په څنګل افغانستانه'


ګلاب نرګس ریحان ګـل د سنبل افغانستانه
لیمه زمـــــــــا باڼۀ زما کوګل افغانستانه

هره دښته او هر غــــر دې جوړ سرۀ زر دي
ای ځار شمه لتانه زمــــــا خپل افغانستانه

هر تن دې نـــوم لیکلی دی له ډېره محبته
پــه مینه پښتنه خاص په څنګل افغانستانه

ښارونه دې بس ټول د وجود برخې دي جانانه
او زړۀ لـرې ښایسته ښکلی کابل افغانستانه

ستا غیږکې پرديپال او غلامان اوسیدی نشي
سنګر سنګر اتـل اتـل مورچــــل افغانستانه

ناترسه انقلاب دی غیږ کې سرې لمبې کړې بلې
سوځیږي دې اورونـو کې اوربل افغانستانه

پـــــر مونږه باندې ګرانه قدردانه اې قربانه
دوښمن لره سم دم جوړ یې اجل افغانستانه

زمــا زړه سترګې اوځانه مجاهد افغانستانه
د "غالب" قلم پـــرتا لیکې غـزل افغانستانه