مــولاي منك. امجدي الخدمه وابكيفك
مـولاي يومك اليوم اومنحسب ظيفك
ابكل حيلي اخدم ردة هل طلبه
اوي كرم وجهك والله مو. صعبه

-----------------

من كرم جودك اجدي دمعتي اوخدمتي.
انه احلفلك بالزجيه
ياكريم انطيني بيدك طلبتي. اوحرگتي
ازيد اريدن هلمسيه.

جايك اليشبه حالي
مارجع والچف خالي
بيدك انطيني كلشي انه اريدة

لامال ابد لاشهرة
والزهرة رايد نظرة
عبد المجالس الك رافع ايدة

رايد يلحسن بسمك عاگد الرايه
رايد اغسل رجل زاير المشايه
الكون بيدك وادري مو عجبه

--------------
خاف حيلي ايخون بيه انطيني حيل. بالعليل.
جاي احشمك شدلي حيلي
عندي لو يصبح تهاون حطلي واهس مال عابس
حتى اسهر ذاك ليلي

خلينه نسهر باچر
نشتم تراب الزاير
اتراب اليدوسه يسؤ كل حياتي

اشعلي درب الظلمه
اوظوگني صدگ الخدمه
اويگظي العمر لوعات امنياتي

اثبت بالخدمه اثبت بيدك ارزقني
اثبت ابمجلس اموتن. انته وفقني

بس مرة اسمي ابچفك اتكتبه
---------

بيدك الخدمة اخيك فدو اريد. للعبيد
ابقى الهم انه خادم
اتنزل ادموعي ابرحمتك. علصعيد من بعيد
من اشوفن هزل قادم

والزينب اتهل العين
اوچفيني تخدم لحسين
ناذر وقف لحسين كل حواسي

اولمن اشوف الرايه
اذكر اخو الوفايه
وابراسي غيرة انطيني من عباسي

رايد ابخدمة اخيك ارد اظل هايم
رايد احــــلم ابموكب حتلو نايم
وخدودي خلهن بالدمع رطبة
--------------


ابالي ارسم. هلزيارة. ابكل عبايه. للسبايه
ارد احس معنى الاسيره
وسفه والمكفولة ردت شو سبيه. والرزيه
اختك الچانت اميره

وسفه اوعقيله هاشم
شافوهه ذيچ الوادم
زينب انشافت هاي اشد مصيبه

الدمع علخد سايل
والاصعب ابلا كافل
اوتالي العمر زينب صفت غريبه

صعبه باوع الشامت تظحك اعيونه
صعبه چانت اسمه ايگول. مصيونه
بسكوت تبجي اوتكتم النحبه

-----------
من اشاهد كون طفله يم ابوهه. ويه اخوهه
دمعي ينزل علوطيه
ليش وحد بت اخيك شو سبوهه اوسلبوهه
وابحبل چتفو رقيه

الجمرة الچوت رجليهه
ابنص گلبي بس خليهه
رايد احس ذاك الچوي اوعذابه

عدة ابخرابه النومه
وابلا سگف مهدومه
الدلله راح اوغفت علترابه

امنيتي ابذيچ الخرابه انه اگعد اونعه
امنيتي واهناك احس بحروة الدمعه
اومن فيظ جودك علبواچي اربه


علي الحميداوي