پړونی؛ ثاقب خپلواک
https://wp.me/p54r7z-DLy
ثاقب خپلواک

له سرې غربي سیلۍ دې ساته د حیا پړونی
زمونږ د ټولنې ښکلا ده، ستا د ښکلا پړونی

ته چې سنګر کې د حجاب یې، تل پتمنې خورکۍ
د یرغلګر نظر اجل دی، دغه ستا پړونی

چې له لیندو د سترګو وار شي، د لیدلو غشي
سَتَرْ دي ستر ډال دی،تا ژغوري له هر خوا پړونی

دلته دیوان ګرځي ځان دم کړه درنه لوټ یې نه کړي
د ښایست رمز دې شاپېرۍ دی، د حوا پړونی

د اسلامي تهذیب ستر ویاړ د انواراتو مظهر
چې درنه یو نه سي شرقي غربي هوا پړونی

د مرغلرې په څېر ښکارې، ای مستورې خورکۍ!
چې بدرنګۍ بدرنګه نه کړي، ستا زېبا پړونی

غربي شمال، عصري دجال ، کله منې ستا جمال
درنه لوټ نه کړي په نامه د پرمختیا پړونی

ثاقب خپلواک