Олимпиададағы еріктілердің көбі ағылшын білмейді. Жапонша сөйлей береді. Түсінбей бара жатсақ ишарамен түсінісіп аламыз. Волонтерлер арасында 50-60 жастағы жандар көп. Оларды қарттар санатына қоса алмайды екем. Жүгіріп, құрақ ұшып көмектесіп жүргені. Әлемдегі ең ұзақ жасайтын халық жапондар екенін ескерсек, олар үшін 50-60 жас нағыз жүгіріп жүретін шақ.
Еріктілер ағылшын білмесе де бар күшін салып көмектескісі кеп тұрады. Алдарында ашулана алмайсың. Жымиғанын маска да жасыра алмайды. Жымиып тұрған адамға қалай бұрқылдайсың. Кеше қала орталығына шығып, көшеде кетіп бара жатып бір жапоннан жол сұрайық дедік те айнып қалдық. Қазір оның жанына барып жол сұрасаң ол бақандай он минут түсіндіретінін түсіндік те “қой, өзіміз бірдеңе қылып тауып алайық” дедік. Өткенде Жапония бөлек планета дегенмін. Өз ережелерімен өмір сүретін ел. Жапондар “олимпиадада ерікті болу үшін ағылшын тілін біру керек” деген стереотипті бұзды. Әрине, бәрі ағылшын білмейді демеймін. Білетін еріктілер шынымен ағылшын тілі керек жерлерде жүгіріп жүр.