مطبـخ ثويبـة 🖤👩🏻‍🍳

طاجين الهمبورجر♥️🤤🤤
يمشي عشي خفيف وساهل ♥️
اللي مادرتش عشي تنوض تلحق اديره 🤣

الطريقة العجينة
3اكواب دقيق ، ملعقة كبيرة ونص خميرة بيرة ،ملعقة سكر ،ملعقة صغيرة ملح ،ملعقة كبيرة زبدة بدرجة حرارة الغرفة ،وتعجن بالحليب الدافي ،ملعقة كبيرة خل ، وتترك تخمر ساعة،وبعدين تقسمي العجينةعلى نصين ، وتحطي النص الاول ، وتدهنيه بشوية هريسة وتبدي مجهزة لحم مفروم

طريقة لحم المفروم ،
ابشري بصلة ضرس ثومة واقليهم في شوية زيت، وتخليهم يشكشكو على النار ، وبعدين حطي لحم المفروم وشوية توابل ،ملح وشوية فلفل احمر ، وفلفل اسود، وزنجبيل ، وحرارات ولما ايطيب خليه يبرد شوية

طبعا بعد ما افردتي العجينة وحطيتي الهريسة حطي المفروم واكسري بيض بالبيضة وحطي علي المفروم وحركيه شويةاني الخطوة هادي مصورتهاش وتغطيه بجبنة شرائح وبعدها افردي النص التاني من العجينة وغطي بيها الطاجين وادهنيه بصفار بيضة وشوية خل ويرش الجلجلان وخليه في الفرن علي حرارة 180 وقبل ماتحمريه من فوق اثقبيه شوية بسيخ او سكين حاجة بسيطة مش تظمني ان البيض ايطيب
وان شاء الله يعجبكم لذيذ 😋😋

اسكالوب♥️🤤

الطريقة
قصي صدور الدجاج شرائح وتبليهم ، ببصل مبشور وضرس ثومة ، وليمون وزبادي سادة وفلفل اسود وزنجبيل ، وزعتر وملح ، شوية قرفة ، كاشيك صغير هريسة عربية ، وتبيليه وخليه اقل شي ساعتين كل مايقعد ف التتبيلة يجي احلى طبعا ♥️🤤

وبعدين غلفيهم دقيق ، وبعدين بيض وشوية قرفة ، وبعدها في الخبزةالمرحية
طبعا الخبزة المرحية او المطحونة ضيفيلها ظرف بيكنج بودر ورشة ثوم بودرة فلفل اسود وزعتر مطحون وشوية فلفل احمر
واقلي في زيت غزير حتي يتحمر من الجهتين ♥️

والف صحة وهناء على قلوبكم ♥️

كيكة التفاح واللوز الخزايني ♥️🔥
ننصحكم بيها بنات تهبلل♥️🤤

الطريقة
خليط اللوز والتفاح؛
تلاتة تفاحات متوسطات ، قشريهم وقصيهم مربعات ، ضيفي نص كوب سكر بني ، وكاشيك صغير قرفة ، وديري لوز خزايني مفروم ، ولو مش متوفر عندك ديري لوز عادي مهروش، كاشيكين كبار زبده دايبة، وكاشيك دقيق ،حركيهم كويس

نجو لخليط الكيك ؛
تلاته بيضات متوسطات الحجم، فانيليا ،
كوب سكر ،ثلاثة ارباع كوب زيت ، علبتين زبادي صافي ، طرف بينكج باودر ، نص ملعقة صغيرة بيكربونات الصوديوم وحوالي كوبين دقيق

خلطي الكيك وبعدين خودي طاجين ادهنيه بزبدة والدقيق ، وبعدين صبي خليط الكيك وبعدين خليط اللوز الخزايني والتفاح وبعدها خليط كيك وبعدين الطبقة الاخيرة الاختيارية ♥️

جهزي الطبقة هادي (اختيارية ) طبقة ال Crumble
سكر بني ربع كوب ،ربع كوب دقيق ، كاشيك صغير قرفة وكاشيكين كبار زبده،
وفترشيهم بايدك ،وحطيهم فوق كيك ، وحطيها ف فرن على 180 ،خليها من تحت قبل وبعدين ولعي عليها من فرق حوالي 48 دقيقة وزينها كيف ماتحبي ♥️

مشاركة من متابعين القناة♥️

طاجين الدجاج والبطاطا اللذيذ🤤♥️♥️

الطريقة
نقصو الدجاج ويتبل بالملح وفلفل اسود وزعتر وزنجبيل وتابل تونسي ونقلوه ف الزيت لين يتحمر ونستفوه بالطاجين
وبعدين قصو طروف بطاطا وجزر وتقليه ف نفس الزيت اللي قلينا بيه الدجاج
وبعدين خودي تومة وبصل قصيه شرايح رقيقة ونقلوه ف نفس الزيت اللي قلينا بيه البطاطا والدجاج ♥️

وبعدين ضيفي طماطم اخضر مكعبات وفلفل حلو شرائح وفلفل اخضر نقلو شوي ونضيفهم علي الدجاج والبطاطا
وناخدو صونية فيها حوالي كوبين او ثلاثة ميه سخونة و2ملاعق طماطم معجون وفلفل احمر وبزاز وملح وزعتر وورق غار ونضيفه ع الطاجين ونغلف الطاجين بالسلفر وينحط في الكوشة او علي الغاز مباشرة لين يطيب ويتشحر
والف صحة وهناء علي قلوبكم♥️