ЦХЬА ИЛЛИ САННА

***
Уьншарлера романтик

БIешерашкахь йиначу набарх самаваьккхича со,
Беран санна юханехьа Iамош суна абат,
— «Безам» дош —
Хьехархочуьнан багара дера дара хеназа,
Дагадоийтуш генара гIан: полла санна детталург,
Диц ца далийта ша шейн ма-хуьйлу гIертарг.
ТIаккха со гIур вара дуьне мел ду,
Хьуна везна волу сой юханехьа схьалаха,
Хатта цуьнга хьо дийна йолуш муха яра,
Цу хенахь йехачу цхьан йоIан áматехь
Хьан уьншарлера амат цхьан кепара юхакхолла.
ТIаккха цу хенара Iилманан наха
ХIоттор яра суна лерина музей,
Неонан басаршкахь транспарант юьллуш:
«Уьншарлера романтикаш хьовсийш муха баьхха».
Со вовза бохучу нахега со хьоьжур вара цецваьлла,
Сой сингаттаме маймал бен доцийла тIехькхиъна.

***
Назма

Дáлла бу хастам кхолларн вайн бIаьргаш,
Стигалла а, когаш кIела а хьажа йиш йолуш;
Дáлла бу хастам кхолларн вайн дешнаш,
Хиларн а, цахиларн а цIе тилла йиш йолуш;
Дáлла бу хастам кхолларна Iожалла,
Къоьлла мацца яьлла а чекхъера йолуш.

***
Клише

«Воьттина ву-кх хьо цу клишенашах», —
соьга аьлла Мусайн Рамзанас.
Суна-м ца хаьа уьш мичара йоьвла сан,
Луьйчуш ма ву со хIора кхаа дийнахь,
Тишъеллехь а бедарш сан, юьттуш ма ю ас,
ЦIенчига дIа а ма вуьжу со, схьахетарехь,
Йа йахъелла месаш сайн дIаларгийта еза те?
Хьена хаьа клишенашах цIанвала муха веза,
Цу тамашийначу лазарх тáвой хиджамас?

***
Чохьлазар

Иллешкахь буьйцушчу турпалхошшан а
Наг-наггахь чохьлазар кхетий
Дуьйцуш волу илланча хила лууш ву со,
Хьой а, сой а санна нах буй уьш гойтуш.
Мел болу консерваторийн и критикаш
Хьербоьвла хIуттур бара кхайкхада неIалташ,
Амма цул тIаьхьа турпал са паргIат церан даьлччехь,
ЦIеххьана чохьлазар шейна схьакхетча,
Шекбовлур бара уьш, Далла дIаиэцарг и илланча
Юха-а-тIаккха-а бакъ вуй те олуш.

***
Цхьа илли санна

Меттиг бу цхьанхьа,
Адаман дахар диканне хийцалу.
Мацалла хьоьгучунан доIанах
Цу меттехь довха бепиг хуьлу,
Йийсарехь бáлошчу нахана
Долу дуьне орцаха долу.

Меттиг бу-кх цхьанхьа,
ДIакхача паспорт а ца оьшург;
Салтешанн, спецслужбашанн а
Картехь карийр боцург.

Меттиг хир бу-кх цхьанхьа, буй,
Хьуна а, суна а Iа там болуш?
Цхьаьна кепар басахь байракх
Шен доьхьа лиэ вайга бохуш йоцуш.

Нагахь санна цу меттиган
Мацца а хила меттиг бацахь,
Со а, сан гIуллакхаш дуьненахь
Цкъа а хилла дац.