🛢 kerosine poisoning

⭐️انت بالطواريء و تجيك عائلة تركض بإبنهم ، دكتوووور إبننا شرب نفط ..

فلازم بالبداية نتأكد صدك شارب نفط لولا ، ممكن شي ثاني [ مرات الاهل ما يحجون او يحاولون يضيعون السالفة بشي ثاني تجنباً للوم ، لان الزوج رح يكول صوجج والزوجة تكولة صوجك و تگب العيطة 😵‍💫] ، مرات ريحة النفط نشتمها من بعيد تترس الطواريء ومرات احنا نتقرب ونتأكد

فهسة المفروض تأكدنا انه شارب نفط ✅

⭐️نجي اول شي إذا ملابسة بيهن نفط او بيهن ريحة نفط لازم ينزعهن .. ونسأل الاهل الاسئلة الآتية /
- شوكت شرب النفط ؟ تقيأ لو لا ؟
بعد اكو شي ثاني صار عنده ؟
- وبالفحص نشوف حرارته مرتفعة لولا؟
ونفحص صدره هم لأن .....

⭐️ لأن أكثر شي نخاف منه هنا هو اذا مستنشق النفط و داخل للرئتين يصير عندهم aspiration pneumonia ، وعادة اذا داخل نفط للرئتين يصير عنده ؛ ضيق بالنفس ، گحة ، ازرقاق ، حتى ارتفاع بالحرارة ، فاذا شفنا ذني الاعراض هنا لازم نعرف ان السالفة يحتاجلها أدمشن .

كذلك هم مرات تتدهور حالاتهم أكثر ويصير عندهم خلل بالوعي ، fit او coma ، وممكن يصير عندهم pulmonary edema ويحتاجون دخول للعناية ..

⭐️ زين نجي ع الإجراءات الي نسويها :

-نتجنب ال gag reflex وال gastric lavage وقرار غسل المعدة مرات يتخذ اذا جان شارب كمية كبيرة من النفط او شاكين بمادة غير النفط ، وطبعا قرار غسل المعدة مو يمنا ، يم السينير .

-نخليه ع الاوكسجين وحسب الsob العندة واحيانا ننطيه فنتولين هم اذا wheezy chest.

- اذا متقيء او حرارته مرتفعه او ابنورمال چيست اكزام نخلي ببالنا هاي pneumonitis اما النيمونيا النخاف منها ماتصير بالبداية ومن تصير بعدين ننطي الها antibiotics.

- الستيرويد عليه خلاف ، وغالبا ما يستخدم ..
-نكدر ننطي بلاسيل حتى مايتقيأ وتخرب الوضعية ..
-براستول اذا مصخن ..

⚠️ندزه CXR وره 6 ساعات من الحادث ونشوف اذا اكو اي شي ابنورمال حتى يتم اتخاذ العلاج المناسب ..
-اذا مابيها شي الاشعة والمريض ماعنده شي ممكن يطلع للبيت وننصح الاهل يراجعون المستشفى اذا طلعت عنده اي اعراض .

-توصية الاهل ان يضمون النفط بمكان آمن ..