نو اولوبدور گوزه لیم گوزدن آتیبسان بیزی سن
یا کی یالنیز قویوب اغیاره قاتیبسان بیزی سن
سانیرام اوزگه لره بلکه ساتیبسان بیزی سن
حاجی محمود یازی یازدی سنه گئتمک بیزه یوخ
بیزه ده یازدی اورک قانینی ایچمک سیزه یوخ
1
🌺
قیزیلیدون بو پاخیر ائلده بیریدون بیلیرم
بیزیم ائلچینده گوزل تکجه گولیدون بیلیرم
باغیشون دیلده گزه ن ال آچیقیدون بیلیرم
گوزونو آچ یئنه بیر باخ بیزه حاج محمود علی
قیمیشیق آل دوداغا تاخ بیزه حاج محمود علی
2
🌺
بئله بیلمم کی دوشه گوزلر او سیمایه یئنه
گوزوم آخمیر گله موسی کیمی سینایه یئنه
حاجی محمود تکین اینسان کیشی دونیایه یئنه
نو اولاردی ساتاشایدی گوزوم او گوزلرینه
یا قولاقلاری وئرم دادلی شیرین سوزلرینه
3
🌺
حاجی محمود نه یاتیبسان کی یاتان واقتی دگیل
گونش اوزلو دور آیاقا کی باتان واقتی دگیل
قولی بوینوندا ائلی گوزدن آتان واقتی دگیل
گون اوزوندن کوزرردی بو جماعت بیلیسن
بیلیرم یاشلی گوزی ایندی ده اوردا سیلیسن
4
🌺
کیم اولار سن تک عمواوغلی اوزونو سیندرا بیر
یا کی پروانه اولوب عشق اودونا یاندیرا بیر
قیش اولا یوخسول آداملار تک اوزون دوندرا بیر
آشاقی باش اولانی بئیله اوجالدار آلله
چوخ چتین سن کیمی اینسانی یارالدار آلله
5
🌺
قان اودان اینسانی بیر گون جیگری کوزمه تاپار
بئله بیر باغری یارا هرنه داریلقانی قاتار
گلمه سین باشوزا بیلمم نئجه آخشامی یاتار
آغری دان یوز گوتورردی منه تا تسکین آلا
هئچ حکیم اولمادی من تک او زامان مسکین اولا
6
🌺
ساری یاپراق کیمی سولدی یئره دوشدی گولوموز
گولو سولموش گوروب اوندان اوخومور بولبولوموز
ائلچینیمیز گئدیب الدن ییپرانیپ سونبولوموز
حاجی محمود گوزونو یومدی داخی آچمیاجاق
او گوزل گوزلریلن بیزلره بیر باخمیاجاق
7
🌺
دوزومو چوخ گوزلیدی نه گوروبدور دئمه دی
کیم اونو اینجیدیب هئچ کس دئمدی او دئمه دی
گوزونو پیسلیکه یومدی پیسی هئچ واقت دئمه دی
بو آغیرتاختالی تک مهدی ائلی گورمیه جاق
حاجی محمود تکین اینسان بیلیرم گلمیه جاق
8
🌺
آلچاق اولدون اوجا گورستدی تاری حکمتیلن
کیم سنون تک واریدی گئت گلیشی حشمتیلن
بیلیرم دوز تاپاجاقسان یئرووی رحمتیلن
آیاقا باخدون اوجالدی باشون ائل ایچره گولوم
سو بولاقدان گئده جک دیر گیره گول ایچره گولوم
9
🌺
مهربانلیق گوزوسن یا سوزوسن یا الیسن
مهربانلیق گله یولدان سن اونولان گلیسن
مهربانلیق باغی اولسا بیلیرم سن گولوسن
مهربانلیق حاجی محمود آدینا چوخ قاتیشیب
مهربانلیق بیزه حاج محمود الیلن یئتیشیب
10
🌺
گئدیب الدن قوهومی شاد الیین حاج محمود
کاخ عقباسینی آباد الیین حاج محمود
اوزون ابلیسی دن آزاد الیین حاج محمود
هرنه حق امر الدی باش اونا اگدی کامیل
سونلوقوندا اونا رحمت اولاجاقدیر شامیل
11
🌺
ال اگر ال توتا بیلسه نه گوزل نعمت دیر
داخی بو ال دگیل اوندا اوزی بیر رحمت دیر
ال اگر باتمیا خیره سبب نقمت دیر
حاجی محمود الی رحمت الی اولموشدی اوغول
او الین ایندی بو ائل ایچره یئری بوشدی اوغول
12
🌺
گوزل اولساندا گئدیش وار سنه بیر آد قالاجاق
نه قدر گول گوزل اولسا او گول آخیر سولاجاق
حاجی محمود آدی گلدیکجه گوزل یاد اولاجاق
قویاجاقدور گوزل آد هر گوزل اینسان اوزونه
حاجی محمود تک اوغول گورمدی دونیا گوزونه
13
🌺
اجلین قایداسیدیر هر گوزل ائو تاپسا گئدر
گوزل اینسانلاری بیر بیر تاپیب هر یاندا سئچر
گئدر هر یئرده گوزل گول تاپا تئز پرپر ائدر
حاجی محمود گوزلیدی کی اجل سئچدی اونی
بیزیم ائلچینده گولیدی کی سئچن بیچدی اونی
14
🌺
ایکی دونیا نه گوزل پارچالانیبدیر آرادان
سون یاشام یالان یاشام آغ آیریشیبدیر قارادان
بیلیرم هر ایکی سیده قوشولوب بیر پارادان
تکجه باشلی کیشی ساتماز سونی هئچ واقت یالانا
اورکین باغلار همیشه او قوشولقان قالانا
15
🌺
گوزل اینسالارا آلقیش وئره جک حاج محمود
ائشیدیب آلقیشی آلقیش دئیه جک حاج محمود
باخاجاقلار هامی گویچک گوره جک حاج محمود
اگر اینسان اولاسان سنده گوررسن آبالام
آلقیشی اوچما ایچیندن ائشیدرسن آبالام
16
🌺
حاجی محمود بیلیرم اوچمادا ایندی یاشاییر
یاشاییر ائلچین ایچینده یا سارای ایچره قالیر
گول دریر یولداشینا یولداش الیندن گول آلیر
حاجی محمود کفین اولسون یاشاییرسان نه گوزل
گوزل اینسانلار آراسیندا قالیرسان نه گوزل
17
🌺
بزه مک واقتی گورورسن گئیینیر ساری ایگیت
ساری گئیدون بگنه بلکه سنی تاری ایگیت
ساری نار تک یئنه گوستر او قیزیل ناری ایگیت
بزه نیبسن گئده سن حق یانینا گویچکجه
حاجی محمود یاراشیر ساری سنه گور کی نئجه
18
🌺
دئمیرم دور یئنه یئردن بیزیلن بیرده دانیش
دئمیرم سن وار اولونجا واریدی بیزده تانیش
دئمیرم گوزلر ایچیندن اورکین دردین آنیش
دئییرم سن آناما قارداشیدون بیزلره یار
گئدیشون گوندن اولوبدور بیزه دونیا بویی دار
19
🌺