур тобора чуқур.
Мени йиқитмоқ-чун олов қаърига,
Йўл неча силкинар… (босдими уйқу.)

Пастда эса дўзах ямлашга тайёр,
Қалқийман шу узун кўприкларингда.
Кўприкдан нарида бари муҳайё,
Ўтолсам басдир шу киприкларингдан -

Сўнг, гулим, қошингда қоламан буткул,
Унгача сен фақат кўз юммай, кутгил.


2. ...СИР…

Саратон кучайди, қизарди йўлим,
Неча бор тоблади қилични олов.
Энди кесилади оёғим, қўлим,
Энди узилади бошим бемалол.

Вужудимни йўнар, айлайди ғорат,
Энди сенга томон дил билан юрам...
Йўл бадтар ўткирдир. кесар тобора,
Мен сенга интилгум, кўз ёш-ла хуррам.

Хоҳласанг қоқавер киприкларингни,
Йўлларим узилсин, сирпанай аммо,
Ортиқча оғирим тушмасин, етар.

Мен неча йиқилай, ўлмам, барибир,
Айланиб оловга тушгунимча то,
Юрагим қанотга айланиб кетар...

3. ...ОТ.

Мана мен қақнусман, ёнингга чақир,
Ва яна оловга улоқтир қулинг.
Не учун дўзахдан қўрқайин ахир,
Юрагим самандар экан-ку, гулим.

27.05.2018

Нурмуҳаммад Абдузоиров

Assalomu alaykum, Alisher aka, sizni bu kun kechqurun tabriklamoqchi edim. Hammaning tabriklayotganini ko‘rib, Mening ham sabrim yetmayapti!.. Aka, rostini aytsam, men bir gapni tushunmaydigan, qo‘polroq qilib aytganda g‘irt g‘alcha bolaman. Lekin siz sabr bilan menga “shu shunday bo‘ladi, bu bunday bo‘ladi ” deb tushuntirasiz, boshqa odam bo‘lganda “boreee” deb qo‘l silkib, ustiga yana etak silkib ketib yuborgan bo‘lardi... shuning uchun sizning sabringizga, bardoshingizga tasanno aytmasdan ilojim yo‘q, esingizdami o‘tgan yili tabriklaganimda, “Bir kungina sabr qilolmaganman,” deb Hasrat qilgandingiz, yo‘q, siz Sabrli ekaningiz va’jidan Navoiyning Tug‘ilgan kunidan 365 kun o‘tib keyin tug‘ilgansiz! Nega shunaqa bilasizmi, Yerning hamma joyini yoritish uchun ulkan ulkan yulduzlar bir-biridan uzoq uzoq joylashgani ma’qulmikin deyman .
Axir buyuklar hammaga yetishi kerak-ku!
(balki bir-biriga yaqin bo‘lsa ko‘proq yoritar, Usmon Azim aytganday: “Balki bu tahminlarimiz faqat tahmindir”😉)

Ha-ya, ancha o‘tlab ketib, asosiy qismni unutib qo‘yibman

Alisher aka, Tabriklayman, Ilohim umringiz uzoq, Bilimingiz bundanda ko‘proq bo‘laversin! O‘zingiz tanlagan yo‘lda sobit turib, Oxirigacha bormoqlik nasib aylasin. bir baxtli erkak uchun kerak bo‘ladigan bor ehtiyojlarni sizga tilayman!...
Hali dilimda tukkan niyatlarim ko‘p! Ammo ularni o‘zingizga aytishim shartmas deb o‘yladim, ich-ichimda Xudodan so‘rayapman!...

@Nurmuhammad_Abduzoir

МУВОЗАНАТИ БУЗИЛГАН БОҒ

Шавкат Дўстмуҳаммадга
Яна декабрда гуллади бодом,
Ялонғоч баданин ҳеч ким кўрмасин.
Қартайиб қолганми, негадир осмон
Бу йил ҳам кечикиб қоқар кўрпасин.
Бу йил ҳам шу сабаб учар ҳавога,
Содда дарахтларнинг бор меҳнатлари.
Қуруқ шох - қўлларин очар самога,
Худога ёзади япроқ-хатларин.
Ортар майхонага қатновлар сони,
Нега, (саволга мос куй чалар чолғу.)
Қўли очиқ бодом - тирноққа зор-у,
Боши очиқ токлар - боши қаронғу?

2017. Декабр.

Нурмуҳаммад Абдузоиров

@Nurmuhammad_Abduzoir

НИҲОЯ

1.
Шўхчан овозингиз ҳазин тус олди,
япроқдай қалтираб айтдингиз: қўйинг,
кўнглимга ўт тушган ғариб бир ҳолда
йиғлагим келди, воҳ, дунёдан тўйиб.

қоп-қора тушлардан бошим алағда
қошингизга бекор борибман, дилбар.
йиқилиб кўргандим гарчи фалакдан,
ранжитдим қалбингиз оғриғин билмай...

ва кетдим бутунлай ҳаётингиздан,
англаб кутганларим бермаслигин рўй.
кўзларингиз тикиб оёғингизга,
ҳеч не демадингиз,
ҳеч не,
парирўй.

битта сўз кутяпман шундан сўнг бехос,
қолгандир тилингиз учида балки.
тушларимдан келар бир овоз, овоз -
қайтинг!


2.

Оловлар ўралган гул исмингизга,
айтсам - томоғларим куяди, э воҳ!
қаранг, вужудимда борар илдизлаб,
исмингиз аталмиш ҳарир бир гуноҳ.

айланиб бўлганман, мен-ку тупроққа,
ҳадемай саҳрога дўнмоғим тайин.
сиз ахир минг йиллаб хижронда ёққан,
кетсангиз бир қултум сув ичирмайин.

ўлимдан қўрқмайман, жонимдир садқа,
кўкка ҳам, ерга ҳам аён мастлигим.
мени ваҳимага солади фақат,
саҳрода шундайин гул унмаслиги.


3.

Ҳисларим ҳувайдо эрур кўзимда,
ҳар замон севгимдан сўйлагай достон.
умримни яшарман мен шу йўсинда,
муҳаббатим - қуёш,
кўзларим - осмон.

шукур, ўртасам ҳам тунлари бағир,
муҳаббат қуёшдек ботмас ҳеч қачон.
қандай кўринарди, покизам, ахир,
кўзларим гавҳари бўлмаса - жаҳон.

Нурмуҳаммад Абдузоиров

@Nurmuhammad_Abduzoir

BESAMARLIK
1.
Dunyo birdan aylandi chappa,
Va teskari oqdi daryolar.
Xayr degan bir mayin gapga
Yurak bag‘rim bo‘ldi pargola...

G‘arbdan chiqdi go‘yo oy-quyosh,
O‘tlar tushdi toza taqdirga.
Shu sababki ko‘zimizda yosh,
Bo‘lolmadik ikkimiz birga...


2.
Aylanmadi dunyo teskari,
Daryolar ham oqmadi ortga.
Chalinmadi ko‘kning askari
Uyqusizlik degan bir dardga.

But chiqmadi dil tegirmondan,
Xech to‘lmadi bu dunyo bir kam.
Kun chiqmadi boshqa tomondan,
Shu sababki ayrildik biz ham...

3.
Xarchand dunyo aylandi chappa,
Daryolarni ortga oqizdim.
Yulduzlarni butun bir safga,
Oy-quyoshni qoshingga tizdim.


Keyin yerni changallab hatto,
Qo‘llaringga tutdim olmadek.
G‘arbdan chiqdi quyosh ham, ammo
Biz baribir birga bo‘lmadik.

11.10.2017.

Nurmuhammad Abduzoirov.

@Nurmuhammad_Abduzoir

* * *

Muhiddin akamga
1.

Buguncha sabr qil, bugun yasha, bas -
Nazarga ilmasdan do‘q, pisandani,
Bir keldik bu yerga, do‘stim, aldanib,
Endi qochib ketmoq aslo yarashmas...


Hali biz qilgulik ishlar bor, tushun,
Axir o‘rganganman har yerda, har gal,
O‘t qo‘yib ketaman, ketishdan avval
Hech qachon orqaga qaytmaslik uchun...

2.

Tog‘lar bir-biriga suyanib o‘sar,
Yoki bir-birovga o‘sar qasdma-qasd.
Bunda yo‘llaringni raqiblar emas,
“Hammadan balandman” degan o‘y to‘sar.

Yolg‘izlik - tog‘larni yemirgan dahshat.
Nokerak sezmaslik uchun ham o‘zni.
Yo yelkangga kimdir boshini qo‘ysin,
Yo biror yelkaga bosh qo‘ymog‘ing shart!

@Nurmuhammad_Abduzoirov

@mnido.