مساء الخير
من شوية روحت الكافية اللي دايمًا كنا بنتقابل فيه، قعدت على الترابيزة اللي بتطل على الشارع علشان أشوف الناس زي ما أنا متعودة، بس تعرف المكان أتغير يمكن علشان فات وقت كتير مارحناش سوا أو يمكن أنا اللي اتغيرت.
طلبت قهوة سادة زي ما أنت عارف بشربها بس وأنا حزينة.
كان صوت الست بيهز المكان بصوتها القوي اللي مليان عتاب، كأنها بتفوقني من غفلتي وإن لازم أنسى وأبعد عن كل الأماكن اللي جمعتنا سوا.
سألت نفسي أسئلة كتير، لساك لما بتزعل بتقفل عليك وتسكت!
لسه بتحب القهوة الفرنساوي!
لما بتتضايق بتحكي لمين!
هل لسه متذكرني!
لسه بتيجي الكافية وتقعد على نفس الترابيزة ولا كل دا أتغير!
هل كنت فعلًا بتحبني ولالأ!
يمكن الوقت غير كل المشاعر اللي جواك.
بعد كل التفكير دا أتوصلت لقرار إني هعدي وأنسى ولازم أفوق لنفسي وأطلعك برا قلبي، يمكن الغريب في كل دا إن في الوقت اللي بقرر إني أنساك ألاقيك داخل الكافية.
يمكن القدر ساعتها كان بيقولي ها هتسني ولا هتجري تكلميه وتنسي وجع قلبك.
لقتني بسحب شنطتي وحاجاتي وبخرج برا من غير ما أتكلم، يمكن علشان قررت أبعد.
الفراق بدون سبب بيخلي المشاعر تتحول لحاجات مش مفهومة بتخلينا ننسى، ونفكر في نفسنا بس، يمكن في أغلب الأوقات بيخلص الرصيد لشخص اللي بنحبه بيبدل الحب لمشاعر مش مفهومة.
بصتلك بصة أخيرة ومشيت وكان صوت الست لسه في ودني وهي بتقول
"أخترت أبعد وعرفت اعند حتى الهجر قدرت عليه شوفت القسوة بتعمل إيه! "

_شاهندا أبوزيد