☆Onajonim she'riyat☆ maxsus kanal

#Antiqa_she'r

ГЎЗАЛ ТАЪРИФИ

Ҳинд шоирин таърифича ёр,
Қадам босар филлар мисоли.
Арабларда бундан зўри бор,
Ёр бармоғи қуртнинг тимсоли,

Шеър бошладим улар тилидан,
Ҳинд ва араб илҳомин тутдим.
Қаламини олиб қўлидан,
Кўзи билан қарадим, битдим.

Ўтиб борар филсифат санам,
Ким экан, деб дилда сўроқлар,
Ўшқирсаки, титрайди танам,
Қуртдек қимирлайди бармоқлар...

Кулгисидан пуркалади сув,
Ирғитворар тўссам, йўлини,
Ўнта қуртни тутқазди сулув,
Сўрагандим битта қўлини!

Ҳиндми ёки арабми, бари,
Ижодкорга осон тутмаймиз,
Феъли чатоқ ўзбек дилбари,
Сизга бундай шеърни битмаймиз!

Ҳар кимники ойдир ўзига,
Шиллиқ қурту ё филим десин.
Марди бўлса, қараб кўзига,
Ўзбекчалаб СЕВГИЛИМ десин.

© Абдулазиз Рустам ўғли

* * *
Кўп нарсани кўрмадик, дўстим,
Кўп нарса бор ҳали кўргулик.
Кўп майса бор ердан чиқмаган,
Кўп кимса бор ерга киргулик.

© Бобур ЭЛМУРОД

“VOHA” MADHI

Ikki egiz, ikki qardosh, do’st-birodar, jigargo’sha,
Va, lekin bir tomiridan oqqan qoni, demang ayro.
O’g’lonlari bolalikdan kurash tushib birga o’sar,
Bahodirlar, erlar yurti Surxondaryo-Qashqadaryo.

Shu diyorda kamol topdi ikki imom, ikki daho,
At-Termiziy va Nasafiy, ikki buyuk hazrat bobom.
Tuprog’ida yotar qancha allomalar, shayx-ulamo,
Avliyo-yu pirlar yurti Surxondaryo-Qashqadaryo.

Ko’pkarida ot chopganda ko’ring ko’rk-u savlatlarin,
Bu Zaminda ulg’aymoqda Alpomishning avlodlari,
Borligidan fahr etur Temurbekdek ajdodlarin,
Arslonlarning derlar yurti Surxondaryo-Qashqadaryo.

Hali qancha tug’iladi Abdullo-yu Usmon Azim,
Yosh shoirlar satri ila kurtak ochib, gullar nazm,
She’riyatda jarang sochar shuur ahli xush ovozi,
Yozilmagan she’rlar yurti Surxondaryo-Qashqadaryo.

Do’mbirasin qo’lga olib, “hay-ya-ra” deb kuylar baxshi,
Bo’lsangiz gar mehmoni siz quchoq ochib olar qarshi,
Ikki daryo o’rtasida charog’idir Termiz, Qarshi,
Ochilmagan sirlar yurti Surxondaryo-Qashqadaryo.

📝 Ma’ruf ORIF

@onajonimsheriyat

ESKI AYVON

Toshko'changga sochdim, ey yorug' olam,
Mana, chegarasiz muhabbatimni.
Tun bo'yi o'zimga yig'ladi onam,
Ne qilib qo'yding deb – Muhammadimni.

U yuzimni o'pdi,
Ko'zimga boqdi,
O, bu qarashlarga chidamoq azob...
Ona, men jannatda olmalar qoqdim,
Ona, men do'zaxda simirdim sharob.

Yolg'iz qushdek goho ko'kka uchdim shan,
Otdilar, tegmadi kamon ham, tosh ham,
Ona, oyning yuzi tirnalgan ekan,
Ona, yig'lar ekan xatto, quyosh ham...

O'ylamang, o'g'lingiz o'sha-o'sha sho'x,
Yuzim to'la so'qmoq o'ttiz yoshimda.
Otamning sochida bitta oqi yo'q,
O'riklar gulladi mening boshimda.

Ko'rishmadik, xolos, bizlar ming asr,
Keldim, poyingizda cho'kdim mana tiz.
Uy orzu qilsangiz – quramiz qasr,
To'y orzu qilsangiz – izim to'la qiz.

Faqat maydan sarhush bu o'rik boshim,
Tuvakdan tuproqqa tushgan guldayman!..
Manov, bulbulchasi ochiq bola kim,
Ukamning o'g'limi?
Ismin bilmayman...

Toshko'changga sochdim, ey yorug' olam,
Mana, nihoyasiz muhabbatimni.
Tun bo'yi o'zimga yig'ladi onam,
Ne qilib qo'yding deb... Muhammadimni.

1988

© Muhammad Yusuf

Сен - қафас, ичингга қамалган дунё,
Мен - қушман ичингда сенга ичиккан.
Қанотим остида калит бор,
аммо
чиқиб кетолмайман эшикдан.

Мен - банди.
Ҳеч қачон ҳеч ким тутмаган!
Ҳайдама...
Яхшиси, бошимга дор тик.
Ташқарида сен йўқ-
Ташқари туман,
Мени ўлдиради бундай озодлик.

Қара, кўзларимдан томяпти шабнам,
Юраги нам тортиб кетганлар камми?
Илтимос...
Ҳайдама...
Гар қанот ёзсам,
Сочилиб кетаман.
Ачинмайсанми?

Учмайман!!!

Башорат Отажонова

Pushaymon.

Qanday paytlar edi-ya,
Naxot, qaytib kelmaydi.
O'sha paytlar qaytmasa,
Majruh yurak tölmaydi.
Kimdir "unut" deydi-yu,
O'ylamasdan bo'lmaydi.
Chunki, sen bilan o'tgan,
Damlarim bo'lak edi.
Sen aslida meniki
Bo'lishing kerak edi!

Rashk qilardim, dugonang
Ushlasa ham belingdan.
Mening ismimdan boshqa
So'z chiqmasin tilingdan.
O'zing ayt-chi, bir marta
Ushladimmi qo'lingdan?
Chunki, seni sevardim,
Sha'ning ham tirgak edi.
Sen aslida meniki
Bo'lishing kerak edi!

Naxot, mening sevgimdan
Topmay qadr, ketding-ku.
Yo'qsa, ayt-chi, yolg'izim,
Aybim nadir, ketding-ku.
Endi senga hech kimman,
Kimlargadir ketding-ku.
Naxot, sen uchun sevgi
Shunchaki ermak edi.
Sen aslida meniki
Bo'lishing kerak edi!

Ko'z qirida ko'zimga
Ko'zlaringni suzarding.
Go'zallikda, go'zalim,
Go'zallardan o'zarding.
"Sevdim" desam uyalib,
"Kelgin" desam qizarding.
Go'yoki ikkimizda,
Birgina yurak edi.
Sen aslida meniki
Bo'lishing kerak edi!

Xudodan so'rab sevdim.,
Sevgimga o'rab sevdim,
Sochingni tarab sevdim,
Ko'zingga qarab sevdim,
Xijronga yarab sevdim,
Boladay yayrab sevdim.
Sen-chi!.. Ishonmaysanmi?
Tamom... Bu ertak edi.
Shu ertakda meniki
bo'lishing kerak edi!

✍️ OBIDXON

КУТМОҚ — ЮРАКЛАРДА ТАНГРИ КАМОЛИ

Майлими, кутганим, йитганим,
Бошланиб-бошланмай битганим,
Қачондир руҳимдан кетганим,
Йўл бўлиб тураман, юриб кел,
Юракка айлану уриб кел.

Майлими, ўзимдан бошланган,
Бир тутам тўзимдан ишланган,
Руҳимнинг чоҳига ташланган,
Туш кўрмай, англаб кел, сезиб кел,
Кўл бўлиб тураман, сузиб кел.

Майлими, киприги найқамиш,
Кўзлари ҳижрондан куйламиш,
Тушунмай, англамай йиғламиш,
Фарёд қил, дунёни бузиб кел,
Ва янги бир дунё тузиб кел.

Озод эт жонимни буровдан,
Оғриқлар тилаган бировдан,
Деворим суяб қол нуровдан,
Кўк бўлиб тураман, учиб кел,
Қувган мен, сен мендан қочиб кел.

Эшикдан қотилдек бешарпа,
Дарчамдан ўғридек кир, аста,
Ётибди жони йўқ, руҳ хаста,
Сен унга соғинчин олиб кел,
Соғинчнинг ўзи бўлиб, елиб кел.

Кундузим — кимсасиз хиёбон,
Кечалар — тўхтаган бир даврон,
Осмоним — йиртилган соябон,
Қўйиб юбор уни… Художон,
Дил куйди — ёмғирдай томиб кел,

Очилиб қолганман, кўмиб кел,
Рухсат олиб қўйдим, фақат кел.
Рухсат бериб қўйдим, фақат кел,
Фақат кел, фақат кел, фақат кел…

Шодмонқул Салом

Boshlanib-boshlanmay bitganim,
Qachondir ruhimdan ketganim,
Yo‘l bo‘lib turaman, yurib kel..
Yurakka aylanib, urib kel..