***
Шкода тых, тко в Африцї живе,
Ōни вина си ниґда ни давили.
Капусты сōчнōй у малый гōрдӯв,
Ōни си шуга, ниґда ни солили.
Ни треба їм, бо в них ни є зимы,
З дрывами їм ни треба нарабляти
Айбо итак я дуже їх шкōдув -
Вни сиґінята ни йдут колядовати.
А дакōтрі лише ся там хвалят:
У нас тепло, ни треба нам ся гріти!
Ни знавут ōни, кōй на двōрі мороз,
Як пиля шпора файно си сидїти.
Дровиць дӯкласти - буль си напечи,
На стӯл усьо си красно розокласти:
Поприґы, соле, хлібця тай шкварок,
Фріґу 'д бульом на свиначӯй масти.
Ōни в мороз ни ріжут поросята,
Видав й ни чули за дōбру свіжанину.
Ни чинят гурку, ни варят шкваркы,
Ни будят пікницю, шōйт а солонину.
И много раз вни гōднї нам казати:
За ґаз вобще нам цидолы ни йдут!
Сиґінь негритята, перед Миколайом,
На пӯдоконник чōбӯт ни кладут.
Я їх шкōдув, кобы'м лиш мочи мав,
На пару днӯв їх, у зимі, забрати.
На шпōрі буль бы'м читаво напік,
Принїс из пōду струча нам сукати.

М.Чикивдя