𝚒𝚜𝚕𝚊𝚖🌻✨

ئایاكاریگه‌ری دوعا له‌سه‌ر قه‌ده‌رو نسیب چییه‌، به‌هۆی دوعا كردنه‌وه‌ قه‌ده‌رو نسیب ئه‌گۆرێ.؟
یان هه‌رگیز گۆران كاری به‌سه‌ر قه‌ده‌ری مرۆڤه‌كاندا نایه‌ت؟
وه‌ڵام
هه‌روه‌کو پێغه‌مبه‌رمان(صلى الله عليه وسلم) فه‌رموویه‌تی" لا يرد القضاء إلا الدعاء" واته‌؛ هیج شتێک نییه‌ قه‌زای خوای گه‌وره‌ بگێڕێته‌وه‌ مه‌گه‌ر ته‌نها نزا و پاڕانه‌وه‌! هه‌روه‌ها فه‌رموویه‌تی" لا يزال القضاء والدعاء يعتلجان ما بين الأرض والسماء" واته‌؛ به‌رده‌وام قه‌زا و پاڕانه‌وه‌ له‌ زۆرانبازیی و ململانێدان له‌گه‌ڵ یه‌کتر له‌ نێوانی زه‌وی و ئاسماندا.. مانای ئه‌م فه‌رمووده‌یه‌ش ئه‌وه‌ ئه‌گه‌یه‌نێت که‌ دوعا و پاڕانه‌وه‌ هۆکارێکه‌ به‌نده‌ ده‌توانێ به‌کاری بهنێ بۆ ئه‌وه‌ی هه‌ندێ له‌و قه‌زایانه‌ی خوای گه‌وره‌ دایئه‌به‌زێنی به‌ریان لێ بگرێ و بیانگێڕێته‌وه‌.. ئه‌‌وەش سه‌یر و ناماقووڵ نییه‌! چونکه‌ هه‌روه‌کو چۆن بڕیار و قه‌ده‌رکان ویستی خوان دوعاش داوای خوایه‌ له‌ ئێمه‌ و له‌ قه‌ده‌ری خوایه‌، بۆی هه‌یه‌ ئه‌وانه‌ بگێڕێته‌وه‌ که‌ پێیان ئه‌کرێ، ئه‌گه‌ر دوعاکه‌ به‌هێزتر بوو، مه‌رجه‌کانی دوعای ڕاسته‌قینه‌ی تێدا بوو، خوای گه‌وره‌ ڕازی بکات، ئه‌و هه‌ر به‌ ویستی خوا ڕێ له‌و قه‌زایه‌ی خوای گه‌وره‌ ده‌گرێ و ده‌گه‌ڕێته‌وه‌، به‌ڵام ئه‌گه‌ر وه‌کو یه‌کسان بوو له‌گه‌ڵ قه‌زایه‌که‌ ئه‌وا به‌رده‌وام له‌ ململانێ و به‌ره‌نگاری ده‌بن هه‌تاوه‌کو دوعایه‌کی تر دێت و ئه‌وی تر به‌هێزتر بکات به‌ڵكو بیگێڕته‌وه‌، خۆ ئه‌گه‌ر لاوازتر بوو له‌ قه‌زاکه‌ ئه‌وا ناتوانێ به‌ری لێ بگرێ و ئیتر دائە‌به‌زێته‌ سه‌ر به‌نده‌که‌.. ئه‌وه‌ش له‌ ئیسلامدا پێی ده‌وترێ دوورخستنه‌وه‌ یان لابردنی قه‌ده‌رێکی خوا به‌ قه‌ده‌رێکی تری خوا.. ئه‌مه‌ش جائیزه‌ و ویستی خوای گه‌وره‌ خۆی له سه‌رێتی، وه‌کو بارینی باران.. ده‌کرێ بوترێ مادام له‌ خواوه‌یه‌ ئیتر نابێ به‌ره‌نگاری لێ بکه‌ین و با لێماندا و ڕازین به‌ قه‌ده‌ری خوا!؟ نه‌خێر به‌ڵكو جائیزه‌ چه‌تری بۆ هه‌ڵگری و خۆتی لێ بپارێزی هه‌تا نه‌خۆش و سه‌رما نه‌که‌وی.. حیکمه‌تی ئه‌وه‌ش بۆ ئه‌وه‌یه‌ به‌نده‌ی خوا هه‌میشه‌ دوعا بکا و بپاڕێته‌وه‌ له‌ خوا، چونکه‌ دوعا عیباده‌ته‌ و نیشاندانی پێویستبوونی و زه‌بوونی و هه‌ژاری به‌نده‌ی تێدایه‌ بۆلای خوا، بۆ ئه‌وه‌ی هه‌ندێ خێر و چاکه‌ هه‌ن هه‌تا ده‌ستت که‌وێ یاخود هه‌ندێ شه‌ڕ و زیان هه‌ن هه‌تا لێت دوور بخرێته‌وه‌، ئه‌بێ دوعا بکه‌ی.