Sitora Qarshiyeva | Blog

#türkiye_bursları

“Türkiye bursları” grant dasturi 1992-yilda tashkil topgan boʻlib, YTB (Yurtdışı Türkler ve Akraba Topluluklar Başkanlığı) muassasasi tomonidan moliyalashtiriladi.

Grant har yili bakalavr, magistr va doktarantura bosqichlari uchun dunyoning 168 mamlakatidan 5000 talabaga to‘liq stipendiya ajratadi.

Stipendiya yutgan talabalar:

• Samolyotda bir martalik borish-kelish bileti;
• Yashash uchun ruxsatnoma;
• Sogʻlik sugʻurtasi;
• Oylik stipendiya (hozirda 5000 TL);
• Bepul yotoqxona (yotoqxonada tekin ovqat beriladi);
• Ta’limning 2-yilidan yashash uchun oylik yordam puli (hozirda 4000 TL) bilan ta’minlanadi.

Bulardan tashqari, talabalar uchun juda koʻp imkoniyatlar mavjud. Masalan, chegirma narxda beriladigan “Müze kartı” bilan muzeylarda ancha arzonga sayohat qilishingiz mumkin!

Universitet oshxonalarida esa, talabalar uchun hamyonbop va to‘yimli ovqatlar mavjud. Qolaversa, ko‘pgina mashhur restoranlarda ham talabalar uchun maxsus “Öğrenci menüsü” bo‘ladi...

@sitoraqarshiyeva

"Türkiye bursları" haqida post tayyorlayapman. Ungacha "Dengiz dunyosi"ga borganimizda sizlar uchun olgan rasm-videolarimni tomosha qilib turing.

Nimanidir eslagandek bo'ldingizmi? 🙂

@sitoraqarshiyeva

Mahdi 6 oylik odamcha bo‘ldi!

Endi uning yotog‘i va ovqatlanadigan stulchasi bor. Endi kechqurun men ham, u ham xotirjam uxlaymiz! Endi bir dasturxon atrofida oilaviy ovqatlanamiz!

Kutilmagan bunday tuhfa uchun @biziston'liklarga tashakkur, syurprizning kattasi bo‘ldi o‘ziyam, Alloh rozi bo‘lsin sizlardan, borlaringizga shukr!

Yetkazganiga shukr! ✨

@sitoraqarshiyeva

Turkiya - mushuk va kuchuklar qadr topgan makon! 😊

@sitoraqarshiyeva

Bugungi post Mahdi haqida! 🐨

Mahdining chetda tugʻilgani asosiy vaqtimni u bilan oʻtkazish uchun imkon berdi. 1-uch oyligida biroz qiyin boʻldi, lekin keyinchalik hammasi tartibga tushdi. Hozir usiz bir kunimizni ham tasavvur qila olmaymiz. Hayotimiz u bilan mazmunli. U bilan yanayam baxtlimiz!

Kitob doʻkoniga kirsak, albatta, Mahdi uchun kitobcha koʻtarib chiqamiz. Koʻproq toza havoda aylansin deb kechqurun sotib olmoqchi boʻlgan narsalarimizni ertalabga qoldiramiz, mahallamizning sokin ko'chalarini birga aylanamiz.

Mahdi yoʻlda uchragan mashina, mushuk, odamlarga hayratlanib qaraydi, daraxt shoxlariga qoʻl uzatib barglarga tegib koʻradi, qo'lchasini ushlab qolishga ulgurmay qolsak og'ziga ham solib oladi.

Uning birinchi kulgusi, hayrati, yig'isi, qiqirlagan ovozi, hamma-hammasini, qachon va qanday boʻlganini yonida koʻrib katta qilyapmiz. Bir ota-ona uchun bundan ortiq baxt bor ekan-mi?!

Siz-chi? Siz farzandingiz bilan kunlaringizni qanday oʻtkazasiz? Izohlarda suhbatlashamiz 🔥

@sitoraqarshiyeva

Turkiya deganda tasavvurimda dengiz, kemalar, chag‘alaylar jonlanardi. Lekin...

Ilk suratda Anqaraning tepadan ko‘rinishi. Avval Istanbulda to‘xtab, “peresatka” bilan Anqaraga uchgandim. U yoqda dengizlar, portlar, kemalar... qanday hayratlantirgan bo‘lsa Anqaraning qup-quruq dalalari shunchalik hafsalamni pir qilgandi...

Xo‘jayinim bu yerga mendan 10 kun oldin kelib oteldan joy va ish topib turganlar. Oteldagi xonamiz juda tor va yoʻl ustida joylashgandi.

Homiladorligim uchun ko‘chadan keladigan sigaret, har xil ovqatlarning hidlari behuzur qilib, dimog‘imga tiqilardi. Bir oy uydan o‘zim bilan olib kelgan samarqandnon va saryog‘ yeb yurganman...

Turmush oʻrtogʻim ishga sahar ketib, yarim kecha qaytardi, bir o‘zim, uy-o‘qish, o‘qish-uy bo‘lib, aylanishga ham chiqa olmaganman, shahar ko'zimga kulrang va juda sovuq tuyulgan boshida.

Keyinchalik esa Anqarani bor ranglarida ko‘rib boshladik, kashf etdik bu shaharni, bu uchun esa qancha umrimiz, vaqtimiz ketdi...

Davomi bo‘lsin - “❤️‍🔥”

@sitoraqarshiyeva

Assalomu alaykum! ❤️‍🔥

Ko‘z tegmasin, ancha odam yig‘ilib qolibdiku, endi sekin boshlasak ham bo‘larkan. Xush kelibsiz, yaxshilar!

Hayratlanganim, bu blogni hali hech qayerda reklama qilganimiz yo‘q, tavsiya chiqmadi biror joyda, kontaktimdan hech kimni majburlab ham qo‘shmaganman :)

Demak, sifatli, foydali va manfaatli ma’lumotlar berishim kerak, shuncha inson kelibdimi, vaqtingizni bekorga olmaymiz, Xudo xohlasa.

Tayyor bo‘lsangiz, sizga nima qiziqligi, bu yerda qaysi mavzuda ko‘proq o‘qishni xohlashligingizni yozib ketsangiz, xursand bo‘lardim:

• Turkiyada ta’lim: o‘qish tartibi, yotoqxona, sarf-xarajatlar - 🔥
• Turkiya burslari haqida ma’lumot - 🦄
• Kundalik hayotimiz, life style postlar - 🥰
• Mahdi, o‘g‘limiz bilan o‘tayotgan kunlarimiz, onalik tajribalarim - 🐳

Izohlar ham sizga muntazir, so‘ylang, qulog‘im sizda🫠

@sitoraqarshiyeva

👋 Assalomu alaykum!

Ismim Sitora, Samarqandda tugʻilib, Navoiyga kelin boʻlganman.

Xoʻjayinim bilan Toshkent davlat oʻzbek tili va adabiyoti universitetining filologiya fakultetida birga oʻqiganmiz.

Hozir Turkiya poytaxti Anqara shahridagi nufuzli Hacettepe universitetida magistraturada tahsil olyapman. Burs yutib kelganman! :)

6 oylik oʻgʻlimiz bor, ismi Mahdi, Anqarada tug‘ildi. Ko‘z o‘ngimizda katta bo‘lyapti. Er-xotin Xudoning izni bilan eplayapmiz hammasini😅

Kanalda oila bilan Turkiyada yashash, ta’lim olish, Turkiya burslari stipendiyasi, sayohatlar, oilaviy hayotimiz, kundaliklar, kulinariya, umuman, hamma narsa haqida yozaman.

Kanalga yaxshilab joylashib, yangi sarguzashtlarga tayyor turinglar. Tez orada boshlaymiz, hammasini bir boshidan hikoya qilib beraman! 😉

@sitoraqarshiyeva