السادس..!
قبل مندخل السادس جان الكل يعيشنا برهبة السادس جان الكل يحسسك ان هي نهاية الطرق جان الكل يخوفك قبل ميكلك اي شي و نسمع هذا الشي بالبيت و بالمدرسة و بالطلعة و مرات حتى ويه الاصدقاء
اووو طالب سادس خطية انتوا
طالب سادس و تطلع معقولة!
طالب سادس و تاكل اكل؟ انت المفرض مكابل الكتب و اذا تريد تاكل ف تاكل كتب بس
طالب سادس اصلا شعندك عايش روح موت...
و يمكن بطرق بعد اكثر بشاعة جنا نسمعها
صارت رهبة من هالمرحلة اكثر من ان هي مستقبل و تحدي
من المتوسطة واني انتضر هذه المرحلة بس حتى استكشف، بس حتى اشوف شنو هاي المرحلة
و بلمحة لكيت نفسي طالب سادس و هنا جان كدامي خيارين الاول اني كضي السادس كله ابجي و اكول صعب و ماكو وقت و مواد ما منها فائدة و ضياع وكت او ان اعتبر الموضوع تجربة حالها حال اي تجربة نخوضها بالحياة ممكن ننجح و ممكن نفشل و ممكن نعثر و ممكن نتميز...
و توجهت للخيار الثاني وهو اعتبر المرحلة مجرد تجربة و مغامرة تجمع بين الجد او الراحة و بين الحلم او الفراش وبين ان اتحمل مسؤولية او ما اتحمل شي وهذا الموضوع ما جان مقتصر على السادس انما كان بحد ذاته بناء شخيصتك او اساس شخصيتك
وهنا بحد ذاته جان شي كلش حلو ان تبدي تصير قائد نفسك لأدارة وقتك و مهامك وتحديد اولوياتك بهذه المرحلة و تصير حرفيا عبارة عن مدير و منفذ تكعد تسوي الخطة انت ك مدير و بعدها تطبق الخطة ك منفذ، تتخلى عن اشياء جنت تتوقع مستحيل تتركها، تترك صفات وعادة غير مناسبة او لائقة بيك فقط لانك صرت قائد و منفذ
اشوف السادس بالمختصر عبارة عن مغامرة و تجربة لطيفة بعيد عن كل كلام الاخرين
و اشوفه هو مرحلة مؤثرة بشخصية الشخص ان نجح او لا و ان حقق حلمه او لا
و تبقى هي تجربة و ليست نهاية كل الطرق