HOGGANSI BARNOOTAAFI BARSIISOTNI "#MAANUWAALII_HOJIIN_BARNOOTAA_ITTIIN_GAGGEEFFAMU" HOJIIRRA OOLCHUU QABU JEDHAME.
-------------------
BBO- Muddee 11/2017 Biiroon Barnootaa Oromiyaa naannoo keenya keessatti qulqullina barnootaa manneen barnootaa keessatti haala walfakkaatuun akka mirkanaa'u taasisuuf, hoggansiifi adeemsi baruu barsiisuu bifa walfakkaatuun hojiirra oolchuun akka danda'amu sanada hojii barnootaa qorannoo irratti hundaa'ee qophaa'e "Maanuwaalii Hojiin Barnootaa Ittiin Gaggeeffamu" jedhu qopheessuufi leenjii kennuun gadi buuseera.
Maanuwaalicharratti hoggansa barnootaa sadarkaan jiran, dura bu'aa manneen barnootaa, supparvaayizaroota barnootaafi barsiisotaaf leenjiin torban tokko fixe bara 2016 kennamuun ni yaadatama.
Haata'u malee hoggansi barnootaafi barsiisotni maanuwaalii kanaan hojii barnootaa gaggeessaa jiran lakkoofsi isaanii baay'ee gadi aanaa ta'ee argameera.
Qulqullinni barnootaa mirkanaa'uu kan danda'u hawwiin otuu hin taane qajeelfamootaafi maanuwaaliwwan qorannoon mirkanaa'an kutannoon hojiirra oolchuu danda'uudha.
Supparviizyiniin barnootaa hoggansiifi ogeessotni barnootaa deeggarsa ogummaa kennuuf biiroo keenyarraa ji'a lamaaf bobba'an rakkoowwan MB keessa jiru adda baasuun deeggarsa kennuun, dogoggora jiru sirreessuun, muuxannoo qooduun, waan dagatame yaadachiisuun hoggansaafi barsiisota keessatti kaka'umsafi fedhii jijjiiramaaf qaban olkaasaniiru.
Walumaa galatti, hoggansi barnootaa godinaalee, bulchiinsa magaalotaa, aanaalee, supparvaayizarootni, dura bu'ootni MBfi barsiisotni haaluma bara darbe leenjii fudhattaniin sanada "Maanuwaalii Hojiin Barnootaa Ittiin Gaggeeffamu" jedhu, keessattuu, hoggansiifi supparvaayizarootn akka barbaadamutti hojiirra oolchuun qulqullina barnootaa mirkaneessuuf adda dureen hojjachuu akka qaban irra deebiin kallattiin kennameefiira.
Kitaaba - "Maanuwaalii Hojiin Barnootaa Ittiin Gaggeeffamu"
Chaanaalii Telegraamii keenyaa irraa argachuu dandeessu.
Telegram:
https://t.me/oeb_book_store
