عمريّات | شرح الفقه المنهجي

4⃣ استعمال أواني الكفار:

❔ يعني مثلا انا استعرت ابريق من عند جارنا غير المسلم.. هل يجوز استعماله؟

🟡 استعماله جائز، ويستحب غسلها قبل استعمالها لان ممكن يكون عالق فيها شيئ من النجاسات (خمر او لحم خنزير او غيره..)

اما اذا تأكدت انو كان يُستعمل فيها نجاسات.. مثلا انا بعرف انو جاري بيستعمل هاد الابريق لشي فيو نجاسة.. صار غسل الإناء واجب

🟡 ويقاس عالأواني الثياب كمان
مثلاً الثياب يلي منشتريها من البالة هي كانت لغير المسلمين
فيجوز استعمالها مع استحباب غسلها قبل الاستعمال

وبس هيك.. باب خفيف نضيف 🌚💙

3⃣ الأواني المصنوعة من معادن نفيسة:
مثلا وعاء مصنوع من الماس او لؤلؤ او غيرن

🟢 استعمالها جائز

❔ طيب ليش هي جائز والذهب حرام؟

🔰 لأنه ما ورد أي نص شرعي ينهى عن استعمالها (عكس الذهب والفضة يلي ورد فيهن نصوص شرعية)

🔰 وفي قاعدة فقهية مهمة بتقول:
الأصل بالاشياء الإباحة
يعني طول ما انو الشغلة ما ورد فيها نص شرعي او دليل على التحريم بكون حكمها مباح

2⃣ الأواني المضبّبة بالذهب والفضة:

🟠 مضببة يعني ملحومة أو مرقّعة بالذهب والفضة
قديماً ماكان عندن أوعية كتير
فإذا تشقق كأس او ابريق من نحاس مثلاً: كانو يرقعوه بالذهب او الفضة

🟠 وهاد الشي الو أحكام:

🔸 التضبيب بالذهب (ترقيع بالذهب):
حرام مطلقاً حتى لو كانت الرقعة صغيرة

التضبيب بالفضة: في كذا حالة

🔸 اذا كانت الرقعة كبيرة، وسبب الترقيع للزينة: حرام ولا يجوز استعمال الإناء

يعني مثلا انا عندي ابريق مافيه شي وحبّيت زينو برقعة من فضة وكانت الرقعة كبيرة.. بيصير استعمال الابريق كلو حرام

🔸 الرقعة صغيرة والترقيع للزينة: صار الاستعمال هون مكروه

🔸الرقعة كبيرة بس سبب الترقيع لحاجة (يعني تشقق الابريق ورقعتو برقعة فضة كبيرة لاستعملو لان مافي غيرو): كمان حكمها مكروه

🔸 الرقعة صغيرة والترقيع لحاجة: الحكم هون جائز

🟠 بس انتبهو انو هدول بالفضة
اما بالذهب قلنا حرام مطلقاً

🔵 تعريف الأواني:
هية الأوعية التي توضع فيها المائعات (السوائل والاطعمة وغيرها..)
وفيها شوية أحكام خاصة:

1⃣ أواني الذهب والفضة:
متل مثلا كاسة من فضة/ معلقة من ذهب.. شو حكمها؟
🔹 يحرم استعمال أواني الذهب والفضة بكل وجوه الاستعمال مثل الوضوء او الشرب...
الا في حالة الضرورة
مثلا بدي اتوضا وماني ملاقي الا ابريق من فضة
بهي الحالة فقط: الضرورات تبيح المحظورات

اما لغير هي الضرورة فحرام استعمالن

🔹 التحريم يشمل النساء والرجال

🔹 متل ما يحرم استعمالها: كمان يحرم اقتنائها
يعني يحرم وضع أواني الذهب والفضة في المنزل للزينة وغيره
(مثلا ابريق او ڤازة من ذهب محطوطة بس للزينة بدون ما نستعملها): حرام

#الأواني

🟣 هلق بقى النتيجة:

🔵 النوع الأول والثاني: يلي هنن الطاهر المطهر والطاهر المطهر المكروه
بيصلحو للتطهر فيهن يعني يمكن استعمالن بالوضوء وبرفع الحدث الأكبر (مع وجود الكراهية بالنوع الثاني)

🟢 النوع الثالث: لا يمكن استعمالو للتطهر بس يستعمل بباقي النواحي (الاكل والشرب والتنظيف..) وهو الطاهر غير المطهر

🟠 النوع الرابع: يلي هو الماء النجس.. لا يصلح لأي شيئ 😂

خلص أول باب بفضل وعون من الله 🌚💙🌸

4⃣ الماء المتنجِّس:

🟠 هو الماء يلي نزلت فيه نجاسة..
كمان قسمين 😂💙

🔸 القسم الاول:
اذا كان الماء قليل
ومعنى قليل يعني دون القلّتين
يعني أقل من 192.8 كيلو غرام

🔸 اي كمية اقل من هي الكمية.. اذا وقع فيها نجاسة خلص هاد الماء صار نجس ولو كانت النجاسة قليلة.. وولو لم يتغير فيه شي من صفاته

🔸النوع الثاني هو الماء الكثير:
يلي هو قلتين او اكثر.. يعني تقريبا 200 كيلو فما فوق

🔸 هاد الماء: وقوع النجاسة فيه ما بكفي لنحكم عليه انو نجس
لازم مع وقوع النجاسة: تتغير عالاقل أحد صفات الماء يلي وردت معنا.. اللون او الطعم او الرائحة

◽️ إذا تغيرت وحدة من هالصفات.. بكون الماء نجس
◽️ اذا ضل الماء على حالو بعد وقوع النجاسة فيه وما تغيرت صفاته.. بيضل طاهر لا ينجس

❎ حالة خاصة:
اذا اختلط الماء بشي بيشبه خواص الماء.. متل ماء الورد يلي خسران صفاتو
كيف بدنا نعرف اذا الماء ضل مطلق ولا لا؟

❇️ بالبداية.. لحتى نحكم عالماء انو ماء ولا لا.. عنا 3 صفات بتكون معيار لالنا
يلي هية الطعم او اللون او الرائحة

انت اذا شفت سائل لونو احمر مثلا.. خلص هاد ماعاد تقول عنو ماء لان خالف الماء بصفة اللون

يعني.. الأساس انو اللون والطعم والريحة ما يتغيرو لحتى يضل الماء مطلق

طيب هي المادة لأنها خسرانة صفاتها ما عم تغير الماء.. بس هية فعليّا اختلطت فيه
فكيف بدنا نحكم عالماء انه مطلق؟

🟠 رح ناخد لكل صفة مادة تانية كمعيار نقيس عليه

🔸 منحط عصير الرمان كمعيار للطعم بس.. لانو هو مادة طعمها واضح
🔸وعصير العنب معيار للون بس.. لانو بيغير اللون بشكل وسطي كمان
🔸واللاذن معيار للرائحة (شي بيتعلق بالماعز)

يعني:
هلق انا عندي هاد الماء يلي اختلط بكمية من مادة بس ماني حسنان شوف اذا الماء تغير ولا لا

🔵 فبدي قدّرها تقدير
بدي قدّر الصفات التلاتة: اللون والطعم والرائحة
كل وحدة فيهن بقيسها بالمعيار يلي حطيتلا ياه

🔹 لو انو نفس هالكميّة من المادة الغريبة.. حطينا بدالها عصير رمان كان تغير الطعم؟
اذا قلنا اي منحكم عالمادة الغريبة انها غيرت الماء
واذا قلنا لاء منحكم عالمادة انها ما غيرت الماء

🔹 نفس الشي للون
منقول لو انو حطينا لهالماء نفس الكمية بس عصير عنب كان تغير لونها؟
اذا قلنا اي فمنحكم عالماء انو تغير
اذا قلنا لاء منحكم عالماء انو لساتو طاهر مطهر

هي حالة نادرة بصراحة بس وجب ذكرها يعني

3⃣ الماء الطاهر غير المطهر

🟢 هو الماء الطاهر في نفسه.. يعني يمكن استعماله بالشرب والطبخ...
لكن غير مطهر لغيره يعني لا يمكن استعمالو بالوضوء ورفع الجنابة

🔰 وهو على نوعين
♻️الماء المستعمل.. ركزوا معي بهي الفكرة
هو الماء 1-القليل 2-المنفصل عن فرض الطهارة (وضوء او غسل جنابة)

يعني انت هلق عم تتوضا
في بالوضوء فرائض وضوء.. وسنن وضوء

❇️ الماء يلي عم ينزل منك بعد فرائض الوضوء هو ماء مستعمل.. اذا جمعته بوعاء مافيك ترجع تتوضى فيه مرة تانية
❇️ بينما الماء يلي عم ينزل منك بعد سنن الوضوء هو ماء لساتو مطلق وفيك تستعمله

مثال للتوضيح: بغسل الوجه بالوضوء بدك تغسل 3 مرات .. اول وحدة هية فرض فالماء المنفصل عن وجهك هو ماء مستعمل

تاني وحدة هية سنة فالماء المنفصل عن وجهك هون ماعاد مستعمل.. فينا نجمعو ونرجع نستعمله مرة تانية

🔰 ليش قلنا.. القليل؟
لان مثلا اذا انت عم تتوضا بمسبح.. بس تنزل بالمسبح وتطلع
بيضل المسبح طاهر مطهر ولو انت استعملتو لانو هاد ماء غير قليل
وهلق منذكر شو معيار الماء القليل

♻️ النوع التاني:
هو الماء المطلق يلي خالطه شيئ من الطاهرات 1-التي يستغني عنها الماء عادةً
2- ولا يمكن فصلها عن الماء بعد المخالطة
وتغيرت صفات هاد الماء وماعاد نقول عنو ماء مطلق

مثلاً: اذا حلّينا ظرف شاي بالماء
الشاي اختلط بالماء وماعاد يمكن فصله
وانت ماعاد تسميه ماء صار اسمه شاي.. فالماء تغيرت صفاته
وماعاد يمكن استعماله بالوضوء او الغسل

2⃣ الماء الطاهر المطهّر المكروه:

هو الماء المشمّس ( يلي سخّنته الشمس )

🔵 بس في 3 شروط لهالماء لازم تنطبق عليه ليصير مكروه:
(يعني مو اي ماء سخنته الشمس صار مكروه.. لازم تسخنه الشمس وتنطبق عليه هي الشروط التلاتة)

🔹 أن يكون ببلاد حارّة (نحنا بلادنا ما تعتبر حارّة)

🔹 أن يكون موضوع بأوانٍ (أوعية) منطبعة
وهية كل المعادن القابلة للطرق متل الحديد والنحاس والألمنيوم...عدا الذهب والفضة

يعني بدو يكون مثلا الماء محطوط بوعاء من حديد مطروق

🔹 أن يكون استعماله عالجسم للإنسان
او على جسم حيوان يمكن أن يصاب بمرض البرص متل الخيل

يعني اذا استعمل للجلي او الشطف او اي شي غير الوضع عالجسد.. ماعاد يدخل بهاد الشرط وماعاد مكروه

ومو كل الحيوانات ممكن تنصاب بمرض البرص
لهيك الكراهية بس لما ينوضع على جسم حيوان ممكن انو ينصاب بالبرص

🔵 بس تتحقق هال 3 شروط على الماء يلي سخنتو الشمس بيصير ماء طاهر مطهر مكروه

يعني يمكن استعماله للوضوء او الغسل بس مع وجود كراهة

المياه تقسم ل 4 أقسام رح ناخدن واحد واحد

1⃣ الماء الطاهر المطهّر (الماء الطَهور)
هو الماء المُطلق.. يعني الباقي عالهيئة يلي خلقه عليها رب العالمين

هاد الماء طاهر في نفسه يعني يصلح استعماله
ومطهّر لغيره يعني يمكن استعماله بإزالة الحدثين الأصغر والأكبر (الوضوء ورفع الجنابة)

🟢 شوية نقاط
اذا في ماء طاهر مطهر.. بس بسبب طول فترة تخزينو تغير (تعكّر بالخزان مثلاً)
او تعكّر شوي بسبب اختلاطه بتراب
او بسبب طحالب طافية على سطحه

فبيضل هالماء طاهر مطهّر يجوز استعماله بالوضوء وبرفع الجنابة

او الماء الموجود بارض كبريتية او يلي بيجري فوق ارض كبريتية.. كمان بيضل طاهر مطهّر

ليش؟ لان مافينا نحمي الماء من هاد التغيير يلي رح يصيبه بمرور الوقت

#أقسام_المياه

🔵 تعريف الطهارة

🔹 الطهارة لغةً: هية النظافة والتخلص من الأدناس الحسية أو المعنوية
مثل: تطهر من النجاسة (نظافة حسية)
او تطهر من الحسد (تخلص منه معنوياً)

🔹الطهارة شرعاً: فعل تستباح به الصلاة وكلشي على حكمها
مثل الوضوء او الغسل او إزالة النجاسة عن الثوب والبدن والمكان

🟢 المياه التي يتطهّر بها:
هي كل ما نزل من السماء او نبع من الأرض
وبشكل تفصيلي هية:
1⃣ ماء السماء 2⃣ ماء البحر
3⃣ ماء النهر 4⃣ ماء البئر
5⃣ ماء العين 6⃣ ماء الثلج

#أحكام_الطهارة

بسم الله الرحمن الرحيم 🌚💙

تعاريف إضافية

🔵 الفرق بين الركن والشرط

🔹 الركن هو ما وجب علينا فعله، وكان جزءاً من فعل العبادة
🔹 الشرط هو ما وجب علينا فعله بس مانو جزء من فعل العبادة وإنما هو من مقدمات الفعل

مثال: الفاتحة واجبة لصحة الصلاة، وهية جزء من فعل الصلاة: فهي ركن من أركان الصلاة

بينما الوضوء واجب لصحة الصلاة بس مانو جزء من فعل الصلاة: فهو شرط من شروط الصلاة

🟢 الأداء:
هو فعل العبادة حصراً بالوقت المحدد لها
مثل أداء صيام رمضان بوقته في شهر رمضان

🟠 القضاء:
هو فعل العبادة خارج الوقت يلي حدده الشرع
مثل قضاء صيام رمضان خارج شهر رمضان
وهو على نوعين
🔸 قضاء مع الإثم: في حال فوات الأداء بدون عذر
🔸 قضاء لا إثم فيه: في حال وجود عذر مسبب لعدم الأداء

🟣 الإعادة:
فعل العبادة مرة ثانية لزيادة الفضل
مثال: واحد صلى الظهر منفرد
بعدين قامت جماعة تصلي الظهر.. بيصليها معهم إعادة ليحصّل ثواب الجماعة
وتفاصيلها منحكيه بوقته 🌚💙

كل شي رح يمرق معنا بالحياة.. هو حتماً حتماً خاضع لأحد 5 أحكام شرعية:

1⃣ إما فرض 2⃣ أو حرام
3⃣ أو سنّة 4⃣أو مكروه
5⃣ أو مباح

ومستحيل اي شي يطلع برا هي الأحكام ال 5
لهيك لازم نعرف كل واحد فيهن شو معناه 🔥

🔵 الفرض:
هو كل فعل: الشرع طلب مننا فعله طلب جازم
🔹فاعله يُثاب وتاركه يُعاقب
مثلاً: قال تعالى {كتب عليكم الصيام كما كتب على الذين من قبلكم لعلكم تتقون} فهاد طلب جازم ويلي بيصوم يُثاب وتارك الصيام يعاقب

الفرض نوعين
🔹فرض عين: يعني بيخص كل مسلم بحد ذاته وكل فرد مطالب فيه لحاله ومسؤول فيه عن نفسه
يعني ما بكفي انا صوم رمضان لحالي ليسقط الفرض عن باقي المسلمين.. كل مسلم لازم يصوم برمضان

🔹فرض كفاية: هو الفرض يلي إذا قام فيه مجموعة من المسلمين سقط عن البقية
كيف يعني؟
مثلا الصلاة على الميت: إذا قام بها مجموعة من المسلمين سقطت عن البقية
وإذا ما قام فيها حدا.. الكل بيكون آثم

🔹 الواجب هو متل الفرض تماماً بالمذهب الشافعي.. ما بيفرق عنو الا بالحج ومنحكي عنه هنيك

🟢 الحرام: هو عكس الفرض
هو يلي الشرع طالبنا بتركه طلب جازم
◽️ فتاركه يثاب وفاعله يعاقب
مثلاً: قال تعالى: {ولا تقتلوا النفس التي حرّم الله إلّا بالحق}
ففي طلب جازم بعد القتل لهيك حكم القتل حرام

🟠 المكروه:
كمان يقسم إلى قسمين

🔸 الكراهة التحريمية: هو شي طالبنا الشرع بتركه طلب جازم، بس أقل من طلب الحرام
لهيك تاركه يثاب
وفاعله آثم بس أقل من إثم فاعل الحرام

🔸 الكراهة التنزيهية: هو شي طالبنا الشرع بتركه بس طلب غير جازم
فتاركه يثاب.. وفاعله لا يعاقب

🟣 المندوب:
هو نفسه المستحب، والسنّة، والنفل
وهو كل شي طلب مننا الشرع فعله بس طلب غير جازم
فاعله يثاب وتارك لا يعاقب
مثلاً صلاة الضحى: هية سنّة يثاب فاعلها ولا يعاقب تاركها

⚪️ المباح:
هو كلشي خارج ال 4 السابقين
فعله وتركه سواء.. لا يثاب فاعله ولا يعاقب عليه تاركه

رح آخد من المقدمة التعاريف الأساسية يلي بتهمنا بالفهم لقدام
فهم هالكم تعريف بيسهّل علينا الشغل بشكل عام 🌚🔥

🔵 بدايةً: شو يعني كلمة فقه؟
خلونا نتفق انو بتعريف كل شغلة من هلق ولقدام رح ناخد تعريفين
🔹 الأول هو التعريف اللغوي: مناخد فيه شرح هي الكلمة بقلب اللغة
🔹 التاني هو التعريف الاصطلاحي: تعريف الكلمة ضمن موضعها وسياقها الديني يلي بدنا ياه

🌸 الفقه لغةً:
هو الفَهم.. لهيك قال سيدنا محمد صلى الله عليه وسلم: من يرد الله به خيراً يفقه في الدين (يعني بيفهمه بالدّين)

🌸 الفقه اصطلاحاً:
هو تعلّم الأحكام الشرعية يلي بتتعلق بأفعال وأقوال المكلّفين
يعني لما تقول درست الفقه = درست الأحكام الشرعية الواردة في كتب الفقه والمستمدة من القرآن والسنة واجماع علماء المسلمين واجتهادن

كتب الفقه مقسومة ل 7 زمر، رح نحكي عنن واحد واحد ان شاء الله
ومنعرّف كل واحد بمكانه 🌚💙

#مقدمة