قًصّيَدِةِ وَ شِاْعرَ 💙 📜 "

لمناسبة عيد الأم والمحتفلين به : إلى أمي _ نـزار قبـــاني
-----------------------------------------------
صباح الخير يا حلوه..
صباح الخير يا قديستي الحلوه

مضى عامان يا أمي
على الولد الذي أبحر
برحلته الخرافيه
وخبأ في حقائبه
صباح بلاده الأخضر
وأنجمها، وأنهرها، وكل شقيقها الأحمر
وخبأ في ملابسه
طرابيناً من النعناع والزعتر
وليلكةً دمشقية..

أنا وحدي..
دخان سجائري يضجر
ومني مقعدي يضجر
وأحزاني عصافيرٌ..
تفتش --بعد- عن بيدر

عرفت نساء أوروبا..
عرفت عواطف الإسمنت والخشب
عرفت حضارة التعب..
وطفت الهند، طفت السند، طفت العالم الأصفر
ولم أعثر..
على امرأةٍ تمشط شعري الأشقر
وتحمل في حقيبتها..
إلي عرائس السكر
وتكسوني إذا أعرى
وتنشلني إذا أعثر

أيا أمي..
أيا أمي..
أنا الولد الذي أبحر
ولا زالت بخاطره
تعيش عروسة السكر
فكيف.. فكيف يا أمي
غدوت أباً..
ولم أكبر ؟

علي طعمة ... حمل مريود


عتگ عطري اعله قمصاني
وانا متاني تجي تشمه
الهوه شرجي بالولايات
بس يم گذلتك نسمه

الوادم من تصيح اسمي تطشرني
بس السانك من ايصيحني يلمني

كبر اسمي يجديلك
وانا المطلوبلك چم ثار .. واختل منك بحضنك
واكلك ضمني وادخيلك
آنه الدمعته بعينه ويغنيلك

وشيخسرك ماتمر بيه
النفس مو بالهوه مرات ..مرات النفس جيه
ومرات الحمل مريود
عافية النهر ميه

اشبگني بحچي الذرعان
هذا انه خرز سبحه انشبگ باي خيط

يالچنك ردن مرتاح ماجاسك دمع مثلوم
صعب نتلاگه ساعة ويوم

ويماتدري انا وگلبي رجل عصفور
من تنكسر تتجبّر بكيف الريح
وانا الچني مطر بالصيف محد هاملي شما طيح

يالتغثني شكثر تنحب
وانا مثل الضباب اليحظن الشباچ
بس تطلع شمس ينذب

وهذا انه التتيهني هلي مرات
وبس انت التعرف شلون تندلني
احبك وانت تندلني
وتوجعني اربعينك بالشبه والله
موبس انت توجعني
وكلتلك لاتهد متني

انا عكازة اگوم الناس بس مااوكف الوحدي
ومثل في الگبر مكروه محد نايم بسدي

وانا الزعلان منك حيل
بس لوجيت اتلكاك بحرورة
عافية اليحب صورة

وثاريها الرسايل ناس

يماتدري الخمر مابين اصابيعك بري كل كاس

مصطفى الاشتراني ..راجعة


گالت طيحتك صعبة
شح ولاتجاملني الگظن سهلات
چملت الزعل غربة
اليضم بضيم گلبه
يموت من گلبه

راجعه وچنها الشوارع بالحرب بالليل
من تگظي الخسارة
تشتعل بعيوني تلمع ..نارها ونار الجكارة

تكلي ضيعتك خسرتك
وانه المضيعين حگهه
وانه وجه الخايفة وحمرة عروس
مطشرة بضيجة خلگهه

وانه دمعات العزيزة الخاوية الترسن حلگهه
وماحرمت اجدامي وعيوني وضحكتي
من المكانات العفتهه

وگلبي مثل ام البنات ..تضمضم اسرار الفضيحة
خاف ابوهه يشوف بتهه
وانت شمرة يانصيبك ..طره لو كتبه المحبة
تحبني وتذبني بوكتهه
وعيشتني احلام حلوة .. احلام چنهه اگصيبة امي
التنظفر بچفوف اختهه

حسبت لو لم تعبكم وامشي جناز بصوركم
راح املكم
وانتم اهل الروح واستاهل زعلكم

الليله شوگ حديثه روحي
تگص شعرهه الغالي عدكم
الليله تعب سنينكم كابوس طيفي
ومانمت ضل بالي يمكم

وانت ليلك هاحلاته.. ينوم النجمه اعلكلبه
وليلي مفتاح السجن
بعيون المضيعين دربه

ضوگتني الخوف ضِل
وچتفت ظني بحبل
وتكلي فنك .. چا شكلك
ضاع السوار الحديد الغالي منك

بيدي لميت الندم سويته سوله بذكرياتي
هوايه اسامي بلانفع خليتهه تطب بحياتي

كلشي جبته معاگب معاگب
يمن لاطال عمري لهالمحنه
وانه كلبي ارغيف جاهل
ياكل المرطوب منه
لاخذتني ولاحويتك بالعشگ طيحة عباية
بطرك الحچاية اعله اهلنه
واصرخ وصوت الصدى يچمل المتاهه
ويشتعل جفن الوفه بشذوة محنه

ودمعي ثورة ..شينكتل منهه استلذ
واترس قميص الليل منه

وآنه وي نفضة حواجبهه وحزنهه
ابجيت لاصيرن تعبهن
ومارضت كالت دموعك
وضحكت وكالت شحبهن

انه حافظ ملكه عينچ
اليكحلهه الفرح والزعل والحب حيل احبهه
وانه حافظ شوك نهدج من يلاكي چفوفي مهره
اشتاگت لخيالهه وتنفظ تعبهه

وانه ابو عيون البچت وشوبچت
وتعودت بجفاچ تنزر
وانه ابو ضنون الشحيحه الضايع البس عمره يكبر
وانه داعيج العثر من كلتي تعثر ...

عبد الوهاب الحمداني

حزني يجيسني ويالليل ..
حزني بعيد ،
غاد من الكلب حزني ..
أبعد من مكاتيبك ،

وأنت هناك غاد من الشعر مكتوب ،،
القصيده تجيب كلشي بعيد
بس ماتكدر تجيبك ،،

حزني بعيد ما ينلاح
مثل حزن النبوة وفشلة التفاح

حزن أعمه عالمرآية ..
حزن شاعر شعل روحه شمع لعيون الولآيه

حزن نثيه خذو منهه كصيبة وراي ..
حزن جرفين ما حفظن اسرار الماي

حزن كل العراقيين... وأدري هواي

-

محسن الخياط


يالحاشتك ايد الزمان وحاشت هموم
يالتيهتني بچول هجرك تيهة الشوم
بيزاري حچيك ما يكد يومين ويگوم
نفاش حبك وبگصب عشرتك ملموم
بس انكسر عود الگصب شاله الهوى بزوم
گص ضلعي من تمرگ عَلَي واكسرني لا اگوم
غيرك عشگ ساعة سهل وانت عشگ دوم

***

رد گبع خدود الخضار بريحة الصيف
وبكل مزاويّه الخضر رد گبّع الريف
للشوگ گلبي ظل طري ومتحزم بليف
وتلاشى حالوب الشتا وانا انتظر طيف

وبالروحة والردة الدرب كترين ملزوم
غيرك عشگ ساعة سهل وانت عشگ دوم

**

هذا انا ملّاح الجرف ذبه هوى الليل
تيه ومشحوفه شله بالحري يا ويل
وشراعه مدري بيا كتر ، عت ماخذه السيل
يالحبة الحلوة بهواك وريحة الهيل

يالعودك مگصمل وتازه وبرم مبروم
غيرك عشگ ساعة سهل وانت عشگ دوم

كاظم الركابي


مره گتلي
الما يمد روحه اعلى چفه تموت عينه
ومره گتلي
الصوت يكبر لو زغر ليل المدينه

من اهدها وطاحت عيون الشمس
شوك اعلى كلبك
من اهدها وتاه جدمك
ياغريب الليل عثره وخاف تلكاني اعلى دربك ..

ياشذر دمي الرسم شامه اعلى جيدك
طشني وي اخر نهار
ارسمني نگشة مستحه اتلوك اعلى ايدك ...

ياگصر شوفك جزاني ومعضد عيونك زغير
يا نهر طيح اعلى كلبي
من تضوك العطش عيني
اتخضر الدنيا قصايد من حرير ..

ومره گتلك ذكروني بغربة دموعي واديك
ويبست اجفوني ولكيتك
وذكّروني وذكّروني
وجان اخر موت ساومني وشريتك
ذكروني وفزن عيوني اعله طولك
سكتن وما كالن انت ..وماگلتلك !!

ابنادم من يضيع باجر ، دنيا يلكاها بصفنته
وﻻ كلتلك .... صوج عيني
الشالت عيون الجزوها الما عثر بيهم سهر
وحملتها ذنوب ليله
اشكبره ذنب الكاع لو مات النهر

وانت عاشك
موت بحرورة لهفتك
هي ذلة اعلى الشمع لو مات بارد
وانت ربح البارحه الخسرني عمري

اشما يصح شراي للهم .. انه همك
يابخت جتالي بيك
من يحز الشوك كلبي ايفيض دمك

ضياء محسن

الك بيه حزن بستان
مادگن عصافير الصبح بابه

ومشت عنه الشمس بسكوت
يوحشة ديرة اضنوني الدرت عنها الوجه تابوت
لگيتك گنطرة لحزني وتهجيتك نهر ياقوت
دبرني الحزن مو راي
مو فشلة القصيدة اتموت؟
وانت اهواي بعيوني حلم وجناح
وسوار وضحك وبتوت..

اخذني الفي مواويلك شمس ما جاسها ابنادم
اخذني الحلمك الغرگان اغرف من بگايا الدم
يشاعر اجوي حزني وياك
جويات الشعر بلسم
وعسى ذنب الحزن لو فاض
بعيونك سجج يلتم

انه ابنادم اجيتك من وطن گنطار
يضوي امن العطش حزنه..
وطن يتنخه بالماشين ويصلي اعله كل مزنة..
وطن ياشاعر العشاگ كلها اتحاول اتسجنه..
وطن غرگان بالفتنة..

تنيسن كل غبي ابگاعة وركض بالناس ريع الدم
وانقاض اشتهت انقاض مَعلم يسحگ اِبمَعلم..
يجابر حزنك وحزني وطن بي كلشي ما يسلم.
وطن سجانة مايندم.
وطن حكامه ما تفهم..

جواد زغير - يا غريب

روف جرحك ...
بالدمــع ...
باللـــوم ...
بالدخان ..
لابـد تلگه ذنبك
طيح مهيوب اعله تعبك
غني گلبك ..
للفرح ..
للـ أخ ..
للناس التحب والماتحبك
مـوت گد الليل مادام الصدك والعيب ربك
مـوت يا ذاك البعيد
مـوت يا ذاك اللگاله اهلال بس ما صحلة عيد

مـوت بسـك تشتعل للريح شــمعه
طيح هاي الدنيا عين و أنتَ دمعه

يا غريب ...
الغربة مليانه أصابع ..
بس أصابع ما يهمها شطاح و شبات اعله خـدك
يا غريب ...
هناك ما تلگه گمر يضوي اعله گـدك
يا غريب ..

هناك ما تلگه وجه بيه ماي من تحترگ وحـدك
ضيع بس ليوين حـــدك ..؟

أو وين حد هذا الضباب ..؟
يا غريب ...
الغربة من تكبر بدنيا تفيض بوب...
وچفك من سنين ما ضاحكله باب

يا غريب ...
وهو ذنبك ؟!..

ليـــش دللت العطش بـ الله كريم ..؟!
مــوت ياهو الوهمك بالناس غيم ..؟!
مــوت يا شبــاچ ضيم

مــوت هلبت من تموت تجيس حلمك
مــوت هلبت بالمگابر تحضى بـ بنادم يلمك
مــوت يا ذابل شتنطر ..؟!
ويـنها الريــه التشمك ..؟!
ويـنها چفوفه التنطرة وما ينطرك

خـاف ترخص بالمشابگ من تضمه وما يضمك
خاف بارد وانت حار يفور دمك ...

حسين العجيلي

گلبي الخضار ...الجوه نگاط الحب
ماعندي نقطة ضعف بس المغرب
والصور والرعشات البنص اليل
الي تحرك بابكم من اعتب
ليش
وياثكل اليش للماغلطان
خليتني حتئ من انام محدب

ليش اندعيلك واني ناوي ادعي عليك
ليش من افرع هوه الحنيه يهب

يل چني طالع من نهر مو من بيت
هيج من اَّربع يم صورك وكتب
وعيوني گاع وشلل صاب الفلاح
ياليل نشفن كافي بيهن تحلب

ظهري للمنخل صار شكايه توم
الراد منخل زين بيه يجرب

عوف الغريب الحمه من الرجلين
استخفاف ناسك بلجروح يعذب

حتئ امي صارت من ترد عل يسال
وشافني بمشراگة تاب مبلل
ياخيه ووليدچ شماله معلعل

وتگول مابي كلشي
بس جان يحب
يايمه چا هوه المراره من الچان
لو ما فراگة وشيتلچ ماشيَب

يايمه هوه الهجر توم السرداب
بثنينهن مطروح جثه ومترَب

مايتعب وگاضيها وگفه حظيظان
بليوجعن شايل نشاط المحرب

ماحچي مو مترهي بس عايز حيل
هوه الحچي بهل مواضيع يتعب

هوه الوضوح يزيد جرحك تعقيد
حظي ماگاعد ليش چي ماچذب
طين الله گام يركز علئ الهندام
دنيا تكشر وكليله رغابت لب

اي وانه چنت اجمع نهر من نگاط
و هساعه تايه چن حچي بلارباط
من الشيب صاير زلفي ينشاف گماط
ماهمه الكاتلني لهسه احبيب
ماكارهك ياا والله مابيه احتار
يــ لذة المشراگه عند شويب

ممنون هوه الجرح يصنع رجال
والعمر مابي اخ ..هم مو طيب

مرتجى سعدون.....

وادعيتك

وادعيتك...وادعيتك،
.وانچفن دمعاتي كلهن من مشيت...
.اشگد بچيتك مادريت،

.حلمي انته وناس تحلم بالرغيف..
.ليش طولت المسافه وچان موعدنه رصيف..

.ماگلتلي الغربه كاااس..
.ماگلتلي افراگ وجهك ماتسده اوجوه ناااس..
.چنت اشمك والگه روحي،
.اسولف احچاياتي ياس...

.علمتني اشماا يمر الليل اغفه ابحس نبرتك..
.اشماا اريد اعشگلي اوادم تخطر ابالي عشرتك.
.مره گتلي اذنوبي مشتهيه ضوااك..

.ومره گتلي اعيوني جنه..
.وانه گتلك ما اگودك اله نيتك بيها حنه..
.ليش چفك ماخذاني..
.وياعشگ بعدك عرفته،
.وشيب عشريني خذاااني..
.الچنه من نسمع حچيهن واحنه نحلم،
.هسه خنگني الاغاني...

.من رحت عني ومشيت،الساعه ماتعرف تميل
.والدروب اتهيس الجدم الثگیل..

.و اشكبرها اولايتي وعايش غريب.
.ويني او وين التراچي،
.وشنهي و امناطر حبيب..
.حلمي البسك حلقه بيدي.
.اشدخل القسمه ونصيب..

معتز سامي الحمداني

باب //

( كنتُ أظنّهُ آخرَ الأبوابِ ولكن ....)

هواي ــ يا باب الحزن ــ كل هالمحبة

ردت أشَوفك غصن گلبي
شكثر بيه توديع ..، وشچم لون ندبه
ردت أشوفك ثوب گلبي ..
شكثر شال تراب من دروب غربه

واشتكيلك من فخاتيه التروح ..، وما تجي
وتنسه وتعذبه
ومن حلم عمره الــ إمتعبه

ردت أجي گبالك واگلك :
شمّـتَت بيّه الفلح موتة شَتِلتك
يا فشلتي ....، ويا فشلتك

عاندتني بكلشي ردته
وكلشي أحبه ..، وما أحبه

ردت أجي و اوگف وادگك ..
وشفت مامش بيك للحبّوك ..... عِتبه !

بلال الصافي

كل رساله اتغثني ارجعهه ابظرفهه
ومااسولف بيهه يمي
وباقي احبك
وانت كلشي البيك يشمرني اعله همي

كل مواعيدك ترد بيه ابقصيده
اتفك علي بيبان حزني
والقصايد كثرن وبعدك متقره
مُرني تلكه انسان يستاهل تِعذره

مرني تلكه الضحكه غاد من الحقيقه وكلشي مامش بين اديه
وانت تندلني ومعزتك تدري بيهه
شنهو الامخرك عليه ؟

مُرني جنحين ارد اشوف الدنيا شنهي ؟
مُرني تلكه اولايتي مسميهه بسمك
واشعل الفانوس يم ظلمة شوارعهه الحزينه اتلاكي تعبي ويمه اسمك

اتلاكي لون اولايتي الباهت يفرفح من يجيسك
الهسه يم الكلشي وجهك
وانت ماكو
الهسه ينده بيه عمري وبيك اغني
والزواجل تيهتني؟
مدري مكتوبك يغثهه وما تصلني؟

واني خايف
يوم الاتلاكيني متطشر تلمني ومااعجبك
بيهه اكلك !
هدني خل احلى واجيلك
ومن تهدني

اركض اعله اصورك اَخذ منهه عيني
واركض اعليك واجيبن روحي منك
واخذ ايدك حتى بيهه امسح دمعتي
اي واضم خوفي وقصايد ما تهمك
واوكف كبالك خطيه

يا حبيبي الدنيا تكرهني واحبك
يا حبيبي وليش خليت العمر ذمه بركبتك؟
وليش بايع روحك الكلمن ميستاهل ضحكتك؟
وانت همي
يا دواي بيا جرح كاعد تروف وناسي دمي؟

بيا اذن كاعد تغازل؟
يا حجي مسيس بأذانك؟
بلكي حاجوز بوسط هوسة غزلكم يدخل اسمي

جنت اكلك
لا تضيعني تره الرادوني كثروا من صرتلك
وجنت اكلك
ضوكتني اسنيني كلهه بغير واهس من صحتلك
شككت ثوبي السنين وما كلتلك
وجنت اكلك

عودت كلشي اعله بابك لا تسافر
المن اتعوف الطيور التغبش اترتب شجرتك
عودتنه انحب ضحكتك !
وتالي بأثارك غفينه وبيهه متنه
عودتنه !!!
واكطعت كلشي ولا جن عودتنه

احمد الزرفي


يا بريد يجيبلي عيونك
رسايل غافيه بنصّ الظرف

وانته تدري
من اقره عينك انشتل بـ أول حرف

النجمه
من تنزع ضواها تختل بسدّ الجرف

بيا مرايه مّن الحزن يلتم شبابي

بيا چفوف من الفرح يتغنّه بابي

بيا ظفيره اتلمّس اسمك بـ الرسايل

بيا سما اندلك واجيلك
وارسم عيوني اعله گد خصرك حمام

ويا بريد يودّي شوگي
اليمشي حافي بسچّه جام

لا تجي بطيفي وصفنتي
ولا يصح طارش يودّيلك سلام

كون اصدّگ ما تجيني
حتّه المّ چفوف اديّه
البقت تدعي بكل امام

ايهاب المالكي

محتاجك گبل

محتاجك ﻛَﺒﻞ ﻣﻮ ﻫﺴﻪ ﻭﻛﺘﻚ ﻓﺎﺕ
ﻛﺒﻞ ﺍﺳﻨﻴﻦ ﺟﻴﺘﻚ ﺟﻨﺖ ﺍﺗﺎﻧﻴﻬﺎ
ﺍﻧﺎ ﻣﺎﺻﺪﻛَﺖ ﺗﻨﻄﺒﻚَ ﻋﻴﻨﻲ ﺷﻠﻮﻥ
ﺃَﺭﺩ ﺍﻓﺘﺢ ﺟﻔﻨﻬﺎ ﻭﻛَﻮﻩ ﺍﺻﺤﻴﻬﺎ

ﻏﺾ ﻋﻴﻮﻧﻚ ﻭﺷﺮﺩﻧﻲ ﺧﻠﻲ ﺍﺭﺗﺎﺡ
ﻭﺍﻧﻲ ﻋﻴﻮﻧﻲ ﻋﻨﻚ ﺭﺍﺡ ﺃﻟﻬﻴﻬﺎ

ﻭﺍﺣﻠﻔﻠﻲ ﺷﺒﻪ ﺣﺘﻰ ﺍﻗﺘﻨﻊ ﻏﻠﻄﺎﻥ
ﻛﻔﺎﺭﺓ ﺍﻟﻴﺤﻠﻒ ﺗﺎﻟﻲ ﻳﻨﻄﻴﻬﺎ

ﻭﺑﻌﺪ ﻻ ﺗﻠﺘﻔﺖ ﻟﻠﻤﻮﺗﻪ ﺍﻟﻴﻤﺮﻭﻥ
ﺍﺫﺍ ﻻﻛَﺘﻚ ﺭﻭﺣﻲ ﺑﺪﻭﻥ ﺭﺍﻋﻴﻬﺎ

ﻣﻦ ﺍﻛَﻠﻚ ﺭﺍﻳﺢ ﺍِﺑﺮﺩ ﺣﺘﻰ ﺍَﻇﻞ ﺯﻋﻼﻥ
ﺍِﺣﺰﻥ ﺑﺲ ﺣﺴﺮﺗﻚ ﻋﻨﻲ ﺍﺧﻔﻴﻬﺎ

ﻭﻻ ﺗﻘﺮﻩ ﺷﻌﺮ ﻳﻤﻲ ﻭﻟﻮ ﻟﺤﻈﺎﺕ
ﺳﻤﻌﻨﻲ ﺳﻮﺍﻟﻒ ﻭﺯﻥ ﻣﺎ ﺑﻴﻬﺎ

ﺭِﺩ ﺍﻟﺬﻛﺮﻳﺎﺗﻲ ﻭﺳﺪ ﻋﻠﻴﻚ ﺍﻟﺒﺎﺏ
ﻭاﺳﻮﺍﺭ ﺍﻟبَﻃﻮﻟﻚ ﺭﺍﺡ ﺍﻋﻠﻴﻬﺎ

ﺍﺩﻣﻦ ﻋﺎﻟﻨﻔﺲ ﺑﺲ ﻣﺮﻩ ﺍﺫﺍ ﺟﺮﻳﺖ
ﻧﻔﺴﻲ ﻭﻣﻦ ﻫﻮﻩ ﺍﺳﻤﻚ ﺭﻳﺘﻲ ﺍﻣﻠﻴﻬﺎ

ﻃﻔﻴﺘﻚ ﺟﻤﺮ ﻛَﻮﻩ ﺍﺑﻄﻼﻉ ﺍﻟﺮﻭﺡ
ﻣﻦ ﺍﻟﺪﺧﺎﻥ ﺳﻮﺩﻩ ﺍﻟﺪﻣﻌﻪ ﺍﻟﺒﺠﻴﻬﺎ

اعشك وحدك ﻛﻮﻥ ﺍﻧﻲ ﻣﻮ ﻭﻳﺎﻙ
ﻭﺍﺩﻭﺍﺭ ﺍﻟﻀﺤﻴﻪ ﻟﻐﻴﺮﻱ ﺧﻠﻴﻬﺎ
ﺧﻀﺖ ﺍﻟﺘﺠﺮﺑﻪ ﻭﺷﻔﺖ ﺍﻟﺨﺴﺎﺭﻩ ﺷﻠﻮﻥ
ﻣﺮﻩ ﺷﻤﺎ ﺧﻄﺘﻬﺎ ﻭﺭﺩﺕ ﺍﺣﻠﻴﻬﺎ

ﺑﺎﻟﻘﺪﺭﻩ ﻛﺪﺭﺕ ﺍﻧﺴﻰ ﺳﻬﻞ ﺫﻛﺮﺍﻙ ؟ !
ﺍﺣﺬﺭ ﻣﻦ ﺻﻮَﺭَﻙ ﺧﺎﻑ ﺍﺣﺎﺟﻴﻬﺎ

ﺍﻧﺎ ﻣﺜﻞ ﺍﻟﺨﺮﺯ ﻋﻨﺪﻱ ﺍﻟﺠﺮﻭﺡ ﺍﻧﻮﺍﻉ
ﻛﻞ ﻭﺍﺣﺪ ﺑﺤﺎﻟﻪ ﻭﻣﻴﺰﻩ ﻳﺤﻮﻳﻬﺎ

ﺣﻤﻞ ﺑﺲ ﺍﻟﺜﻜﻞ ﻣﺮﺍﺕ ﻫﻢ ﻣﻄﻠﻮﺏ
ﺍﻟ ﻳﻄﻴﺮ ﺍﻟﻜﻮﺍﻏﺪ ﺧﻔﺔ ﺍﻟﺒﻴﻬﺎ

ﺣﺒﻨﻲ ﺑﺮﺍﺣﺘﻚ ﺟﻨﻚ ﺗﺰﻭﺭ ﻛﺒﻮﺭ
ﻣﺎﺍﻣﻠﻚ ﺩﻣﻮﻉ ﻛَﺒﺎﻟﻚ ﺍﺑﺠﻴﻬﺎ
ﺗﺪﺭﻱ ﻣﻦ ﺍﻟﻐﺼﻦ ﻛﻞ ﺍﻟﻄﻴﻮﺭ ﺍﺗﻄﻴﺮ
ﺍﺫﺍ ﺑﺲ ﻣﺮﻩ ﻭﺣﺪﻩ ﺍﻟﭽﻴﻠﻪ ﺗﺨﻄﻴﻬﺎ
ﺣﺒﻨﻲ ﺑﻼ ﺳﺒﺐ ﻭﺑﺪﻭﻥ ﻛﻞ ﻏﺎﻳﺎﺕ
ﻫﻴﺠﻲ ﺑﻼ ﻣﻘﺎﺑﻞ ﻟﻠﻪ ﺳﻮﻳﻬﺎ

ﻣﻮ ﻛﻞ ﺍﻟﺰﺭﻉ ﻣﺴﻤﻮﺡ ﺍﻟﻚ ﺗﺤﻮﻳﻪ
ﺃﻱ ﻓﻼﺡ ﺍﺳﺄﻟﻪ ﺍﻟﻮﺭﺩﻩ ﻳﺤﻮﻳﻬﺎ ؟!!!
ﻳﻞ ﺑﺮﻭﺣﻚ ﻗﻔﺺ ضجت ﺑﻼﺑﻞ ﺑﻲ
ﺍﻧﺎ ﺭﻭﺣﻲ ﺍﻟﻌﻨﺎﻛﺐ ﻋﺸﻌﺸﺖ ﺑﻴﻬﺎ

ﺍﺭﻳﺪ ﺍﺩﺧﻞ ﻛَﻠﺐ ﻣﺎ ﺍﻟﻜَﻪ ﺑﻲ ﺗﻤﺜﺎﻝ
ﻭﺃﺳﺄﻝ ﻋﺎﻟﺤﻀﺎﺭﻩ ﻭﻳﻤﺘﻰ ﺑﺎﻧﻴﻬﺎ

ﻣﺎﺍﺭﻳﺪ ﺍﻟﻴﻀﺤﻲ ﺑﺮﻭﺣﻪ ﺑﺲ ﺍﺣﺘﺎﺝ
نص التضحيات الچنت اضحيها

الوجع الاهوازي اللذيذ

موعود قاسم الرشيدي


صوت جدام ...
صوت شگد عرف
بس ما اوچدنه عليه الثام
مفتاح ايتلافت بالقفل
چا حزني يمته اينام ...

اهنا مامش ضوة
مامش ضوه
هدني وراي احلام ...

انا بهذا العمر وحدي
انا مسجون بسنيني و عليه اعدام

اذا اگلك انا امعذَب تصدگني ؟
اذا گلك انا امغرَب ترجعني ؟
ولك چنك تعرف منين تلزمني ؟
ولك چا وين تاخذني ...

انا منسي و لا صحلي عرف بالناس
انا وشاله إنست بالكاس ...

يـ وَن الفاجدات يهيد يم نوحي
يغربان الحزن كلهن عله سطوحي

هاي المره.. الجابت بيدها طفله
و اجت للمگبره : روحي ...
های الما درت شنهو الفرح : روحي ...

انا بهاي المدينة التذبح الثوار اخاف امشي
اخافن والنعاس مچلب برمشي

اخاف ابلا هلي ردني
واذا تعبتك و مليت
شد عيوني و بقمصاني ادفني ...

عقيل العرد


عليچ طيوفي حيل هواي نشدوني

شلونك كالن..
وكلتلهن شلوني !؟

مستاحش خضاري ولهفتي ولوني

لا واهس ولا ضحكة التبرد الروح
مفضوح العشك
والدمع هم مفضوح
كلتلهم عمى اسود... وانطفن لولاج
لو ما صورتج ما فتح عيوني

وينشدوني عليچ هواي
ربعي
وصفنتي
وحزني
وعصافير الصبح
والورد واشعاري

البعيدة الغالية
يمراية الحلوات

ياسولة لساني وهوسة افكاري
ترى بلياج ما ينجاب كل طاري

ترى بلياج ليلي معزب الحسرات

وهلا تنگل هلا
وفركاچ خطاري

وشخبارج ... وشخباري

عايش عالهوى وفركاچ

صورة وتعب بسماري

كاظم اسماعيل الكاطع


مثل الحرير الشعر
وعيونك ملوّنه

والوجه دورة گمر
وشموع راس السنه

ما شبّهك بـ الورد

يذبل بلمسة برد

وانته الي تنطي ثمر
بأربع فصول السنه

النرجس احله ورد
وانته احله من عنده

شامات الك بـ الوجه
وحده احله من وحده

لعيون بيها سحر

تشبه قصيدة شعر

صوتك موسيقى ونغم
منّك عرفت الغنه

صوتك بلابل صبح
وعيونك تغني

والناس ما صدّگت
بـ الحب تبادلني

لمّن يطل الوجه
الكل علي تنتبه
ولو يوم ما نلتقي
يومك يمرّ بسنه

..