من يطفي النار في صدر الحزين المحب
اللي لواهيب نارك في ضلوعه تحوف

لا تحسبين الشتاء و البرد يطفي اللهب
الا لياليه حده مثل حّد السيوف

ان كان صيفك معلمك السفر و الطرب
انا الشتاء موعد احزاني يجوني ضيوف

كانت تمر الفصول بدون صوت و صخب
ما كنت اميّز ملامحها و لا كنت اشوف

اللي عرفته في فصل الصيف نجني عنب
و لا جاء الشتاء ثوبي الابيض ابدله صوف

و جيتي فضحتي ملامحها و كنتي سبب
اني ربطت الشتاء في حزن كل الضعوف

لا شفت من لا اعرفه مكّتسحه التعب
شفتك سبب كل ما يوجع و كل الظروف

ماني مخفيه دمعي لـ انهمر و انسكب
ما دام معشر دموعي في عيوني تطوف .