الشاعر زيد الشمري

لحن ابوذيات امير المؤمنين ع

لحن لجمة موت

قصيدة استشهاد أمير المؤمنين ع 

صوج الليل           مدري اجروحي  
لجمة موت               لسه بروحي  
ما ادري اشلون ارتاح  … ما اسمع بس اصياح
لجمة موت        لسه بروحي 
******* 
يبو الحسنين .. الك كل عين .. تسيل ادموع هالليله 
وأنه زينب .. بكلب يلهب .. أكله بويه وأحجيله 
الزمن قاسي .. أخذ ناسي .. اخذهم مني بالحيله 
من اخذ امي .. احترك دمي .. وابوي الليله أبجيله 

اشمال الناس             بس تاذينه 
بلايا احساس              تذبح بينه  
من يوم الجدي راح  … ما اسمع بس اصياح 
لجمة موت         لسه بروحي 
******* 
مهمومه .. ومهضومه .. روحي وخاطري مكسر 
عافوني .. وعيوني ..  يبسن والدمع خضر 
من جرحه .. اشلون اصحه  .. بعيني حيدر امطبر 
من صوابه .. بمحرابه .. طيفي ايسولف المنضر 

اتسيل ادموع            واتلافاها 
بس عباس                يتلكاها 
اشلون انسه ابيوم الطاح … ما اسمع بس الصاح 
لجمة موت         لسه بروحي 
******* 
 مشو كلهم .. ودمعنه الهم .. نزل والعين مارمشت 
على احبابي .. أنه امصابي .. كثر واعيوني مانشفت 
بكبر حبهم .. أحن الهم .. المصايب بالعجل كبرت 
صحت ياليل .. وانه بلا حيل .. يريت أيامي ما كبلت 

هذا الشيب              ليش براسي 
موت احلام            ويه احساسي  
خلصت أيامي إجراح … ما اسمع بس اصياح 
لجمة موت          لسه بروحي 
**** 
صحت ياموت .. واحن بسكوت .. اخذ كل البكه بعمري 
عناده وياي .. عجيب اهواي .. اسولف والدمع يجري 
تون الروح .. بسهر وجروح .. عفاني واشكبر صبري 
لجمة باب .. والمحراب .. خناجر صوبن ضهري 

زينب وين           عزج  وين 
كله يروح             ويه حسين 
من ترسوا ضهره ارماح … ما اسمع بس اصياح 
لجمة موت           لسه بروحي 
****** 
أنه بزغري .. انكسر ضهري .. فكدت أمي ونضر عيني 
اصد للباب .. ابزعل واعتاب .. اتفرهد عمري واسنيني 
أنه بمكفاي .. جرح دنياي .. اشيطيب جرحي ياذيني 
جبتها اهموم .. بحزن كل يوم .. الدمع سلوى ويسليني 

هاي الروح               ملجومه 
 من الصار              مهضومه  
كضيت ايامي انياح … ما اسمع بس اصياح 
لجمة موت           لسه بروحي 
*** 
لشاعر اهل البيت ع 
زيد الشمري 

ابوذيات لإستشهاد أمير المؤمنين علي عليه السلام..
وحك رب البنى الكعبه      وفطرها 
وحك يس وي طه           وفطرها  
بعد عينك يبويه الناس       فطرها 
مضلم والخلك نصبت عزيه .. 
١.. فطر 
٢.. سورة فاطر 
٣.. عيد الفطر 
…….. 
يبويه صواب دلالك          ولا طاب 
والجرحك لادوه ينفع         ولا طب 
عسى عكبك يبويه الدار     ولا اطب 
واشوفا" هامتك بالدم جريه … 

زيد الشمري

تفاحة محمد صارت الزهراء 
وبيد المرتضى عين وبسمه مجراها .. 
واذا عندك شعر لو ومضه عنها اتكول 
شرط تتوضه كبل متكوم تقراها .. 



تلاحكها يحيدر طاحت الزهراء 
شيل الكون يالله استعجل  اشويه .. 
غشيم ويدفع البابك يبو الحملات 
واضنه ابلا عقل من ناوي عالجيه .. 

اكيد ابلا وعي لمن دفعها الباب 
الجان ايدكها طه وايده محنيه..
بخت بيهم ماشالت خمار الراس 
وإلا الدنيا من هاللحضه ممحيه .. 

كل اهل السمه اتباوع على الزهراء 
بين الكاع وسماها اتصير بوشيه .. 
علي طاح الورد بيمن تشم الطيب 
منو الوجهك بعد يقره المعانيه .. 

علي ايفسر علي بس فاطمه الزهراء 
آيه وتتله آيه وكلها قدسيه ..
ما مخفي الكبر صدكوني للزهراء 
خل بالك اوياي واصفن اعليه .. 

علي ما راد يدفنها ابتراب الكاع 
ابكثر ماحبها حيدر غير النيه.. 
دفنها ابين رمشينه علي وارتاح 
اشما يرمش يشاهدها الزجيه .. 


✍زيد الشمري 

مدري اشلون تصبر ياعلي/موشح للزهراء ع


مدري مدري اشلون تصبر ياعلي 

اشلون يوم الدار تسكت يالولي 

بيك متحير واريد اتكول الي 

اشلون ترضه الفاطمه ايعصروها 

**** 

تشهد اعليك المعارك من تصول  

انته حماي الحمه وفحل الفحول 

اشلون حركوا دار فاطمة البتول  

زمرة الخطاب من سطروها 

******* 

شلون يدفع باب يعصرها النذل 

هاي أم حسين بت سيد الرسل 

اشلون يرفسها ولا عنده خجل 

اضلوع بنت المصطفى ايكسروها 

******** 

ياعلي شنهو الحصل يابا الحسن 

انته قالع باب خيبر والحصن 

اشلون محسن يوكع بطبكة جفن 

ذيج وادم مو أصيله ابذورها 

******** 

كلي يالكرار ساعات الدفن 

اشلون من شبكت حسين ويه الحسن 

ضلت اعله اولادها اتإن وتون 

فتحت الجفين من شبكوها 

******** 

ويلي يالكرار ساعاتك كضت 

روح رد الزينب أسمعها بجت 

اتريد امها ياعلي واتحيرت  

من زغرها زينب ايهضموها 

********* 

باجر الشيعه فلا تنسه الجره 

باجر ايصيحون وين الطاهره 

ايطلبون ثار اضلوع بيه امكسره 

اعليه دفع الباب ماينسوها

******** 

زيد الشمري 

يكحلة عيني             وكحل كل ناضر
وعد ما اعوفك             وإجيتك زاير      
عشت بأنفاسي .. حسين 
صحت باحساسي .. حسين 
وعد ما اعوفك     واجيتك زاير ..
******** 
وحك عباسك .. حسين 
عشكت انفاسك .. حسين 
الكطعلك راسك .. حسين 
الي يذبحوني٢ 

ذكرت اطفوفك          نهاري وليلي 
من اخط جلماتي          يهدن حيلي  
عهد ما ناسي .. حسين 
صحت باحساسي .. حسين 
وعد ما اعوفك         واجيتك زاير .. 

*********
فديته  ابعمري .. حسين 
عشكته ابزغري .. حسين 
ادكلك صدري  .. حسين 
الك نذروني٢

صرت وي روحي           تعيش اللحضه 
ابوسط أشعاري                كتبتك ومضه  
تعيش ابراسي .. حسين 
صحت باحساسي .. حسين 
وعد ما اعوفك           واجيتك زاير..
********* 
إلك اشلعها  .. حسين 
يصب مدمعها .. حسين 
واصيح اسمعها .. حسين 
تصيح اعيوني٢

بتراب احبابك         اشم واتنفس 
اليكصدك زاير         صبح يتقدس
هلي وكل ناسي .. حسين 
صحت باحساسي .. حسين 
وعد ما اعوفك        وإجيتك زاير.. 
********** 
الك فدوه آني .. حسين 
صرت بلساني .. حسين 
والك وجداني .. حسين 
لمن سألوني ٢

المواكب هايه        إلك نصبوها 
اعله حبك روحي      هلي ربوها 
أنه ابكراسي .. حسين 
صحت باحساسي .. حسين 
وعد ما اعوفك          وإجيتك زاير .. 
******* 
نسألكم الدعاء 
زيد الحدراوي الشمري 



 

كون أشلع اعيوني        راحوا وعافوني      
لا آني ميت لا عدل  *  بروحي نار وتشتعل 
راحوا  وعافوني 
*************** 
كمت اطفي ابنار روحي ابكل مسيه 
الزمن ماخذ حيلي كله وكلشي بيه 
أنطر الباب ابسفرهم ماكو جيه 
هو شيجيبه المشه وما رد اليه 

كلشي راح اوياهم         يمي بس ذكراهم 
ابعيني دمعي مايمل  *  ابروحي نار وتشتعل 
راحوا وعافوني 
*************** 
كمت اسولف وحدي بلجن تهده ناري 
وداري وحشه من جفوني ماهي داري 
يكتل افراك الأحبه وبيه أباري  
وآني ادري موتي حتما" بإنتضاري 

احجي ويه اجروحي       كون أموت روحي 
وادري هذا مو سهل  *  ابروحي نار وتشتعل 
راحوا وعافوني 
************* 
راسي أبيض ماصبغته من حزنهم 
اشلون عافوني وجفوني شنهو ضنهم 
الدنيا غربه اشلون اعيش ابلا وطنهم 
بلغ احبابي ابسلامي ليلي عنهم 

سلم اعله الراحوا       همه هسه ارتاحوا 
ابحزني اكعد وأعتزل  *  ابروحي نار وتشتعل 
راحوا وعافوني 
************ 
والله كون ابإيدي وارسم للخواطر 
كون اعيشا" عمري كله بالمكابر  
كون أسافر وي سفرهم كون أسافر 
وحته الإتراب اعله جرحي يبجي صاير 

كون اسمع الموته        وجرحي يصدح صوته 
عيوني باجفاكم تهل  *  ابروحي ناروتشتعل 
راحوا وعافوني 
************* 
راح اخيط جرحي بيدي وما أشده 
كلبي يسأل عن خبركم والله وحده 
كتله أيس كلبي منه ماله رده 
جانت اخر لحضه بوساتي اعله خده 

حسين خل اشكيلك         بويه والله ادعيلك 
هم عليله ولا أهل  *  ابروحي نار وتشتعل 
راحوا وعافوني 
************** 
شاعر اهل البيت ع 
زيد الشمري 

انتهى منهاج هذا العام نسأل الله القبول

يا أيُها الموتُ الثَقيلْ           رِفقاً فإنهُ العليلْ

شايف مصايب كربله * دمه ودموعه سايله

رِفقاً فإنهُ العَليلْ

************ 

بمتون الدهر آلام.            ومن حزنه انحنه ضهره

يعين الله علي السجاد.           شاف الفاجعه الكبرى

من شاف الطفل مذبوح.          عبدالله ابزغر عمره

ومن شاهد هذيج الخيل.    حسين ايرضرضن صدره 


فَلينصبْ القلبُ عَزاءْ          والعينُ تجهشْ في البُكاءْ

مو بس أليمه المسأله * دمه ودموعه سايله

رِفقاً فإنهُ العَليلْ

*************** 

يالوعة علي السجاد.         راحوا كل أهل بيته

بخيامه تشب النار.          ابدمعه خضب الحيته.

لا يكدر يكوم بسيف.        ايموت اوياهم امنيته 

بس هذا قدر محتوم.         راضي بهايه تاليته 


في قًلبهِ كسرٌعَميقْ           حزنٌ بَدى لهُ رَفيقْ 

اشلون الرفيقه اتحمله * دمه ودموعه سايله

رِفقاً فإنهُ العَليلْ

************* 

نياشين ابوسط متنه.      ونياشين ابوسط كلبه

كلما ينضر ابعينه.         ماي اجروحه الإتعذبه.

يذكر شفة احسينه.            مفطوره مثل تربه.  

وطافنه هذيج الخيل.         مثل ما نفتر الكعبه 


في صَدرهِ سهمٌ رَسى.       في رَئسهِ كلُ الأسى

هذا السهم من حرمله * دمه ودموعه سايله

رِفقاً فإنهُ العَليلْ

*********** 

خلص كل حياته اينوح.          يبجي ودمعته ابعينه

واقعة الطفوف اسيوف.         تمزك عمره واسنينه

من سار ابضعن مجتوف.            وابمتنه نياشينه 

وراس حسين يمشي وياه.     اكباله وينضر حسينه 


في عَينهِ دمعٌ جَرى.       وأهلهِ فوقَ الثَرى

خي عونه من ينضر هله * دمه ودموعه سايله

رِفقاً فإنهُ العَليلْ

************

لمعه ابحزنه اشوفنها.            تجرح خاطر ادموعه

ولحضات التمر لجمه.                تلجم ليله باللوعه 

اشما يصفن يشوف الخيل.    حسين الداسن اضلوعه 

ذبحوا بالطفوف اسلام.         وهدمه اصله وافروعه 


لَما هَوى منْ مُهرهُ        ماعاشَ لولا صَبرهُ  

من ينضر احسينه إله * دمه ودموعه سايله

رَفقاً فإنهُ العَليلْ

************* 

لخادم اهل البيت ع

زيد الشمري

( معقوله آخر سنه) 


معقوله آخر سنه.             أحضر ابمجلسك 

وابريتي صرت الهوى.           خلني أتنفسك  

حته لو تحت التراب .. راح اسويلك مصاب  

خلني اتنفسك 

****** 

اخذني واهس أيامي.       يدليني بشهر حزنك 

أموتا" حته بأحلامي.        ويعيشني أمل منك  

لو ما اشرك ابربي.         يحسين آني اعبدنك  

هيج امخبل ابشوكك.       اشسويت وأعشكنك 


ربك وضع ميزتك.          عوض امصيبتك 

حته الملائك الك.             بالفطره عشكتك 

ورحي مليانه عذاب .. راح اسويلك مصاب 

خلني اتنفسك 

******** 

يخنكني الوكت يحسين.          واتنفس هوى المنبر 

واجروحي كبل روحي.           تركضلك وتتحضر 

احس وي عابس ابعاشور.    من اشيل السيف واطبر 

اويلي اشلون ذاك السيف.      اعله جسمك اذن وكبر  


سهم الامثلث نبت.          ابجسمك وروحي 

ميكفي هذا العمر.           شيكفي وي نوحي  

اويه الموته ارددلك جواب .. راح اسويلك مصاب 

خلني أتنفسك 

******** 

ريشات العمر وكعن.         وشيب كل حلم وردي 

واحس أيامي جنها الليل.     تمر ساعاتي واتعدي 

منو مثلي سهرت اسنين.      كون اليعشك ابكدي  

لا ذيج التحب يوسف.        كدرت توصل الحدي 


امفصلك عليه عدل.           معتني بكصتك 

سودني عشك الزغر.      واتنفس ابخدمتك 

من غيرك آني سراب .. راح اسويلك مصاب 

خلني اتنفسك 

******* 

دنيانا صفت ألوان.           يرسمها أبو الغايه 

واني من الك حبيت.            ماعندي الك هايه 

تمر اشكال من هالناس.      وانته اتحبك اهوايه 

كون ابكل كبر حبك.           عنده ننصب اقرايه  


باجر اذا اندفن.        احتمي ابصايتك 

وابكبري لو انسأل.      اتخلصني  دمعتك 

من عندي آخر خطاب .. راح اسويلك مصاب 

خلني اتنفسك 

********* 

يحسين بوسط غابه.      نعيش وناس تاكل ناس  

مايسلم بشر عدنه.         وحق البالشدد نبراس  

كلام البالضهر يوجع.      يشيب منه هذا الراس  

بعد ماكو اخو يوفي.     مثل مايوفي الك عباس 


والخوه صارت وكت.        ايقيمها دينار 

والدنيا كل العجب.          تحكمها اشرار

ما اريدا" ابدي العتاب .. راح اسويلك مصاب 

خلني اتنفسك 

******** 

الصغير زيد الشمري 

موشح هذا سر

ياعلي حسينك غميجه  آلامه 

مثل الجمر يحرك كلب خدامه 

*****

آه  يالبيدك شلت ذاك الصخر 

وطلع تحت الكاع ماي ابكل فخر

حسين عطشان ويكطعوله النحر 

                   اشلون سر ومانعرف ابهامه 

*****

طبك الإسلام صفحاته وطوه 

اشلون ترضه ايطيح شيال اللوه 

وانت جنت ابكيفك اتوزع الهوه 

                  خل يشم دخان حرك اخيامه

****** 

ياعلي روح كل الزينب اعله التل تصد 

كلها أيسي العباس مايرجع بعد 

كلها صرتي وحدج ابلايا سند 

وحرمله جرجر ابأيده اسهامه 

****** 

خل انشدك ياعلي اوضح السبب 

هالسؤال ابالي مطروح ابعجب 

اشلون شبلك ياعلي كلشي انسلب 

وما إجيته ورضرضوها اعضامه 

****** 

هذا سر وما حضرت انته الطفوف 

اشلون عينك تنظر الزينب تشوف 

تركض اعله حسين واتكطعه السيوف 

وكعت اكباله وتون جدامه 

***** 

شاعر اهل البيت عليهم السلام 

زيد الشمري 

ونسألم الدعاء 

لحن من تطلع شمس باجر

( من تطلع شمس باجر) 


من تطلع شمس باجر        يعني الوداعيه 

وابروحي كسرة خاطر     بس إنتي مو هيه 

باجر تراب براسج .. المن يصيح احساسج 

بس انتي مو هيه 

********** تفعيله


اشماله الوكت ويانه .. شايل جرح بحظانه .. 

وبرمحه تجوة موت 

باجر يطر مصباحه .. بالدنيا ماظل راحه .. 

واعله المنايا انفوت 

لو شفتي باجر وضعي .. خيل التدوس بضلعي .. 

كل دوسه اصيح ابصوت 

جانج سمعتي احجايه .. بيه الجروح اهوايه .. 

اذرف دمع بسكوت 


اصرخ واصيح واسمع       ابهيده يدنيا اوياي 

صوتي طلع ما يطلع       ما ظايك آنه الماي 

لمن وكع عباسج .. المن يصيح احساسج 

بس انتي مو هيه 

*********** 

هالليله انتي ويه حسين .. باجر أسيره اتروحين ..

باجر بلايا اخوان 

باجر يحركون اخيام .. باجر تضيع ايتام ..

باجر بلا صيوان 

باجر تصيحين اهناك .. يحسين اخذني اوياك ..

وآني على التربان 

يتغير اعلينه الحال .. باجر يذبحون اطفال .. 

باجر ذبح رضعان 



عبد الله لو شفتي ايلوع.      وابنحره سهم اعداي 

زينب تلكيني ارجوج.        وعينيني يختي بهاي  

مكطوعه خويه انفاسج .. المن يصيح احساسج 

بس انتي مو هيه 

********** 

كل الزلم مذبوحه .. باجر جثث مطروحه.. 

وبس الدماء اتسيل 

لمن تطيح الرايه .. عالعلكمي ويم مايه .. 

ايروح هذا الحيل 

جن هسه اسمع ونج .. عالتل يزينب ونج .. 

واوجب عليج الليل 

لا واحد اليفزعلج .. بس اني اسمعلج .. 

لمن تغير الخيل 


بعيونج اتراب ونار.       والحيره ترس الراس 

عينج اعليه اتروح.        وروحج اعله العباس 

ذبحوها كلها الناسج .. المن يصيح احساسج 

بس انتي مو هيه 

**********

لو هجمت اعليج الخيل .. بين العصر بين الليل .. 

يا زينب وضربوج 

لا آني يمج وأفزع .. وهذا الكفل يتكطع ..

واهل الرده حاطوج 

من ينذبح راعيكم .. باجر شمر يحديكم .. 

وبغلض حبل كادوج 

باجر تطيح اجدامج .. باجر تهيج آلامج ..

واشلون لو سبوج 


باجر يخيتي ايسبون           حيدر علي الكرار 

وبديج يخويه اتشكفين.      من يشمروج احجار 

باجر بلا حراسج .. المن يصيح احساسج 

بس انتي مو هيه 

********** 

تمت بحمد الله 

للشاعر زيد الشمري 

كل من عليها فان..

كل من عليها فان.        ويبقى الحسين 

كلما دار الزمان.          تبكيه كل عين 

هذا الخلود ..   للحسين 

ذاك الصمود .. للحسين 

ياحسين 

********** حدي

بالدنيا قانون البشر.               من تنتهي حياته  

حته اسمه حتما ينسي.          وهم تنتهي صفاته  

بس الحسين ابكل فخر               يتجدد ابوفاته   

حته الله ما ينسه الجره.        من اتخضبن شيباته   


كل قلب في هواه.            حائر حزين  

كل من عليها فان.         ويبقى الحسين  

********** 

لو عنك آني ردت ازل           واتبع طريق الشيطان 

ارجع اذا اسمع بجي.        وجابولي طاري العطشان 

حبك حصانه امن الذنب.           وبس اليحبك انسان 

رتلنه حبك عن ظهر.             خاطر حفظنه القرآن  


تبكي روحي للعزاء.      وتجري المقلتين 

كل من عليها فان.          ويبقى الحسين   

******* 

والله لو تحسبني خادم          بيك الشرف يامولاي 

الطم ابمجلس عزائك            وبيك مشغول هواي 

من اصيحا" يابو فاضل        زينب اتصيح اوياي

 اسمع العباس كلها         يختي هاج اخذي الماي 


سال دمعي والبكاء      يندى له الجبين 

كل من عليها فان.       ويبقى الحسين 

******** 

كل ما اصدا" للخيم         ابراسي وارجع الذاكره 

جن اختك اكبالي اجت.      تركض وحيده وحايره 

من حركوا اعليها الخيم.     صاحت يسبع الكنطره  

تتعثر برمح ودرع.         اتكوم وتطيح اعله الثره


وأنت باقي في العراء.        ودامي الودجين 

كل من عليها فان.              ويبقى الحسين 

******* 

كلما يمر بينه شهر.              نحسب نعد لأيامك 

نرسم صوواين وحرم.         نرسم حرك بخيامك 

لو حبك ايصير الوهم.        خليني اعيش اوهامك 

هالدنيا ابيعنهه إذا.              تحسبني من خدامك


هذا عهد بالوفاء.          وتبقى السنين 

كل من عليها فان.       ويبقى الحسين 

********* 

للشاعر زيد الشمري