#مقتطفات
بقرا معاي ف نفس الجامعه..لكن م دفعتي ولا نفس مجالي..انا بقرا صيدله وهو طب..وتقريبا متخرج لكن عندو مواضيع ف جامعتنا ف بجي كتيير..اسمو باسل ومن.اول مرة شفتو فيها وانا م قادره انساهو..دايما بجي ف بالي..رغم انو م بعرفو ولا بعرف اسمو بس دايما بشوفو من بعيد..وم بنكر انو بينا شوية.نظرات او يمكن بالصدفه عيونو بتقع ف عيوني..بس بتتكرر كتير الصدفة دي..شخصيتو مرحة ومجنون..يعني م بتقال دكتور لانو الدكاترة بكونو رزينين وهادين ع الاغلب..بكون دايما واقف مع اصحابو وبتعاورو كلهم ولا بيضحكو..والجامعه كلها بتعرفو لحدي الدكاترة البقرونا..واهم.اكتشاف اكتشفتو انو م مرتبط..هنا انا ارتحت شديد..
عندي ود اهلي اسمو عبدالله شغال ف صيدليه حقتو من سنه تانيه نزلني معاهو عشان يعرفني ع الادوية..بغشاهو من الجامعه طوالي وبرجع بيتنا زي 8 او 9 كدة.وطبعا اهلي بكونو عارفين اني شغاله ف الصيدليه يعني ما بقلقو..وبديني مرتبي ف الشهر زيي زي الصيدلاني المتخرج ف نافعني شديد..
اول م بديت اشتغل بقيت بساعدو ف الادوية وبنرصرصا ف الرفوف ومنها بشرح لي عنهم..يوم عبدالله قال عازمني ع حسابو من كافيه جديد فتح جمبنا وقلي بايعي ع حسب معرفتك لكن هسه انا بجي..اتوترته شديد لكن قلته خلاص اعتمد ع نفسي..مع اني النوع الملبوش داك..
جا داخل باسل الما بغباني شايل ليهو رشدته قام مداها لي..فيها كلام غريب كده..لفيت الورقه ورا وقدام م قدرته اقرا الشخبطة الفيها عاينته ليها مسافه وعاينته ليهو قلته ليهو..عندك دوا معين انت دايرو؟
قالي م هندا مكتوب عندك ف الورقه مالك م بتعرفي تقري..عاينته ليهو بي غيظة شديده وقلته ليها النمله الوقعت ف الحبر وجات رقصت ليك ف الورقة دي امشي اسألها كتبت شنو..
حسيتو ماسك ضحكتو يالله يالله..قام ختف الورقه من يدي وقالي الدكتور الاصلا شغال هنا وينو؟
قلته ليهو مالي م ماليه عينك.. ف اللحظة ديك جا داخل عبدالله اول م شاف باسل قاليه اووو باسل وين انت..وسلام الاولاد الكتير داك..قام عبدالله ختا لي كبايتي قدامي وهو لسه بتونس مع باسل..دايره اشيلا كدة القا باسل مدا يدو وشالا وطوالي ع خشمو..اجي يا الحقارة ده مالو ده..عاينته لي عبدالله لقيتو مندمج مع باسل..وولا ع بالهم الاتنين..انا الحركة.غاظتني لمن دايرة ابكي..م عشان شال النسكافيه بتاعي عشان عامل فيها رايح لكن م قدرته افتح خشمي..ف نص الونسه كدة باسل قال لي عبدالله دي شنو الدكتورة الجايبا تبايع ليك دي وهي قرايه م بتعرف تقرا..عبدالله انفقع بالضحك وعاين وقلي صحي يا عدن؟؟ قلته ليهو صحي شنو..جايب ليهو شخبطة وقالي اقريها..هنا باسل قعد يضحك لمن دموعو جرو..قام عبدالله قعد يضحك وقاليهو انت حركاتك دي اصلك م بتخليها..م تزعلي منو اي دكتور يجي هنا بيجي يمقلبو بي ورقه مشخبطة ساي..وقبل كدة وحدة ادتو دوا ساي ولمن عرفت انها شخبطة حلفت انو الشخبطة دي قريبة لي اسم دوا..حسيتا كأنها اهانة لي عشان لسه دكتورة صغيرة..وحلفته كان خشمي يلاقي خشمو..اخد ونستو مع عبدالله ومرق..عاينته لي عبدالله وقولته ليهو بي غيظة..مالك بتصاحب المزعبرين ديل ف اللحظة ديك جا راجع وشايل ليهو كباية نسكافيه وختاها لي قدامي وقلي..عن.كبايتك الشربتها قبيل..معليش انا مزعبر وبشرب كبابي الناس..ومرق
م عرفته اشربا ولا ادفقها ولااعمل شنو..وبعداك بقى دايما يجي الصيدليه يتونس معانا وكل مرة بيعزمني ع كباية نسكافيه ع حسابو..يوم رجعته من الجامعه متأخر وكان عندي امتحان تاني يوم فقعدته مع عبدالله لانو كان بشرح لي وكلمته اهلي انو حأرجع متأخر..وطبعا كالعادة باسل جا..شي يشرح وشي يضحكنا وشي يتعاور..قام عبدالله جاهو تلفون ومرق ينضم برا..ختيت الشيتات بي الجمبه واخدت لي نفس عميق من الزهجة بتاعت القراية..اتلفت ع باسل دايره اقوليهو حاجة لقيتو بعاين لي عين غريبة كده..قام قلي تعرسيني! بدون مقدمات وبدون اي خاتم ولا بدون اي تمهيد بس فجأه كدة فتح خشمو وقلي تعرسيني يا عدن؟!
طبعا انا قايلاهو بهظر قمته قلته ليهو هسه كان السودان ده ما يفضل فيهو ولا راجل غيرك..بعرسك؟
اتوقعته حيضحك ولا حيصر لي بهظار لكن لسه تعابيرو كانت جادة.تماما..قلي انا جادي..عايزك تحددي لي موعد مع اهلك..لكن بالاول وريني بتوافقي تعرسيني!ف اللحظة ديك جانا راجل داخل فجأة.ومتوتر قال مرتو بتولد والاسعاف اتأخر ودايرين ليهم دكتور لانو راس الولد مرق طوالي باسل اتناول جكيتو وقاليهو انا دكتور..المدام وينا؟..جرى الراجل وانا وباسل وراهو..دخلنا بيت متواضع كدة وصوت المرا وهي بتكورك ظاهر من ياتو اوضه..دخلنا الغرفه وفعلا كانت ف وضع لا تحسد عليه..لكن المويه الحارة جاهزة وفي كم حاجة بتساعد ع الولادة..جمب المرا واقفه واحدة تانيه اظنها نسيبتا وبتهدي فيها..كنت قبل كدة شفته لي كم مقطع عن الولادة الطبيعيه يعني عندي خلفيه عنها..يلا بقيت واقفه مع باسل زي دكتورة النسا والتوليد وواحد..اول م طلع الجنين ورصعو ع خفيف وبدا يصرخ قام قاليهم مبروك دي بنية الابو فرح.