(9-НЧЕ БҮЛЕК: «ГЫЙЛЕМНЕҢ ФАЙДАЛАРЫ»)

Гыйлем — «хашия» дигән куркуның нигезе булып тора.
Аллаһ Тәгалә әйткән:

إِنَّمَا يَخْشَى اللَّهَ مِنْ عِبَادِهِ الْعُلَمَاءُ

«Дөреслектә Аллаһтан чын курку белән Аның коллары арасыннан — галимләр генә курка»

«Фатыр», 28

🌿 Пәйгамбәребез ﷺ:

«Кем мәчеткә хәерлелекне өйрәнергә, яки хәерлелекне өйрәтергә килсә, аңарга камиль, тулы хаҗ кылган кешенең әҗере булачак», диде.

📚 ат-Табарани.

🌿 Му‘авиядән килә, Пәйгамбәребез ﷺ:

مَنْ يُرِدْ اللَّهُ بِهِ خَيْرًا يُفَقِّهْهُ فِي الدِّين

«Кемгә Аллаһ хәерлелекне теләсә, аңа динне аңлауны бирә!» дигән.

📚 әл-Бохари (71), Мөслим (1037), Ибен Мәҗәһ (221)


«ЯНЧЫГЫҢДА НИЛӘР БАР?...»

Озакламый олы юлга чыгасы була безнең
Раббың белән очрашуга нәрсәләр хәстәрләдең?
Бармы янчыгыңда иман, намазлар, уразалар?
Аллаһ ризалыгы өчен өләшкән садакалар?

Салып куйдыңмы син анда ятлаган аятләрне?
Аллаһ йортларына килеп, тыңлаган хөтбәләрне
Бармы анда Рабыбызга булган олуг мәхәббәт
Аллаһ биргән байлыклардан елда чыгарган зәкәт?

Бармы анда өмет, курку, хушуглык, тәвәккәллек?
Раббыбызга шөкер бармы? Шуны кара, иң элек
Зикер-тәсбихне алдыңмы? Тәкбирне һәм тәхлилне?
Җиде күк өстеннән иңгән иманыңа дәлилне

Җитештеңме әле, дустым, янчыгыңны барларга?
Нәрсә тагын анда җитми, онытма күз салырга!
Бармы гает көннәрендә чалынган корбаннарың?
Рамазан да оештырган ураза ифтарларың?

Юлга чыкканчы хәстәрлә янчыгыңда ни барын
Яман нәрсәләр булса, – алардан тизрәк арын!
Инде җәйләр үтеп китте, оча сары яфраклар...
Бу дөньяда барыбызда вакытлыча,– кунаклар

Күршеләрнең бакчасында баланлары җитешкән
Барысын да барладыңмы? – Ашыккан – ашка пешкән!
Үзеңә хисап кылдыңмы, юлга чыгар алдыннан?
Күз яшьләрем агып чыкты Раббымны саганганнан...

Вакыт җитә, иптәшләрем, соңгы юлга чыгарга
Янчыкларыбызны асып, Рабыбызга кайтырга...
Аллаһ белә, әле тагын күпме калган яшәргә
Бирче Раббым иман белән ахирәткә күчергә!

***********