Jumu'aa Asrii booda kana Jaalala Rabbii irraa wal haa yaadachiifnu:
****
Gammachuun, tasgabbiifi haara galfiin Mu’uminaa hunduu Rabbii jaalatuuf ajajamuu keessa jira. Hoggantoota addunyaa baay’ee dirqamaan ittiin bulama. Osoo humni isaanii hin jiraannee ykn adabbiin hin jiraannee ittiin hin bulamu. Garuu Mu’uminni gaafa Rabbii isaatiin bulu ka’umsi jalqabaa jaalala Rabbiiti. Dhugaadha Rabbiin sodaatanii, rahmata isaa kajeeluufis ittiin ni bulama. Kun garuu jaalala Rabbii wajjin ta’uun dirqama. Kanaafuu Mu’uminni Rabbii isaatiin buluu qallaba qalbii, qananiifi haara galfii isaatti beeka. Addunyaafi aakhiraatti ittiin milkaa’a.

Jaalalli Rabbii qalbiin gara Isaatti dabuufi waan hundarra isa filachuu of keessaa qaba.
Rabbiin jaalachuun Muslima hundarrattuu dirqama. Wallaalaa lubbuu isaa miidhe malee kaan jaalala Rabbii hin dhiisu. Inumaa jaalalli kamuu kan Rabbii irra caaluu hin qabu. Jaalala Nabiyyiituu (saw) kan Rabbii hordofee dhufuu qaba. Dogoggorri guddaan jiru du’aatonni baay’een jaalala Nabii (saw) malee, isaanii jaalala Rabbii haasa’anii hin dhaga’amu. Warra Nashiidaatii jaalala Rabbii dubbatuu dhaga’ee hin beeku. Kun tarkaanfii sirraa’uu qabuudha.

Namni Rabbii isaa caalaa, amantii Islaamaafi Nabiyyii isaa [saw] caalaa wantoota saddeettan armaan gadii jaalate salphateera.

{قُلْ إِنْ كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُمْ مِنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لَا يَهْدِي الْقَوْمَ الْفَاسِقِينَ (24)} [التوبة: 24]

“Yoo abbootin keessan, ilmaan keessan, obboleeyyan keessan, niitiwwan keessan, firoonni keessan, qabeenyi isin horattan, daldalli isin hir’achuu ishee sodaattaniifi manneen isin jaallattan Rabbi irra, ergamaa Isaatiifi karaa Isaa keessatti qabsaa’uu irra gara keessanitti jaalatamaa ta’e, hanga Rabbiin murtii Isaatiin dhufutti eegaa” jedhi. Rabbiin ummata finciltoota hin qajeelchu. [Attawbaa: 24]

Qabxiilee jaalala Rabbii namaaf agamsiisan kudhan yeroo darbe barreesseen ture isa daawwachuu dandeessu.