سوێست تار و لێڵ پێویۆ چەمم زاق و ورەش تەرسۆ
نەدۆشا شۆتوو تاسەیما مەیەو مژنیم وەرەش تەرسۆ

هەزار ئێشێ جە تەسویرات هەنێ تەبعەم کەرۆش شێعرە
سکووتوو دەنگوو هاواریم جە دەنگی حەنجەرەش تەرسۆ

چەموو حاڵیت نەبۆش سۆما چەموو قاڵیت دیایش پەی چێش؟
بە قال و قیل مەبۆ تەی حاڵ، کە حاڵی مێزەرەش تەرسۆ

بڕا شۆتی جە تفڵیوی دڵم پەی تۆ هەزار ئاننەن
نمەی تۆ و چەم زرێبارە و خەیاڵم زاکێرەش تەرسۆ

هەواو ڕاو عەیش و شادٚیما تەپ و تۆزوو خەما گێرتەن
تەوەرزین حاکما و کەشما بەلوو و بلچ و نەرەش تەرسۆ

کەرۆم لێوەش هەناسەو تێجیە گەرمەو هامنۆ دووریت
مەشی حاڵیش مەبۆ شیشێ پەل و باڵ و سەرەش تەرسۆ

پەلێش سۆتێ هەناسەو بەرزە ئاواتاو وەڵاتیما
بە دارێ ویروو سپڵۆتی سەمەرما نەوبەرەش تەرسۆ

تەقەو پاو ساکی مەر ماڕۆ وەنەوزەو مەرگوو کووجیێما
جەمام بی چەم نیاش تاقەت دەلاقەو پەنجەرەش تەرسۆ

#خالێد_ئه‌حمه‌دی

@hawramanhaneberchem