У мінулыя выходныя прадстаўнікі Рады БНР узялі ўдзел у анлайнавым Усясьветным кангрэсе беларусаў.

Гэта ня першы кангрэс глябальнае беларускае дыяспары, але ўпершыню ён адбыўся цалкам анлайн і ўпершыню аб'яднаў беспрэцэдэнтную колькасьць беларусаў з розных краінаў, якія раней не былі заангажаваныя ў беларускае грамадзкае жыцьцё.

Мы радыя, што ў цяперашні крытычны для Беларусі час столькі нашых суайчыньнікаў па ўсім сьвеце гатовыя рэальнымі справамі дапамагаць радзіме пераадолець тыранію і беззаконьне, каб направіць яе на шлях да пасьпяховага будучага разьвіцьця.

Мы спадзяемся, што гэты кангрэс стане першым крокам да кансалідацыі і актывізацыі шматтысячнай беларускай дыяспары.

Захоўваючы здабыткі стогадовай гісторыі беларускага арганізаванага жыцьця на чужыне і набываючы глябальны сучасны вопыт, мы ўсе разам можам дапамагчы Беларусі, а таксама захаваць нашую беларускую культуру і ідэнтычнасьць, перадаўшы яе нашым дзецям і ўнукам.

Падаем запіс прывітальнага звароту Старшыні Рады БНР Івонкі Сурвіллы.