. ****

Qachon uygʻonadi bu millat ota,
Qachon uygʻonadi yarim oʻliklar.
Togʻlar yelkasini bosib bormoqda,
Bizning boʻynimizga osilgan yuklar.

Qon kechib, qon yutib ulgʻaydi vatan,
Nega loyiq farzand tugʻmading ona?
Toʻrtta yarim-yuluq she'rimdan boʻlak,
Vatanga munosib ne qildim yana?

Har safar tong otar horgʻin, iymanib,
Quyosh ham chiqadi istar-istamas.
Odamlar chopadi ofislariga,
Pul topish uchun u eng yaxshi qafas.

Tashqarida boshlanar boʻron va shamol,
Tumanli quyunlar uchirar kimni.
Uchib derazaga urilgan faryod,
Choʻchitib yubormas ba'zi muslimni.

Barchasi boshlanar shu kabi oddiy,
Olovlar ufurar yerning qarida.
Dunyoning bir kami koʻrinib qolar,
Bir uzun bir qisqa barmoqlarida.

Ammo men koʻnmayman bundayin holga,
Buyuklik shiorin etajakman yod.
Olov qoʻysalar gar tirikligimga,
Soʻngi qonim bilan oʻchirgum hayot.

✍ Lochinbek Normurodov

@Lochinbek_Normurodov