صباحا
عويد: يمه يا يمه..
ناصره: خير يا عويد.. وش تريد؟
عويد: يمه ابيج تحكين مع خاله ام صقر.. حنا ودنا راعية ترعى حلالنا وقلت ان مابيه غير رهف نامنها على حلالنا... وش قلتي يمه؟
ناصره: تم يا ولدي.. هالحين اروح واعلمها..
تجي نجود: انا بروح معج يمه.. وبالمره اسلم على خوالي ناجي ودواس..
عويد يبتسم: هههه وانتي ابد ما تعقلين؟!
نجود: لله يا خوي ماني بعاقله لين ازوجك.. هههههههه
عويد: اقول اسكتي ولا تكثرين... هاه يمه اعتمد..
ناصره: حط رجيلك ويدينك بميه بارده ولا تشيل هم..
عويد: مشكوره يمه ما تقصرين.. اجل انا اروح.. نسلم عليج.
ويروح..
نجود: يمه يمه..
ناصره: هاااا وش ودج ذبحتيني؟؟
نجود: افااا ما هقيتها منج يمه.. المهم اسمعيني.. وش رايج نزوج اخوي؟؟
ناصره: ما عندج سالفه يا نجود.. ما تشوفي اخوج وش قالج هالحين.. اقول قومي تجهزي عشان نروح لام صقر وبنتها..
نجود: اوووف زين زين
____
رهف: يا جده انا رايحه ودج شي قبل لا روح؟
ام صقر: سلامتج يا يمه.. بس لا تتاخرين تمام..
رهف: زين يا جده..
وتجي لها نويره
رهف: هلا والله بنويره.. توني طالعه هالحين.. ليكون بطيت عليكن؟!
نويره: لله يا رهف بس قلت اسلم عالخاله ام صقر.. كيفج يا خاله وش علومج؟؟
ام صقر: الحمدلله يا بنيتي ابخير.. كيفج انتي وشحال اهلج؟
نويره: ابخير الله يسلمج.. ما تشوفين شر يا خاله..
ام صقر: الشر ما يجيج..
رهف: زين يا جده حنا رايحين..
ام صقر: الله يحفظكن.

يا رهف يا قطعتن بقلبي دفينه
الله محيي بطن حملج واحتواج
يا ساكنه بين الضلوع المتينه
يا عسى عيني ما تدمع لفرقاج
_______
هزاع يصرخ: يا شيخ ناجي الحق يا شيخ..
ناجي يفز من خيمته ويا دواس
ناجي: خير وش صاير؟
هزاع: الحق يا شيخ.. الشيخ مسعود لفانا ويا رجاله متحمقين وباين على وجيهم الغضب.
دواس: وشو؟! وما عرفت ليش؟
ناجي: وشو ليش انت بعد؟! هم من زمان متحمقين علينا..
دواس: بس يا شيخ..
يقاطعه ناجي: لا بس ولا غيره.
هزاع: يا شيخ.. ترى الشيخة فضه معاهم..
ناجي يضحك: اهااا اجل كذا السالفة.
فضه تصرخ برع الخيمه: يا شيخ ناجي.. وينك يا شيخ القبيله؟؟ اطلع ان كنت رجال..
يجتمع الناس..
يخرج لها ناجي: وش بيه يا شيخه فضه علامج تصارخين؟؟
فضه: وينه اولدي قل لي وين وديته؟
دواس: ساري!! ليش وينه فيه؟؟
فضه: خلك ابعيد يا دواس.. كلامي مع اخوك الشيخ ناجي.. انطق وينه اولدي؟! والا لسانك اكله القط؟
ناجي: اقصري الهرج يا فضه وارجعي لبيتج.. وانت يا مسعود رجال طول بعرض تقودك مره.
مسعود بغضب: احترم نفسك يا ناجي.. ويروح يبغى يقاتله لكن رجاله يمسكونه: فكوني عليه ما يستاهل الواطي..
ناجي: ترى اهنتوني بما فيه الكفايه.. روحوا من هني والا والله لوريجيكم شي
وتصل ناصره تصرخ: بسسس.. وش الي قاعد يصير؟؟ ضحكتوا فينا العربان..
وتلتفت للناس حولها: يلا انتوا روحوا شوفوا اشغالكم.. وتلتفت لاخوها وفضه: ادخلوا معي انتوا الاثنين.. ودخلوا للخيمه..
__
فهيمة تركض لنويره ورهف بالغدير: الحقن يا بنات الحقن.
رهف: وش بيه يا بنيه؟
نويره: علامج يا فهيمة وش بلاج تركضين؟
فهيمة حكت لهن السالفة وراحن..
_____
دواس: وش بيه يا مسعود؟؟ وش صاير؟؟
مسعود: الشيخ ساري مفقود وما ندري وينه..
دواس قلق: وشوو؟؟ ومن متى هالكلام؟؟
مسعود: من البارحة..
دواس غضب: وليش ما علمتونا من بدري؟؟ هذا ولدنا يا شيخ مسعود.. خلك فطين ولا تعمل مثل الحريم..
مسعود: انا نويت اعلمكم بس تعرف الشيخة فضه زين. هي للحين متوكده انكم اخذتوه..
دواس: لله يا شيخ ما نعرف عنه شي.. الله يحفظه بس.. يله خلنا نوزع رجالنا يدوروا عليه..
__
ناصره: وش هذا الي فعلتوه من شوي؟!! انتوا ما تستحون على وجيهكم تتخانقون بين الخلايق..
ناجي: قولي لها.. اهي الي جات حامقه علينا..
ناصره: ولو هي كانت جذي.. اكيد فيه سبب وراها.. الشيخان ما يسوون الي سويته يا ناجي..
فضه تبكي: ولدي يا ناصره!!
ناصره: علامه ساري؟!
فضه: من البارحة مو موجود.. دورنا له بكل مكان وماله اثر..
ناصره تحت يدها على قلبها: انتي وش تقولين؟!
ناجي ما يعجبه الهرج ويخرج..
ناصره تصرخ عليه: على وين يا ناجي؟ ما يهمك ولد اخوك؟!
ناجي يضحك ع نص: ههههه لو كانت الشيخة فضه تعتبر انه ولد اخوي كان ما اتهمتني باخذه.. نسلم عليكن..