O‘zlik

***
Turkiylar hech qachon ogʻir damda, qullikda, shunchaki qolib ketgan emas. Bu xalq eng qiyin vaqtlarida ham bitta Temurbekni yaratib oladi. Kerak boʻlsa, agar tugʻilmagan boʻlsa, hatto eng oddiy bolasidan ham Temurbekni tarbiya qilib, yetishtiradi!..

***
Behbudiyni oʻldi deb boʻlmaydi, u qilgan shuncha ishlari bilan manguga tirik boʻlib qoladi…

***
Gʻoya — uning uchun hatto qonli janggacha borilgan paytda eng kuchli boʻladi.

***
Agar hozirgi boʻlingan tarix boʻyicha qarasak, hech qaysi xalq bizchalik istiqlol gʻoyasiga jonini tikmagan. Toʻgʻri, tatarlar Yevropaga bordi, Alash oʻrdadagilar chet elda oʻqib keldi… Lekin eng koʻp shu yoʻlda ongli qurbon bergan xalq yana bizmiz-ku?!

***
Bugun Forobiyni “bobom” deyishga qoʻrqasan “qozoq baurlarim xafa boʻladi” deb. Ibn Sinoni bobo deyolmaysan, xayolingga “tojiklar ranjimasmikan?” degan fikr keladi darrov. Fuzuliyga-ku, umuman yaqinlashib boʻlmaydi, u ozarboyjon ekan. Shu oʻzimizning ikkita bobomiz bor, shular haqida gapirib yuraveramiz. Lekin turkning tarixi bunchalar oz emas, biz birlashishimiz kerak. Biz bir otaning avlodlarimiz.