غزل ! وحیدالله وحیدي

چې دیار له دره ځې چیرته فنا وړې ?
بې مسیره حضور کوم طرف ته بیا وړې ?

که دې ځان پکې کتل غواړې بې عیبه
ائینه دخپل عمل به دې صفا وړې

اوس حیران یم چې قسمته څه کیسه ده
زه یوه خـوا اوته بلې خـواته ما وړې

حوصله استقامت دلته پکـار ده
څوک به زغمې او نازونه به دچا وړې

تخم شینده کرونده کره دِهقانه
که زحمت ګالې راحت به یې سبا وړې

داچې حرص درنه اصلي هدف هیر کړی
وحیدي نو وایه څه به له دنیا وړې ?