Жамғырдан соң келген қыяллар

Мукаррамаға жууап

Халым жаман, келер болсам хағынан
Бəхəр кетти сенсиз ышқым бағынан
Сағынышлы жууабыңды жеткерген
Миннетдарман бүгинги таң шағынан

Тек саған бəнт бул Ойшылдың санасы
Алтын маған шашларыңның таласы
Хəтте қымбат хинжи, мəржан, дүрлерден
Жумалаған көз жасың хəр данасы

Қыйналмағыл, сүуретлерге бас урма!
Алыстасаң. Қəуетерим асырма!
Жыллы-жыллы сезимлериңди көрсет
Илтимасым мириубетиң жасырма

Тарқасқандай қара бултлар етеги
Таза хауа леби елп-елп етеди
Еле мени умытпапсаң нигəрым
Бахтым ушын соның өзи жетеди

Ниетулла (ойшыл)